［考車牌－開場白］
差不多兩個月冇更新，係因為四月屋企人黎左韓國，由計劃行程到實行前後都搞左三四星期。之後因為去完旅行覺得車牌真係好有用，所以終於的起心肝去報學校考車牌，就係咁又忙左三星期，最近終於有得休息下。
其實我家大老爺早就係我十八歲壽辰既時候叫我去考，但當時一來讀緊書（藉口），又考試又做報告忙到爬係度，二來總覺得係香港好難搵到好既師傅。當時係有嘗試過去搵，但因為資料太多睇到我頭暈，而身邊又冇咩朋友考左有經驗可以比意見我，所以就放棄左。之後去英國時，起初都十分鴻宏大志咁寫左個year plan，將考車牌列入榜內，咁英國同香港啲道路設置一樣架嘛。但係…係囉，點解呢，好似又係冇左回事…
終於終於！現在係韓國，一個出名車牌易考到好多外國人都來考車牌既國家，最快三日搞掂（先唔好理安唔安全），真係唔考對唔住自己。Check清楚香港運輸處話外國車牌持有人要係發牌日後係發牌國家居住夠半年先可以將個車牌換做香港車牌，屈指一算，即係我要六月前考成，所以渣渣林四月底跑去報名。
係韓國考主要有兩個好處。１，你想幾時考就幾時考，唔洗好似係香港咁排期排幾個月，肥左又要再排再考。係韓國考車牌分筆試、場內技能試同路試。其中除左筆試一定要去番政府車牌考試場考，其餘都可以揀係自己學院考。筆試係每日都有好多時段比你drop-in考，其實佢都係開部電腦比你姐。而其餘既試就自己同學院book時間，通常又係每日都有得考，因為個考官係學院既人，日日都係度。今日學聽日考又得，後日考又得，肥左既話就三日後開始可以重考。
２，所有學院價錢差不多（約五十萬韓元~HKD 3500?），冇分街師傅定學院師傅，因為只有學院師傅，而且學院內既師傅價錢劃一，分配邊個師傅比你就邊個，冇得揀唔洗煩，當然唔會成日係同一個師傅教啦。所以真係只要簡去屋企附近既駕駛學院就得，岩曬我呢啲選擇困難症患者。如果你好野無學自通的話，可以直接去政府車牌考試場考聽三個試，冇記錯考試費唔超過十萬韓元(HKD~700?)。但我煩啲，想搵間有英文翻譯既，所以去左間又貴又遠既…不過因為唔同學院會有唔同既路線，我間學院又遠又唔近市區所以車少路直算容易考～
