【私人會所】交易唔只金錢同肉體 編劇筆華棋：有一種爾虞我詐
《私人會所》已經上映了一個星期有多，未知大家又看了沒有呢？不少影評家都說這部電影並不像一般的夜場電影，所謂的色情鏡頭也並不是特別露骨，著重的其實是當中每個角色背後的角力。編劇筆華棋上回在專訪中說到，其實有不少男士去到私人會所都會沉船，今集筆仔也主要講述沉船，不過姓別轉到女士身上。
「有好多女仔都會沉船，其實都有唔少例子，喺拍呢套戲的中後期，我訪問過香港夜總會之父（即鄧崇光），佢都講話當佢以前夜總會仲係好興盛嘅時候，佢仲喺去緊呢啲場所嗰陣，呢個場地就係俾呢啲人（夜場囡囡）發揮你哋自己嘅本錢，嚟得呢度就係因為有問題要解決，千其唔好覺得呢件事係啱定唔啱，無貴賤之分，要把握你自己嘅時間，搵夠就走。不過離開咗都好多時會再返嚟，因為啲錢搵得太易喇，底薪三萬，未計tips未計送禮，出面邊度搵？而家一個外國讀完書返嚟嘅打工仔，唔計專業人士，可能幾年都係得兩萬幾蚊。一個女仔，返去（私人會所）坐吓，唱吓歌飲吓酒，個客睇上你隨時可能租埋樓俾你住，又會介紹其他客俾你識，錢係咪萬惡之首我唔知喇，但真係好吸引架嘛。結果咪不斷沉淪囉，不過佢哋唔係沉淪俾客人，而係沉俾啲錢之嘛。」的確，在現今的香港地愈來愈現實，在一些人心目中，錢就是一切，那究竟為錢去做一些不犯法但犯了所謂的道德規限又是對是錯呢？
除了錢，當然也會有女仔沉船在客人身上，其實戲中也有這樣的情節，這其實不只戲中的角色，也是影射一個現象，筆仔說：「啲女仔可能見到某個人，之後收工就會上網起佢底，因為返工嗰陣唔用得電話，起完佢係邊個個仔之後就會覺得老豆都咁富有，個仔都唔會差喇。但原來發覺個客嚟親都係朋友俾錢，出親街又係無錢嘅，食啲好普通嘅嘢，又或者去啲自己唔使俾錢，有老豆照住嘅地方，車又係屋企司機，呢啲就係所謂嘅失匙夾萬。咁啲女仔就怕會開始發覺我係鍾意呢個人呀，定係啲錢呢？但個男仔又會諗乜你唔係鍾意我個人咩？你鍾意我啲錢架渣？其實唔只私人會所，你去啲clubbing見到有人帶晒名錶，有晒車匙，十幾支香檳放喺度，睇落都好光鮮，啲女都沉架。」
監製雄叔叔伍健雄曾經說過，去私人會所的人未必只是尋求一夜快感，他們想找的其實是初戀的感覺。咦？跟《喜劇之王》在夜總會大叫我要初戀咁相似嘅？「其實絕對係，但分兩隻嘅。有一種係一批上咗年紀嘅人，講真除咗做嘢之外，基本上都唔會喺出面識到新嘅人，其實佢哋就會係要初戀嗰陣。但有一種就好似我識嘅一啲朋友，佢哋可能好細個，讀緊書嘅時候就出嚟玩，甚至係老豆帶落去夜場玩。玩吓玩吓玩咗幾年，唔好太誇張，一星期玩三晚，一年玩足百幾日，玩咗三年乜都厭，香檳依然都係插煙花，唔會變火槍架嘛。」
「咁佢哋好快就會躍進咗去私人會所，佢哋一路玩私人會所，一路都可以繼續出去媾女，咁呢批咪唔係追求初戀。但公司嗰啲大老闆、股票莊家等等，嗰啲佢哋唔會再有時間同你慢慢媾女，唔會再用sms同你講bb得唔得閒，佢哋要你嚟serve我，啲女仔都好識玩，欲拒還迎，其實幾百年來都係玩呢味架喇。聽啲女仔講，佢哋話呢批人好得意，估唔到一個咁有錢嘅人，成日上報紙，屋企又有晒老婆仔女，但竟然因為嚟咗會所玩幾十次，之後拖到人個女仔手而振地高呼，嗰吓真係好《喜劇之王》。我哋套電影限於時間，好多位都唔可以咁細節表達出嚟，可能我寫咗但cut咗，所以我都希望喺呢個訪問俾人知道吓呢啲故事。」
當然筆仔有例子喇，他說：「我有個朋友，屋企好有錢，兩三架法拉利，不過就有架好普通嘅車用嚟代步。咁有一次佢喺夜場同個女仔傾，個女仔好直接就問佢住邊揸咩車，我朋友就答話自己揸Honda，個女仔即刻就轉身走咗，係即刻喎，連扮玩電話都無扮，咁就走咗喇。我覺得無論係套戲又好，我自己寫嘅書又好，個世界觀其實都唔係咁離地，其實你身邊總會有呢啲例子，可能你身邊都有人做私人會所。我都試過幾次有朋友話某個女仔都有喺入面做，但去到又要扮唔識，你諗吓幾尷尬，呢啲情況都聽唔少。」未必所有女士都會向錢看，但當你真的遇上這種人，你又會否心存鄙視？但每人背後都會有一個故事，如果你對她有夠深入的了解，你又會否依然保持同一種想法呢？
雖然套戲開宗明義叫《私人會所》，但戲中並不只夜場、男女關係和情慾，反而有很多關於金融的情節在裡面，筆仔表示：「我哋講緊嗰間私人會所，咁啱係好多做股票嘅人，所謂做股票嘅人有好多種，講緊嘅係一啲細價股嘅莊家，呢啲題目都係好引人入勝。我哋另一個編劇周顯就好熟呢方面嘅嘢，所以寫嘅都好真實。大家都可能對呢啲莊家唔太熟識，因為呢啲真係小圈子，我閒時買隻創業版，我唔知背後係咩人嚟架喎，我只可以睇佢肯公開嘅消息，咁究竟邊個係背後操縱呢？有個真人真事，就係講呢班莊家去到會所點樣去放料，因為佢哋炒股嗰陣，都需要好多平民去買，你以為好多人幫佢哋做打手，其實佢都會自己落手落腳。例如佢去到會所，佢唔會第一時間就sell你，佢亦唔會講自己做乜，只會繼續傾生意。咁嗰班坐枱嘅女仔都有腦架嘛，聽咁多，同埋佢哋自己都會買股票，可能佢見到呢個熟客成日講，但其實佢哋真係乜都唔識，個女仔就會開始問。多數啲莊家一開頭都會耍走你，之後就會好婉轉咁漏一個號碼俾你，第一次買，升！第二次，繼續升！第三次，仲升緊！跟住去到第四次一鑊輸晒，輸埋你屋企人嗰啲。點解《私人會所》要加埋金融，如果剩係講夜場其實大把題材講過，但係從來無人講過私人會所發生好多私人交易，唔單止係金錢同埋肉體，而係講緊我叫你買隻股票，你贏咗之後倒輸返俾我嘅嗰種爾虞我詐。」
想知筆華棋對香港夜場的看法？留意下集。
場地提供： Mustard Seed