【明報專訊】由團結香港基金成立嘅香港地方志中心（地方志），聯同相關政府部門、綠色組織等，共同策劃一場為大自然打氣嘅活動「美麗香港」，噚日舉行啟動禮。活動先以全民投票嘅「香港自然十景評選」開始，全港市民同遊客都可以網上投票，揀出最具代表嘅「香港自然十景」，地方志會邀請專家學者、名人為十景宣傳同介紹。投咗票嘅人仲可以參加抽獎，有機會贏得雙人來回商務機票、五星級酒店住宿、智能手機等獎品。
地方志與政府策劃 投票有獎抽
另外，由多名學者參與編審嘅《香港志‧自然》將於11月出版，記錄香港人口、自然環境、保育嘅發展歷程，其中《建置與地區概況》 與《人口》已合成一冊喺書展登場。成個活動仲有個「綠色教育」角色，地方志會以「中小學生自然生態學習計劃」同「青年自然生態導賞員計劃」，向全港中小學生、有志投身綠色旅遊行業嘅青年提供有關自然生態嘅教學。
主禮嘅署理特首陳國基話，希望各界合作做好綠色文化傳承者、綠色旅遊推廣者、綠色教育倡導者3個角色，仲話「美麗香港」嘅宣傳片拍得好好，想借用段片推動旅遊𠻹。