現今香港樓價高企,唔少人負擔唔起私樓,轉而購買政府資助房屋「上車」。但係,啲計劃五花八門,又「白居二」又「綠置居」咁,即係點呀??
今次Fact Fact就嚟簡單整理一下~
首先,需要知道,喺政府資助房屋嘅世界裏面,人可以分為三種:
- 〔綠表人〕 公屋住戶以及持有「綠表資格證明書」嘅準公屋住戶;
- 〔白表人〕 任何合乎居屋入息資產上限嘅人;同
- 〔無表人〕 所有超過咗居屋入息資產上限嘅人。
明白咗呢個概念之後,再嚟睇下近年主要嘅資助出售房屋計劃:
- 〔居屋〕 全名「居者有其屋計劃」,相信大家都耳熟能詳。綠、白表人都可以申請呢種房屋,售價會按市價每年浮動,最近就定喺市價五九折。
- 〔綠置居〕 全名「綠表置居計劃」,係專賣畀綠表人嘅房屋。售價上,會比同年銷售嘅居屋再平多市價一折,例如今年就係四九折。
- 〔白居二〕 全名「白表居屋第二市場計劃」。一般而言,居屋轉讓時業主需要先「補地價」,再用市價出售;不過,白表人可以申請「白居二」(2019年有3,000個配額),咁就可以免補地價購入二手居屋單位,除咗申請新居屋以外多一個價錢相宜嘅選擇。
- 〔首置盤〕 全名「港人首次置業先導計劃」,政府喺2017年提出嘅新計劃,畀入息超出居屋門檻最多三成,而又從未置業嘅無表人購買。價錢上,會比居屋貴返一、兩折:上期居屋定價水平係市價五二折,於是今年年頭推出嘅第一個首置盤「煥然懿居」,就將售價定為市值嘅六二折。
隨住樓價上升,越來越多人負擔唔起私樓。提供多啲唔同價格水平嘅住屋選擇,由原本「公屋 » 居屋 » 私樓」變成「公屋 » 綠置居 » 白居二/居屋 » 首置盤 » 私樓」,就有更多「夾心」階層都可以搵到自己嘅安樂窩。
不過羊毛出在羊身上,房屋起在土地上,要起多啲樓滿足唔同房屋需求,首先都要有多啲地,無地講咩都係假!