黎明 Leon 新歌《一生幸褔》搵嚟恩愛夫妻王丹妮及羅孝勇擔任主角，兩公婆首度合作拍MV，佢哋着婚紗禮服喺廚房及浴室裏，發生連串災難式意外，頓時手忙腳亂，畫面一時搞一時甜蜜。

羅孝勇首度與老婆王丹妮合作拍MV，覺得心情既開心緊張又興奮，王丹妮讚MV內容好貼地，因為佢同老公新婚一年多，有時面對問題點相處、點去解決，整個過程喺MV亦有提及，羅孝勇則認為MV情節較為誇張，王丹妮笑笑口澄清二人平時唔係咁！

王丹妮稱整個拍攝過程好有趣，好好玩，羅孝勇自認比較慢熱，一開始仲要捉摸點樣誇張演繹，當回放片段覺得自己太收歛，應該豁出去做。二人由拍拖到結婚，經歷各種磨合，要攜手走到白頭，夫妻相處之道絕對是一門學問，王丹妮覺得兩公婆嘈交時，首先要討論，無論對與錯也好，之後大家攬一下便冇事，佢話有時要回想返當初為何鍾意對方，欣賞佢啲咩優點，搵番嗰種感覺就可以行更長嘅路，一齊攜手。羅孝勇早前獲澳洲大學取錄，目標5年後成為脊醫，與老婆分隔兩地，受疫情影響，彼此更加珍惜相處時間，相信佢哋應該好少嗌交啦！ 

影圈年度盛事《2024香港電影導演會周年晚宴暨年度頒獎典禮》，3月15號喺尖沙咀一間酒店隆重舉行，現場眾星雲集，好似洪金寶同太太高麗虹、林峯、馮德倫、錢嘉樂、鄧麗欣、周家怡、周麗淇、蔡卓妍、關智斌、陳家樂、王浩然、余香凝、伍詠薇、葉子媚、魏浚笙、廖子妤、王丹妮、劉偉強導演等等。
  
近年受糖尿病困擾嘅洪金寶，之前曾經以輪椅代步，呢日改為撐拐杖，精神奕奕現身。洪金寶指近年日常生活多數是買餸煮飯，已經甚少外出搵朋友聚舊，因為要保持健康飲食習慣，怕自己出到去茶餐廳又會忍唔到口好辛苦，現時每日都會食青瓜、蕃茄充飢，非常健康。亦遵照醫生意見有適量運動，例如行路，不過只可以短程。被問到游乾水(麻雀耍樂)也是運動一種？大哥洪金寶好搞笑話：「以前都會游，但游游吓另外三個死晒，因為我又鬧又啪枱又盛，冇人再肯同我打。」

梁朝偉憑電影《金手指》獲「最佳男主角」，再次封帝嘅偉仔保持平常心，並透露每日都過住慶祝生活，因為生命每日都要珍惜。偉仔稍後將會起程遠赴德國拍戲，喺電影中偉仔會飾演一位腦神經科學家，佢早喺半年前已經開始睇書、搜集資料以及到訪大學認識腦神經科學家取經，為開拍新戲做足準備。至於老婆劉嘉玲會否同行？偉仔則表示未必。

偉仔呢晚都有同影后余香凝合照，更表示有欣賞對方主演嘅電影《白日之下》，大讚電影好睇，特別欣賞姜大衞演技。

余香凝憑主演嘅《白日之下》獲「最佳女主角」首度封后，手持獎項影相期間佢突然忍唔住爆喊：「好多人都唔知道，其實我個樣越淡定係越緊張，但真係好開心，冇諗過今晚會得到呢個獎，見到台下好多熟悉朋友同合作過嘅導演，獎項對我來講義意重大，出到來見到好多睇住我大嘅人，突然好多情緒出嚟。」至於能夠首度同魅力男神兼出爐影帝偉仔集郵，余香凝極度興奮，仲話會將呢張合照曬大放喺獎項側邊留念。

而獲得「最佳新演員」獎嘅謝咏欣則表示好興奮，完全冇預計過自己會得獎，當下最想多謝祝紫嫣導演，以及戲中飾佢爸爸嘅吳慷仁。

近期計劃復出娛樂圈嘅葉子媚相隔30年現身活動，佢仲記得對上一次喺活動上抽到大獎。而佢嘅復出大計正在實行中，透露主要想拍戲，不過歸於平淡生活，作息養生多年，葉子媚坦承要適應生活有啲難度，因為現時若果不用應酬或出街，晚上七點左右就會瞓覺。

另外，近日張達倫喺新戲《出租家人》中飾演一位警察，電影武術指導錢嘉樂就設計咗個驚險動作畀佢，要張達倫飛身撲向架車到，好彩最後都成功挑戰鏡頭，對佢嚟講亦係個大突破。