神秘顧客親自剖白 工作到底有幾神秘？

做前線服務性行業，唔怕狼捩客，最怕神秘顧客。點解？因為神秘顧客的評分有可能影響自己的Bonus，始終錢銀要緊。小薯於大學時期為賺外快而四出兼職，亦有做過兼職神秘顧客，周圍飲飲食食買嘢，最啱鍾意周圍去玩嘅後生仔。

不過，神秘顧客不只好玩，但亦有難做的時候。由於有不少朋友很好奇神秘顧客的工作，小薯決定落筆剖析神秘顧客一職。

神秘顧客有咩做？

不少大公司為監察前線員工服務水準，會委託神秘顧客測試前線員工，而神秘顧客需要完成特定要求，再遞交報告評價當日的測試情況。

最常到訪零售商店、百貨公司購物，或者到餐廳食肆食飯，偶爾會出席招聘展覽等event充撐場面(試過有speed dating搵神秘顧客出席)，致電到客戶服務熱線測試接線生的服務。

【延伸閱讀】淫審處審裁委員憶首次工作感受：畫面幾核突

神秘顧客工作內容

到底神秘顧客有幾神秘？只係飲飲食食Shopping就可以？

絕對不是，神秘顧客的工作難度不是看起來般輕鬆。剛入職時要先接受訓練，包括講解測試內容、撰寫報告、出Job流程、應對方法等，才正式成為神秘顧客。

一般出Job前都會再有Briefing，神秘顧客最重要是按工作內容及要求，預先準備一個劇本，因為真正開工時一定要一take過無得NG。

小薯本身是購物不愛問長問短、講價的人，但當出Job時要放膽去多加追問、討價還價，甚至有時要故意刁難職員以測試他們的反應及態度，簡直是演技大考驗。

第一次出Job的神秘顧客，很多時會緊張而忘記測試內容及劇本，因為上場時手中絕不能拿著報告評核表，所以準備要充足。

不同公司對測試內容有不同要求，有部分會要求測試特定的職員，比較麻煩，試過等2個鐘，目標人物才有空可以serve小薯；如果要買名牌房車、珠寶等，更要先做好功課，以免同Sales應對時露出馬腳。

小薯比較Junior，沒有機會挑戰買名車。曾聽聞有同事因事先未記熟資料就出Job買名車，更在職員面前拋書包，令職員起疑，看穿身份。結果要再派員測試，更費時失事。

不過，最基本的條件是一眼關七，從入門口起就要留意所有細節，從貨場是否整齊到職員名牌、外貌特徵通通要記得清楚，因事後需撰寫報告及評分，而且表情眼神問問題要自然，錄音也要小心，否則很容易被Sales看穿身份。

如果於零售店舖工作，需不需要購物則視乎該項工作要求及貨品價錢。如果比較便宜的貨品，例如中價衣物、鞋、手袋、化妝品等，有時會要求神秘顧客購買，其後交回公司再退給客戶，所以一定要保留收據。

但比較貴重的物品，如手機、電腦、名筆等較少會買下來，多數只會向店員查詢資料，當然如果工作特別註明要購買，也需要買下。

而出Job時間由半個鐘到3個鐘不等，視乎測試內容多寡、問幾多問題、有沒有示範試用環節。如果快手，小薯試過一日跑5單Job，由朝去到晚，原來Shopping都唔係咁輕鬆﹗

特別難忘嘅Job

小薯當年Shopping、食飯、出event都試過，但講到最唔想去嘅，非event莫屬。點解？最常接到的event job，都是招聘展，不過往往都是中小型，在商場擺booth的那一種。而當年每次出招聘展，都指定要著full suit，大熱天時著西裝褸、高踭鞋之餘，還要在場內遊盪4小時。

不過，又會有幾多人專程著full suit去商場招聘展？加上在只有20個booth左右的細場不斷行來行去，明眼人一睇就知係神秘顧客，完全唔神秘。

另外，出Speed Dating更難受。小薯有個男性朋友，都係神秘顧客，有一次出job去speed dating，明明無興趣但要連續2小時不斷與同場的女士傾計之餘，更要充大頭鬼以融入當時只有管理層級數的圈子內(而朋友就只係初出茅廬嘅文員小薯，勝在樣子長得夠成熟)。更有女士在speed dating完結後與他交換contact，想保持聯絡，但完全不知道他是「做媒」，只用來充撐場面。

如何入職？

小薯當年(大概6、7年前)是透過朋友介紹入職的，而當年神秘顧客這行業市場比較細，都比較神秘，因此主要都是透過朋友介紹。

不過，現時對神秘顧客的需求愈來愈大，各公司均公開於求職網站聘請人手。於Google search「神秘顧客」，立刻會找到神秘顧客網上申請表，填妥資料及完成測試，等待通知就可以。

人工有幾多？

每次向朋友提起自己曾任神秘顧客，對方很必會問起人工幾多。兼職神秘顧客有點像Freelance，接多少job可自己安排，簡單而言多勞多得。人工視乎自己入職的Agent公司、每份工作的複雜程度及客戶牌子。

神秘顧客可以兼職，自由地接工作，多勞多得，每份工作可賺數百元至數千元不等，如視為全職，月薪有傳約1.2萬元起，表現較好者，更可晉升為營運經理，負責策劃神秘顧客訓練內容，月薪約2萬至2.5萬元。

不過，兼職神秘顧客一般會先獲派一些比較簡單的工作，例如到連鎖餅店買蛋糕、到連鎖鞋店買鞋等。

文章獲膠層膠事授權轉載。

【其他熱話】「神科」畢業後10年人生 其實不過如此

【其他熱話】 打工仔月入2.9萬 妄想買層樓

【其他熱話】廣告公司推1個月「變態」有薪假 老闆：見同事辛苦透支了