在社交圈打滾二十年，來到專欄的最後一期，我特地找來在圈中首批認識的朋友胡敏珊（Christy），細說當年。曾創立名錶品牌代理公司Charmonde、有「鐘錶界美女」之稱的她，早年經歷喪母之痛，四年前結束公司業務後，便淡出社交圈，走訪世界各地靈修，尋求真正快樂。

信奉密宗多年的她，近年終於強勢回歸，不但代理Li-ZEY牙膏品牌，更大搞Visoanska美容護膚生意，走出人生低潮。

「人生總會有高高低低，失敗當攞個經驗，經驗愈多，人生智慧就愈高。學佛靈修令我改變好多，識得感恩同知足，唔再只係諗唔開心嘅嘢。我選擇接受人生嘅不如意，因為無論你有錢定無錢都好，講到尾，都係想追求開心啫！」

投資過百萬大搞美容生意的她，直言不抗拒微整形：「 愛美係人嘅天性，我認為臉部做小小修飾去令自己增加自信心，我覺得無乜問題，我好滿意

失勢遭冷眼

由當年的「維他奶少女」到「鐘錶界美女」，胡敏珊成功由模特兒轉型做商界女強人，〇三年更創立名錶品牌代理公司Charmonde，掌管過億生意，事業一直順風順水，誰知公司四年前突然結業，自始她便鮮有露面，胡敏珊直言，因錯失良機，引致結業收場。

「做生意係要講運，你唔好運嘅時候，有十條好路俾你揀，偏偏都會揀咗條錯路。有人叫我上市我唔做，有上市公司收購，我又唔想，喺啱嘅時機無做一個啱嘅選擇，已經做唔掂；後來唔係好賺錢，又遇到好多問題，俾人呃得錢多。

「試過喺大陸，有人落咗八位數字嘅貨最後無攞到，代理商又話因為同我溝通唔到，突然要攞番個代理權，有好多唔開心嘅嘢，我覺得好攰，做人點解要成日做呢？日日要去應酬，又要做咁多訪問，唔啱咪唔好做囉！」

生意失敗，可以東山再起，但在胡敏珊失意時，卻體會到人情冷暖。

「呢個世界就係咁，有句說話叫『貧居鬧市無人問，富在深山有遠親』，有錢時，你喺深山都有人理；無錢時，你去到邊都無人理。呢個圈就係咁，你有錢時去event，個個都行埋嚟識你，如果你無錢，又發生咗啲咩是非，再聽埋第三者講嘅嘢，個個都避開你。我o依家已經無乜感覺，做唔做到朋友，睇緣分喇！」

她去年到尼泊爾靈修五日：「查番啲日子，嗰日餵雀會有好大福報，所以我特登去咗廟外餵雀。」

她早前為法國護膚品牌Visoanska舉辦發布會，獲多位好友如張學潤、莊思敏、余安安、黃百鳴及肥媽等人到場支持。