讀書成績好，入了科大讀物理，卻去了當航空公司訂位部職員仔；報名選港姐，進了決賽，卒之獎項落空；入了無綫，當藝員日做夜做，觀眾可能只記得《同事三分親》的Doris，傳媒亦不厭其煩呼喚她「御用大茄」的朵。

多得《心戰》，應該更多人知道了，她是簡慕華。

「咩都冇所謂嘅，總之大家舒服就得嘞，唔會好執着啲嘢，你唔犯人，人哋唔犯你咁就最為之好囉！依家年紀大咗，注重健康多咗，唔係咁care名利嗰啲嘢。健康、和諧最緊要呀！社會和諧啲，地球又環保啲！Peace！咩都peace！個人會開心啲！」

像簡慕華般，可以在這一齣劇中玩幾集，亦可以在另一齣劇由頭做到尾。茄喱啡、第二主角、又再茄喱啡的這種日常式高低起伏，絕非一般無綫花旦能承受。

「不嬲都唔覺得自己係靚嗰啲，又唔係核突囉。所以啲人話：『你行性格啦，你唔好學人哋行靚喇！』所以我做戲揀性格角色，唔係靚女嗰啲，喺呢一行好似可以會耐啲。」

爭取了，努力過，自然無憾。是榮是福，聽天由命。

微妙的線

要介定簡慕華是幾多線演員，實在難。

「有啲劇得三集嘅，唔叫得係咩線啦！有啲劇，基本上個女主角之後就係你嘞，但你又可唔可以有資格叫自己做二線呢？我又唔敢講。我又唔會畀條線自己，呢啲好虛無飄渺啫。

「我又唔係好勁嗰啲、乜線物線嗰啲。人哋畀得咁嘅名你（御用大茄）一定有原因，因為你未係邊個囉。要再努力啲，人哋再唔用你呢個朵，直接稱呼你做簡慕華。」

三百幾集《同事三分親》，像高速煲般煲熟了簡慕華的演技，在拍檔黎耀祥教路下，她才知何謂揣摩角色。為拍《心戰》，莎朗史東的兩集《本能》成了她的教科書。

「第一集佢係青春美少女，唔使點樣做已經好靚，身材又fit，着衫又唔戴bra，好吸引。第二集嘅佢雖然差好遠，嗰個年紀都拍到咁，唔係差嘅，我都唔係youngo架！

「我以前好保守o架，其實好睇我信唔信任個導演同監製，如果我信任得過嘅，我係可以更大尺度，但係未試過拍電影，想像唔到可以去到幾盡。三級演出？如果真係角色幫到我會OKo架，我以前未必得，依家覺得咩都要試，底線想要幾底就幾底。」

在拍竣不久的《金枝慾孽貳》中，她透露「戲份超多」，會不停在鄧萃雯飾演的如妃身邊出現，到時，她應該夠資格站在二線吧。

「我覺得我自己轉捩點真係《同事三分親》，佢畀到好多嘢我！錢吖！日日開工！最多人工就係拍處境劇喇。」

簡慕華在港姐決賽獎項捧蛋，當該屆三甲已回歸凡人生活時，曾是曾志偉愛將，與「阿夢」岑寶兒齊名的簡慕華，現在的發展也算頗有交代。

獨女

簡慕華不是無綫親生女，訪問當天亦是準時單刀赴會，樂得自在。

「以前細個畀屋企照顧慣，到我出嚟做呢份工都唔容易嘅，情緒都好飄忽。依家學識點樣獨處先，點樣唔好咁倚賴先，依家自己搬咗出嚟住，仲係學緊點樣single life。我上咗去大陸住一個月（拍攝《金枝慾孽貳》），都要求自己一間房，寧願畀多啲錢都唔想同人share。我自己鍾意除晒衫喺間房行嚟行去都得係咪先？Free啲囉！

「我可以好獨立o架！講真，人去到尾，就算畀你有個伴，有一日唔係佢行先就你行先o架啦。」

簡慕華雙親已屆退休年齡，然而退而不休，幹着看舖、收銀的輕鬆工作。

「唔係錢嘅問題，佢哋鍾意有目標，唔好日日喺屋企唔知做咩咁。自從搬咗出嚟之後反而珍惜每次見佢哋嘅時間，仲錫大家多啲、仲close啲，以前一齊住嗰時硬係成日唔想返屋企嘅。

「細佬細我三年，教書嘅。佢係天秤座，佢都係我好好嘅一個朋友，會講好多嘢畀我聽。如果嚟緊有啲咩劇我要演咩角色，佢會叫我睇啲咩戲咁，幫到我好多。佢好有自己嘅一套可以講到畀我聽，變咗我諗嘢又可以多一條路向。」

早前到橫店拍攝《金枝慾孽貳》。「我鍾意喺內地拍嘢，每日開一組，頂龍咪十一二個鐘，但香港唔係，冇時間休息回唔到氣。喺內地可以好專心，背稿都快啲。」

真命天子

本人也是天秤座，自覺說話亦有自己一套，本人有興趣自薦成為簡小姐朋友之一……需否戚其義先生首肯？

「同佢（戚其義）係好朋友啦，仲係好朋友啦，我覺得……呀……我又唔想評論咁多感情嘅嘢，因為我係工作行先嘅，好現實嘅，一定要有麵包先，愛情係甜品、bonus嚟。有咪開心囉！開心就好咋喎，如果有愛情，畀到你唔開心，仲多煩惱、仲多壓力都唔係好事。依家既然我工作未談得上一回咩事，我冇資格去渴求任何感情。嗰啲緋聞嘅嘢係娛樂囉，得啖笑又好，第時如果真係有咩發展先講都未遲囉。

「我又唔心急結婚喎，因為我覺得緣份嘅嘢好難講，我又唔係有咩信仰，又唔係咩教徒，我覺得個天係要畀你嘅時候就會畀你o架喇，依家譬如係冇嘅，我咪專心工作囉，到有個真命天子有一日敲你門嘅咁咪結婚囉，冇都唔緊要。」

簡慕華是二千年港姐入圍佳麗，當年十分大方地與男友合照，現在多謝追蹤組同事才有她和「好朋友」戚其義合照。

提攜簡慕華拍第一齣劇集的就是戚其義，眾所皆知他的作品風格也有別一般無綫格局。這位戚其義愛將在港出生、長大、受教育，喜歡這片土地。

「香港對於我嚟講係真係一個家鄉，以前我唔係咁覺得嘅，自從去完第度生活，我真係覺得香港係畀到我安心嘅地方，自己朋友、親戚都喺晒度，自己又喺度大，愈來愈珍惜呢個地方，都唔想佢有咩好大轉變。

「我本身係同政治絕咗緣，我又唔係有呢方面背景，我係讀理科嘅，我本身冇乜留意。二來就算如果人哋覺得套劇可以套落去咩政治度，我都當番係套劇嚟睇。我覺得《天與地》係講rock友多啲，冇政治色彩咁多。我又唔識吖，唔會睇咗套劇就會令我留意政治多啲，我政治冷感o架！」

順帶一提，簡慕華這天的私服，是白色和灰色。

This city is dying？

三十五歲的簡慕華，經歷過英國統治，卻沒有像看過《天與地》的觀眾般多關心了政治。

「我覺得由一個殖民地轉到由中國統治番，點都有一日要行中國個制度。你話同化啫，但中國都進步緊，咁咪慢慢融合囉，要時間囉，但唔係呢十年八年，可能到我睇到好嘅嗰年已經係老嘅時候，但都偏向positive。我都唔想中國衰，更加唔會想香港衰，就算依家好多noise，我都覺得好嘅，佢只要有一日畀你存在noise，又有一班人支持緊政府，兩樣都有就OK。外國全部講民主好自由，都唔一定好得晒。

「潛意識好緊要o架，如果全部人都向好嗰方面，我覺得樣樣嘢係好o架，我都prefer啲人咁樣諗，多過dying嗰樣嘢。總之都係peace啦！和平呀！趨向peace！（擺出V字手勢）

「所以呢個city唔係dying，係……轉緊型！」

政治冷感，也尚且搞得出如此有道理的爛gag。抗爭，也絕非講玩。然而不論你穿何種顏色衣裝，你的life依然must go on。