首先當然係要揀返架自己鍾意既車先! 最多車盤應該就係2xcar.com個網幾方便, 可以比你filter哂牌子, 年份, 價錢, cc等
睇到岩心水嘅車盤, 可以直接打比車主約睇車, 好多時啲車盤係車行放, 係的話就要比較小心, 事關車行良莠不齊, 唔好比人三言兩語氹到。。
好啦, 見到架車, 先簡單睇下車身, 有無啲地方油特別唔同, 有就可能係撞完噴返, 睇下車尾箱同頭琴有無異常空隙。無問題就問車主可否去自己相熟車房check車, 包括睇行車電腦, 上架睇大陣, engine有無漏油, 迫力等等好幾樣野。(都有人推介用香x驗車, 一千蚊一次, 佢既人會直接去你指定地方驗車, 仲有個詳細報告。。 ) 仲有最好問下車主係水貨定行貨(牌薄上原產地一目了然), 問下佢可否比到維修紀錄, 大概知道架車之前有過咩問題同幾時換過啲咩消耗品。
都無大問題又岩心水, 可以傾下價, 其實上check車前你都可以先還個價, check 完之再睇下有無儀價空間。
如果傾得成, 就叫佢比張牌薄副本你去買車保, 可以約佢聽日或後日去運輸署搞轉名。就我既經驗, 到呢刻都無比訂佢, 不過聽講有啲車主會要求你比住啲訂。
講到買保險, 最好係你去睇車前去保險公司quota定價, 睇下佢受唔受你保, 建議係去快x保, 佢地幾快手的。
新牌未過廿五歲你預座底六七八千, 都視乎車齡同cc. 有一樣野要留意, 係個所謂墊底費, 有四個item: 一般意外, 不記名司機, 新牌, 未夠廿五歲。 意思係touch wood你要claim保險, 保險公司會睇返你當時中幾多樣, 一般意外就係人都要, 如果你又新牌但過廿五歲又係記名司機, 就姐係中兩樣。 唔同公司有唔同自付額, 試過有間係30k, 25k, 25k, 25k。如果以我為例新牌又未夠歲, 姐係中三樣, claim前自己先要比80k....之後我揀左另一個10k, 10k, 10k, 10k的, 費用貴幾百蚊到。
成功買到保險, 會得到張cover note, 臨時保險書既紙, 大約交齊文件一至二小時後出到。拎住呢張紙就可以去運輸署搞轉名(閂五點)..車主同你一齊填同一張form, 都係個人資料同架車既資料。拎埋cover note同牌薄正本交去counter, 車輛過戶盛惠一千大元, 比完錢, 就會print一張車主姓名係你嘅紙一大張。而車主數目亦隨之加一, 呢個冧巴亦就係人地講嘅幾多字牌薄。
有人會建議去運輸署check check個詳細車牌紀錄, 睇下有無罰款outstanding諸如此類盛惠45元, 錢唔係問題, 問題係上網申請係需要電子證書。。。!!!! 一時三刻申請個電子證書要去郵局申請又盛, 郵寄申請就要等十日。。真係吹漲。。所以最後我無check到。。
搞掂哂就可以進行車輛移交儀式, 睇過無問題, 一手交錢一手收匙, 就大功告成了!~~~~~~