政情：預坐好耐？ 胡志偉擬鐵窗完成學位
前議員胡志偉早前因涉違反《港區國安法》被捕，其後更被揭發冇遵守法庭指示交出旅遊證件，被指違反保釋條件，依家喺荔枝角收押所還押。前議員邵家臻同莫乃光尋日去探胡志偉，隨後指胡正計劃修讀正規課程，希望可以完成學位。
單獨囚禁 大把時間睇書
根據邵家臻Facebook，指胡志偉至今已還押兩個月，已算係適應監房生活。佢話胡依家係單獨囚禁，每日都有好多時間睇書，甚至要慢條斯理咁讀，驚一下子讀晒6本書喎。按懲教署規定，親友可為還押人士提供每月6本書籍，但宗教書籍則數量不限。
至於讀書方面，邵家臻就話，胡志偉希望喺在囚期間完成一啲學位，依家有興趣讀嘅係關於「公共財政」嘅專題。話時話，一般讀一個學位都數以年計，依家胡志偉話想完成一啲學位，莫非佢係預咗自己要坐好耐監？