【A&M Diary】放假想去轉小旅行？就同A姐去農莊玩吓啦！A姐好開心咁問去3日2夜台中清境農場定4日3夜那須草泥馬牧場？今年雖然帶唔到你去旅行，但其實香港都有唔少觀光農場，今個weekend嘅好去處，我哋就揸車去到大埔嘅蝶豆花園，呢到有唔少打卡影靚相位置，仲有少女們最愛嘅草泥馬，一家大細都好啱玩㗎！
前往方法
1. 乘坐小巴20M（大埔中心開出）/ 小巴 20P（大埔墟開出）
2. 自駕遊：蝶豆花園設有停車場，日泊（10:00-18:00）$60
入場費
蝶豆花園有唔同嘅入場套票同體驗製作班，成人基本入場連設施收費係HK$200，3至12歲小童基本入場連設施收費係HK$150。
蝶豆花園
佔地50萬平方呎，以蝶豆花為主題嘅觀光農場。蝶豆花園因為鄰近鳳園蝴蝶保育區，所以園內經常見到蝴蝶嘅蹤影。
風車花海
作為一個農莊，又點少得花呢？呢度有唔少花田，加上風車做背景，影相好靚㗎！
彩虹蜜蜂箱
農莊內放有唔少彩虹蜜蜂箱，大家可以買啲自家出產嘅蜜糖做手信。
願望島
連接願望島嘅天橋，掛滿蝴蝶祈福牌，色彩繽紛。基本入場套票亦已包括1個蝴蝶祈福牌，你都可以許下願望掛上天橋。
天鵝湖
湖內有錦鋰、鴨等小動物，基本入場套票亦已包括15分鐘天鵝船，亦成就咗我同A姐第一次嘅湖上泛舟。
兒童遊樂場
呢度有唔少設施啱晒小朋友玩，當然唔少得小朋友最鍾意嘅彈彈床啦！小朋友基本入場套票已包括任玩彈彈床，真係可以放題式咁瘋狂放電！
天空之鏡
另一打卡熱點，當然唔少得天空之鏡啦！講到明先，呢塊真係鏡，短裙仔嘅朋友就要小心走光喇！
動物園
園區內有孔雀、山羊同白兔，當然唔少得草泥馬啦！呢度有6隻草泥馬，其中1隻係男仔，其他都係女仔。大家可以另外購買飼料，咁就可以入去同草泥馬影相打卡。草泥馬都受過訓練，好溫馴㗎！入場前記得先消毒鞋底同清潔雙手啊！
