李卓人「截胡」　工聯會㷫到爆

碼頭工潮搞咗十幾日，雙方未埋牙講數，亦冇退讓迹象，雖然大家都捱到傷晒，但睇嚟場仗仲有排打。兩個外判商周一首次現身接受本刊訪問，表白佢哋嘅苦處，並表示「有得傾」，似乎都想坐低對話解開死結（詳見今期「頭條新聞」）。

今次事件背後，其實係職工盟同工聯會嘅一場暗戰，由於李卓人突然出手「截胡」，搞寸咗成個牌局，更令對方成為「醜人」，而自己就在競賽中佔盡上風，以後就算工潮平息，雙方嘅敵對關係必進一步激化。

工聯會一位核心人士同本刊講，工聯會嘅屬會早就同部分資方商討工人加薪，叫價一至二成，後來資方還價百分之五，工會攞住個數返去諮詢工友，準備再開個價，但有部分人唔滿意，走去搵職工盟，李卓人就二話不說舉起支旗搞罷工，更欲奪取加薪談判權，搞到件事硬晒軚，好難收科。

碼頭工潮背後係兩大勢力一場暗戰，李卓人中途殺出截胡，搶埋工潮領導權，工聯會慘食白果，仲被指潛水，班大佬㷫到爆，惟有靜觀其變，等機會再出擊。

呢位人士指，工聯會一向策略係先開高叫價，再同資方斟數，彼此留有一啲餘地，避免談判陷入死局冇彎轉，然後逐步向資方施壓，最後對手好有機會讓步，唔使搞到罷工兩敗俱傷。但今次職工盟一入場就玩罷工，令資方更難妥協。不過有罷工工人就講咗另一版本，話工人一早搵工聯會幫手，但對方溫溫吞吞，迫不得已至搵職工盟幫手，而發動罷工亦係大家同意。

無論點講，工聯會班大佬以至前線幹部對工潮被騎劫，都極唔高興，最慘係畀職工盟搶咗支旗，自己則被指潛水隱形，認真谷氣，但事件發展到呢個階段，介入反而幫職工盟抬轎，惟有低調出手，一方面為仍開工嘅工友爭取權益，另一方面靜觀其變，睇住個亂局點收科，到適當時間就出嚟做番場好戲。

公民黨阿姐余若薇周日上街支持工人罷工，但事發後該黨一直冇高調介入，唔想去到盡。

至於職工盟方面，知情人士話李卓人都有啲心急，雖然手上揸住三百幾萬支援款項，仍可撐一段時間，但如果戰情冇突破，罷工工友情緒必會低落，士氣好難維持，打仗要一鼓作氣，一洩氣就弊。而且職工盟到現時仍然係工潮大旗手，其他政黨仲未介入，如果可以成功爭取到加薪，即使冇百分之二十咁多，都算勝利，職工盟就可以「獨贏」，所以李卓人都想速戰速決。

知情人士指，泛民政黨如公民黨、民主黨、人民力量等，周日遊行都有現身，因為唔想被公眾覺得縮埋，但班阿哥阿姐（除咗長毛）一直冇高調出嚟聲援罷工，亦冇大舉動員去碼頭參與行動，顯示支持有限度，唔想去到盡，李卓人評估過形勢，知道工潮好難發得更大，係時候見好即收。