由廖晉碩監製、林麗媚擔任編審的《再見‧枕邊人》,播出15集後keep住有不少角色彈出,其中一位引爆焦點的,非羅天宇飾演的「流氓律師」金長勝莫屬。
羅天宇近日接連在《再見‧枕邊人》及《婚後事》均有突破性演出,並不約而同成為兩劇的「晒肌擔當」,在《婚後事》中天宇只披著廁紙在沙灘上「幸福奔走」成為網民熱捧爆笑場口,而天宇事後在社交網上載的花絮照,更將健碩腹肌展露無遺;而在《再見‧枕邊人》中,天宇則憑一雙結實又粗線條的麒麟臂贏盡熱話,難怪獲封「男版最強Body」。(原裝女版為劉穎璇)
除了大方晒肌,天宇兩線劇的演出亦明顯比之前open得多,喜劇節奏明顯Level Up,因而贏盡好評:「長勝呢個角色好討好」、「兩個角色都好入屋」、「佢嗰對麒麟臂冇得輸」。由於天宇出名是怕醜仔,故此要他搞笑絕對是高難度動作。據知天宇在《再見》之所以如此揮灑自如,全靠之前拍攝《婚後事》時開了竅。天宇說:「《婚後事》有某啲集數我要負責搞笑,因為監製覺得成套劇相對沉重,尤其是開頭嘅劇集,所以喺我出場嘅第八集,監製就想我同敏奕呢條線咧可以帶到輕鬆啲嘅戲畀觀眾,等佢哋可以抖吓氣。但啱啱開始時劇組覺得我演得唔夠自然,就叫我試吓好大聲咁講一、兩句粗口,初初我都仲係有啲尷尬,但講咗幾次之後,我就突然好似開咗竅咁,之後就覺得處理呢類場口輕鬆咗。」天宇又自揭自少便喜歡周星馳,故對於能夠轉型搞笑很開心:「由細到大都冇諗過自己可以(搞笑),因為我本身唔係一個搞笑或者超級幽默嘅人,所以當我遇到呢啲情節都好想演好佢。」
問到腹肌與手臂線條如此完美,天宇笑言由於自己很喜歡食嘢,故此不用拍劇時會盡情吃好西,但期間會keep住健身:「好多時都係開劇前一邊食一邊健身,因為通常開工後會冇時間,同埋要食足夠嘅蛋白質,咁先增生到肌肉。我通常係開劇之前2個月左右開始慢慢減食量,然後再爭取時間Keep住健身去操弗。如果有時知道得番一個月時間就要除衫嘅,就會嘗試啲extreme啲方法去減,例如斷食咁,我最誇張試過24小時唔食嘢啫。」