【降魔的】富爸爸曾反對做歌手　胡鴻鈞：佢哋要我為自己條路負責

這陣子的熱話，總是提著「禁色令」，還不僅限於女藝人。剛巧禁令推行之前，胡鴻鈞在《降魔的》就有露股場面，想不到變成了最後一次「性感」演出。不過，提起胡鴻鈞，來來去去總是關於他的臉形，最近更Update成「削骨8.0」。以前被嘲諷得多，笑稱他「削骨還父」，想不到連胡鴻鈞的家人聽完傳言之後，不禁產生疑問，望著日見夜見的心肝寶貝，坦白地問：「你真係有削過骨？」

被標籤為削骨之前，胡鴻鈞出身自理大BBA，因為父親做生意，胡鴻鈞口中形容係：「屋企有啲物業！」，一聽就知唔係一般家庭。同時因為家有創業，總想下一代可以按著既定步伐走，讀完大學就找份安定工作，那就順風順水。不過，胡鴻鈞畢業後參加了《超級巨聲2》，還得到亞軍，決定簽約星夢、加盟TVB。胡鴻鈞當時跟家人爭論，到底圓歌星夢好？還是甘於平凡，搵到錢就心足？胡鴻鈞回想這段拉扯過的經過，縱使他沒有描述細節，但他最記得家人一番說話：「我哋討論嘅時候唔係好激烈，唔會僵到六親不認。只不過當我真係決定做歌手嘅時候，佢哋講咗句由細到大都會講嘅說話：『做咩決定都好，要為自己負責。』當我簽咗約之後，我都盡量唔令佢哋擔心。」

胡鴻鈞成為歌手之後，總有些負面新聞，與林欣彤傳緋聞之餘，疑似整容的消息也愈傳愈烈。網民討論之間，幫他製作臉形進化圖，揶揄胡鴻鈞「削骨還父」，雖然他多次否認，可是網絡世界只會無限將這個話題延伸下去。而且家人本來就不同意胡鴻鈞入行當藝人，面對傳聞滿天飛，父母無形有著壓力：「佢哋聽到我唔好嘅新聞，都擔心我唔開心。但係佢哋聽到我整容嘅傳言，都會好緊張摸住我塊臉問我：『你真係有削過骨咩？』真係好搞笑。但入呢行耐咗，好多嘢都會諗通咗，都係得啖笑，所以我咁豁達，佢哋都冇咁擔心我。」

胡鴻鈞家人如今已退休，家姐已經移民。胡鴻鈞敢做歌手圓夢，除了家人後來支持，家境不俗也算是另一個因素。他說：「屋企人而家退咗休，不過都有自置物業。我係會畀家用嘅，但佢哋唔係等住我開飯，都叫我放心去做自己鍾意嘅嘢，都希望自己嘅成就係自己努力得返嚟嘅。」所以，就算屋企有樓，胡鴻鈞不欲靠父幹，希望第一棟樓，是100％用自己賺來的錢買。對他來說，事業可能是無止境，沒有刻意訂下任何目標，總之無愧於心，做到自己、家人的驕傲，就足夠了。