石鏡泉 著咗草？

石鏡泉 嘅偉論闖咗大禍後後，同RTHK請假，辭去經濟日報執行董事同研究部主管，依家連專欄都休息埋，但經濟日報表示 石鏡泉專訪稍後登出嚟，同埋佢傳一段片嚟自溫哥華，話just finished joining the group blessings for HK。作為經濟日報前作者，我睇到呢段反而最火滾，石Sir，你條友著咗草？

石鏡泉 突然去溫哥華做乜？

我唔知 石鏡泉 有無揸加拿大護照，或者持有楓葉卡嘅永久居民證件，或者有其他移民簽證，因為香港經濟日報招股書披露佢係持特區護照，但香港成街都係雙重國籍，同埋唔知條友有無因BN(HK)A 1990持有British Citizen，因為好多報館高層都派咗一本BC傍身，所以我十分之懷疑 石鏡泉 表面暫避風頭，但實際上隨時唔返嚟，因為電台節目停咗，又唔駛承擔作為執行董事及研究主管嘅職責，佢經濟上又完全自由，佢要走佬著草易如反掌。

你問點解 石鏡泉 要著草，因為佢犯咗《公安條例》第26條

公眾聚集中倡議使用暴力
任何人如無合法權限而在公眾聚集中發表任何聲明，或其所作出的行為，為意圖煽惑或誘使他人作出以下作為，或為其明知或應該知道相當可能會煽惑或誘使他人作出以下作為者 ——  (由1970年第31號第15條修訂)
(a)殺死任何人或任何類別或群體的人，或傷害他們的身體；
(b)摧毀或破壞任何財產；或
(c)用武力或威嚇手段永久或暫時剝奪他人對任何財產的管有或使用，
即屬犯罪 ——
(i)一經循公訴程序定罪，可處監禁5年；及
(ii)一經循簡易程序定罪，可處第2級罰款及監禁2年

呢條罪唔係老屈戴耀廷用嘅煽惑公眾妨擾，果條係common law留低嘅古老化石有人攞嚟復活，但《公安條例》第26條，一直都存在，本來就係用嚟對付土共果啲煽動他人炸林彬果類言論，而依家成個犯罪行為

1. 撐警集會發表聲明：公眾聚集發表任何聲明 或 明知或應該知道相當可能會煽惑或誘使他人
2. 藤條教仔：傷害他們的身體

簡單嚟講， 石鏡泉 嘅罪行唔會低過被捕果堆打手，點解港府唔拉人，仲俾佢成功去咗溫哥華，大佬，條友喺溫哥華長期唔返嚟都得喎。

甚至我咁講，好似 石鏡泉 呢啲人，未攞過本BNO我係唔信，佢條友renew BNO，然後長留EU或UK，你港府就勞師動眾要引渡條仆街返香港，所以我依家想問， 石鏡泉 喺唔喺香港，如果喺香港唔好夜長夢多，儘快逮捕佢同起訴，其實警方都應該儘快搵何君堯問話。

但我更怕一個情況係，本來 石鏡泉 無咁快想走，反正律政司好大機會唔起訴佢老人家，只不過，由於《公安條例》所屬嘅罪行係可以私人刑事傳票檢控，而周融果日嘅爛騷，有成堆直播片，有人問蘋果攞片檢控都夠玩殘你有突，如果依家啲人籌一筆錢，或David Webb出錢請律師檢控佢，佢都應該十分之大鑊，因為裁判官可以出手令捕拘 石鏡泉 歸案，而警方無得拒絕，因為警方有責任執行法庭傳票，呢個係《警隊條例》指明嘅職責，大家諗吓 石鏡泉 有無理由會著草走佬。

依家我問題十分之簡單， 石鏡泉 係唔係人在香港？如果溫哥華啲讀者，見到 石鏡泉 嘅，敬請報料，謝謝。