Supper Moment 6月開騷 回應「搖滾叛徒」指控:唔啱口味有冇罪

Supper Moment 6月開騷 回應「搖滾叛徒」指控:唔啱口味有冇罪

撰文:劉傳謙
出版:更新:

樂隊Supper Moment將在6月26至27日,於九展Star Hall舉行《Supper Moment一直相信演唱會》,紀念成軍15周年,門票將在5月31日早上10時起於快達票公開發售。說到今次未有決定再度進軍紅館,主音Sunny表示概念源於成軍以來首個大型個唱:「數下數下Supper係成立咗15年,第一次大型啲嘅演唱會《再次心跳》就係喺九展搞,咁就啱啦,15周年,咪喺九展再搞過,我哋一直都好鍾意呢個場。」

Supper Moment將在6月26-27日,於九展Star Hall舉行《Supper Moment一直相信演唱會》,紀念成軍15周年。

然而,外界對Supper Moment的追捧程度不如以往,尤其當四子為撐89歲前輩胡楓(修哥)開紅館騷,不但答應做表演嘉賓,更陪修哥上TVB綜藝節目《開心大綜藝》合唱《舊歡如夢》,隨即成為網民發洩笑柄,成為他們口中的「搖滾叛徒」。正值開騷宣傳之際,四子決定透過影片逐點回應外界指控,向歌迷和網民交代。

Supper Moment上《開心大綜藝》,與修哥合唱《舊歡如夢》,隨即被網民指責,成為他們口中的「搖滾叛徒」。(節目截圖)

影片開始,看到四子去了圍桌而坐,劈頭一句就以叮噹卡通式嘻笑怒罵,笑指:「真係好嬲,可惡呀,點解要話修哥!要話我哋呀!」Sunny和結他手阿雞更以黑色幽默回應:「食飯啦,有飯好食啦!啲飯仲暖,定人情冷暖呀?」鼓手阿達更搞笑拿起飯碗問隊友:「呢啲唔係電視飯呀?(暗指電視台道具)」引來隊友笑到差點噴飯。

Supper Moment食住飯回應網民指控,大玩黑色幽默

講完笑,四人回歸正經,談起坊間除攻擊Supper Moment外,更連已離世的經理人Gary(陳至仁)都指責,他們直言無法繼續容忍:「鬧我地冇所謂,講Gary同埋屋企人真心唔可以容忍,做人要有同理心,唔好鬧Gary,我哋對唔對得住Gary,有好多嘢我哋自己知,冇需要話比人知。」Sunny補充指 :「我覺得我哋一直係用時間去証明一切,當我哋初出道,我哋去跳彈床表演,當時都冇人明,為乜有捷徑唔行,係要行咁多艱難嘅路,我哋一直努力用時間去証明自己,我哋做嘅嘢,都可以對自己交待,我覺得呢個緊要過同人交待。如果連自己都交待唔到,點同人交待?」

Sunny指無法接受網民指責Gary和家人。

影片中,Supper Moment講到「初心」,外間除指責他們對不起 Gary,亦有負代表作《無盡》,更指樂隊是「搖滾叛徒」。低音結他手CK說 :「搖滾叛徒呢個名,好耐冇聽人用過。搖滾精神係乜?係反叛?係一定要反一啲制度?其實鬧我哋搖滾叛徒係另一種稱讚,係好事!」Sunny即妙語連珠補上 :「講到我哋似乎連搖滾都背叛埋,咁真係冇人夠我哋搖滾啦!」CK又笑說:「係喎你(Sunny)又行得最前啦!」

CK笑看「搖滾叛徒」指控。

說到有口痕網友鬧他們默不作聲是「潛水」,四子在影片中自言很蠢,不懂透過社交媒體來經營「形象」。事實上,他們在19年遠赴美國錄製新碟,其後又去了加拿大、日本等地出騷,又在台灣宣傳國語新歌拍MV,期間也不時返回新蒲崗錄音室做音樂,以及遊走香港各地方。CK坦言:「真心講,明就明,雖然呢句『明就明』好廢,但係做音樂唔係大家諗咁短時間,花咗好多時間做咗一隻新碟出嚟,啲人就話你新碟不貼社會議題。」Sunny也有感而發地指:「但係如果啲野真係唔啱大家議題,唔啱大家口味,音樂有冇罪?冇罪㗎,我都有自由做自己想做音樂㗎。」阿達就插嘴調解隊友心情 :「其實有聽同冇聽係睇得出,邊啲係樂評,邊啲係社評,我覺得大家應該分開。」言下之意,他指把社評連結音樂,這樣對任何音樂人也不公平。

阿達:「邊啲係樂評,邊啲係社評,我覺得大家應該分開。」

Sunny趁機帶出有人留言鬧他們「搵人仔」話題,阿雞搶答 :「其實呢D係舊聞啦,我哋《世界變了樣演唱會》已經開始走世界巡演,內地都有演出,唔係今時今日事,當年大家又冇唔高興?」CK笑道:「啲人依家話我哋剩係搵人仔呀,港紙我都想搵呀,加紙美金日元都想搵,又話我哋搵人仔去美國錄音洗咗啲人仔,咦!咁我都好似幾幫得下手!」

阿雞點出2019年除了內地演出外,其餘大部份時間都在美國、日本、台灣、西班牙等其他地方。

不過Sunny回應時就收起笑臉:「大家可能唔記得咗做音樂真係要錢,做每張專輯,演唱會制作,都好需要錢upgrade, 又令我諗起,以前啲人價值觀唔知點解,覺得一隊樂隊有商業價值,又會標籤咗佢哋係搖滾叛徒。但冇錢點錄音?人往往就係困喺自己價值觀,但有冇諗過,啲標籤未必係真!尤其呢兩年,我體會更深玩音樂條路唔易行,正如我我哋《無盡》嘅歌詞一樣,去到某階段就有唔同標籤,「誰又能能鑑定你的醜惡與美好?」我覺得歌詞一早寫晒出嚟,非常之中。」

Sunny:「大家可能唔記得咗做音樂真係要錢。」