楊茜堯同羅子溢結婚五年,2020年誕下愛女小珍珠之後,一家三口幸福滿瀉,喺12月15號,驚爆茜堯再誕下兒子,湊成一個「好」字,令唔少人都非常驚喜,事關茜堯呢次懷孕完全冇對外公布,相當低調,喺愛子出世之後,子溢亦喺IG上載左一張BB嘅腳仔相,並表示「多謝大家關心!母子平安,辛苦太太」喺相中隱約可以見到子溢同茜堯嘅幸福笑容,真係隔住個MON都感受到佢地嘅幸福美滿。
睇返今年8月底兩人一齊去主題樂園慶祝生日,POST喺社交網站嘅相片,當時已經懷孕5個月嘅茜堯,只POST出見到上半身嘅相,似乎刻意想遮住孕肚,之後喺兩人結婚五周年嘅紀念日,茜堯亦只POST左一張兩公婆去沙灘玩嘅舊照出黎,當時子溢表示因為冇特別出外慶祝,只係簡單咁喺屋企食蛋糕,所以先會POST舊照代替,子溢更話佢地都有意追多個,估唔到原來茜堯當時已經秘密陀B呀!