今日依間位置係新城市三期 GU落一層扶手電梯之後轉右 就係Log On隔離 前身係Café 門面有滿滿藍色楓葉背景座位可以打卡🍁 好彩係OpenRice book左位所以唔使等就可以坐低啦 但6點零鐘裏面已經坐得幾爆下 座位左右兩排係卡位 中間係4人枱 望住大玻璃窗都有排高櫈位 天花板都係有心思既佈置 係藍色花同鳥籠 原條蒲條鰻魚旋風蛋包飯$158 每檯都會見到旋風蛋包飯既蹤影 相信係必點 黎到無失望 一般蛋包飯大多都係鋪平 好少見到會係企高 同埋睇得出份蛋係扭左好多下 師傅小啲功夫都應該做唔到 同埋擺盤都好靚 切開中間 雖然唔係炒飯底但都一樣好食 不過鰻魚就比較韌唔太軟 之後依個價位用既雞蛋唔係出名既日本蛋 有啲失望 但都值打卡 黑松露溫泉蛋卡邦尼扁意粉$138 上到檯 店員先會當面磨黑松露片落意粉到 係聞到幾香 但味道就係一般卡邦尼意粉 水牛城雞翼 用積埋換既所以無認真記低價錢 雞翼係一字骨 容易放入口 外層炸得好脆好似食緊韓式炸雞咁但辣味都幾重 黑松露薯條$58 薯條都幾大盤 配凱薩沙律醬 薯條粗身而且脆卜卜上面仲灑左少少鹽同香草 鹹鹹地好香口 So Far So Good$ 58 依杯係餐牌上放大左做heading 相信應該唔差 唔飲酒既朋友仔都可以試下 因為係無酒精 只係有椰子水 乳酪 荔枝糖漿 檸檬汁 同Blue Sky( Vodka味道唔算濃同比較順口既一種調酒) 咁呷左啖的確無酒味 只係飲到荔枝既甜 椰子水既清 都可以試 蔚藍星球$98 依款甜品真係得個殼 底下個篤係抹茶味忌廉 類似海綿蛋糕藍色物體無味 用錘仔卜開個殼之後都係有一大篤抹茶味忌廉 少少寒天 同埋士多啤梨🍓 藍莓🫐 除左生果係有認知之外 其他我都唔知自己食緊咩 抹茶味忌廉食落似焙茶味 仲要唔creamy 係打卡靚但我都係比較睇重味道 💛店員服務態度好 而且食滿$400 仲送$100coupon 可以下次滿$200即時用

平時好少食越南嘢，因為覺得好清淡無味。 但而家疫情嘅關係，為咗身體健康就選擇食清啲啦。一入到鋪，店員超好服務，即時帶客入位。仲會比一張獨立包裝的抹手濕紙巾同裝口罩的紙袋比你。

之後，仲好主動積極幫你落單。6pm 前衝刺食下午茶當晚餐，就一於試晒佢地出名的越南粉、小食同埋飲品啦。


生牛肉湯河粉 $50 （下午茶價）

一來就有四片生牛肉在河粉上，牛肉片半生熟的狀態令人著迷。 口感軟中帶腍，容易入口，唔會太多肥膏。適合健康又想補下血同鐵質的人士選擇。

湯底好清甜超有牛骨味。再加上芽菜、蔥粒、蔥絲、洋蔥絲及香葉的香味。 洋蔥非常新鮮，帶有一股嗆辣味。再加上伴碗附上的青檸汁同紅青辣椒粒，令整碗湯底的味道更牛味更鮮。 整碗湯最後帶著酸酸甜甜的味道，頓時胃口全開。

雪白色的河粉晶瑩通透爽滑。廚師煮得剛剛夠火喉，唔會煮得過腍亦唔會過生。店採用嘅唔係一般中式粉麵店的中國製造河粉、而係使用越南的傳統幼身河粉。


河內炸春卷（2件）（跟餐加$18）

先來小食炸春卷，外皮香脆而薄、口感外脆內軟。 入面有紅蘿蔔絲、木耳絲、米粉及豬肉碎。 一入口先有好濃既豬肉味，再來係好重嘅紅蘿蔔草青味。 唔鍾意油膩既朋友可以用隨碟的生菜包住春卷來進食。


新鮮椰青 （Tea set加$26）

最後，當然加$26 叫埋卡路里及糖分相對較低嘅新鮮椰青。 椰青呈上來時，連埋殼原個比你證明係新鮮斬開。 飲落嘅椰青水好清甜消渴，唔會覺得好濟口，好fresh 好醒腦。 飲完後仲可以刮埋椰肉來食，椰肉非常爽口帶淡淡嘅甜味。今餐飯超健康呢！

每年聖誕節， 我都很喜歡去酒店吃自助餐，因為喜歡酒店自助餐氣氛非常濃厚，而且因為客人多所以很熱鬧，記得有一年去帝苑酒店吃聖誕自助餐，還有歌舞表演呢 ！ 去年因為疫情都沒有出去吃自助餐，今年疫情稍緩所以自助餐定位更加緊張，而且價錢相對非常昂貴，因此我就想到沙田馬場這一間"喜馬當先"吃一個半自助餐，因為老公上個月吃過一次覺得非常不錯，半自助餐形式 又不會吃太多，而且價錢相當優惠，他說還有生蠔任吃，又可以觀看賽馬，一舉兩得，（馬會所有餐廳都是要要會員自行上網預約及預先付費的，最早可以一個月前預約），老公最後說上不到網站所以遲了一兩天才能預約成功，我們是餐廳最後兩位成功預約的客人，真幸運！12月27日 12時半左右已經到達餐廳， 見部份客人已經開動了，因為我們是最後預約成功的，所以只能安排我們坐在中間的吧枱，圓形的吧枱非常闊大，兩邊各坐了三人，整個吧枱共坐了六人，位置非常寬鬆，而且可以看到酒吧內各式各樣的酒瓶及調酒師的工作情形，比較起普通梳化椅餐枱我更喜歡坐吧枱呢！餐廳座高兩層，賣點是以昔日英倫風格裝修為主調，讓人彷如置身雅緻英倫農舍，而且所有餐廳服務員都有一身英倫風的打扮，餐廳中央左右均有一條弧形樓梯連接閣樓，樓梯造型是馬蹄形，連接閣樓有兩間有室內露台的獨立廂房，如果一班朋友可自成一國，一同吃自助餐一同看馬仔，也是一件賞心樂事，只不過取食物就要下一層樓梯到大廳取。餐廳服務員引領我們坐下就告訴我們主菜如何下單（馬會現在所有下單都通過手機程式進行），之後我們便開動了：
這裏半自助餐套餐包括以下菜式：
飲品限時任飲
有果汁、汽水或啤酒1:30pm 之前任飲。
頭盤1：
～ 沙律 (有五盤)
有葉菜有三款：火箭菜、雜菜及羅馬生菜，沙律醬汁有四款；另一盤有紅蘿蔔拼墨魚及鮮蝦仁，最後一盤是雜菇。
～ 冷盤
Cold cut (火腿兩款、沙樂美腸及巴馬火腿)、煙三文魚及鴨肝醬批。
～ 魚生或生蠔
本來以為可以大吃一頓生蠔，怎料餐廳廚師說本月吃魚生，只好下次再來吃生蠔。
頭盤2：
～ 湯類
是一個雜菜蕃茄湯，熱度非常夠，好喜歡。
～ 奄列
這一個區域是自助餐區很受歡迎的一部份，客人可以從五款餡料中(蕃茄蓉、雜菇、洋蔥粒、火腿粒及雜色椒粒)自行選擇喜愛的，由廚師現場幫忙炮製，我們選擇了每樣一點點，廚師很用心炮製這道奄列，制成品非常漂亮而且好吃，因為怕吃太多所以跟老公二人共享一客。 另外還可以選擇水煮蛋。主菜（任選其一）：
～燒火雞卷伴煙肉豬肉香腸伴炒椰菜仔及紅椰菜配火雞汁（選）
聖誕節當然要吃火雞啦，這個燒火雞卷原來很滑，沒有嚡口的感覺，豬肉香腸則是用煙肉包住香腸來煎，很香口好吃；伴碟還有迷你椰菜花及一些醃製過的酸椰菜絲，非常開胃好吃。
～印式豬肉伴鷹嘴豆、薄餅及香料飯配菠蘿醬（選）
因為我們點菜的時候已經很少其他的選擇，所以選擇了這一道菜，這個印度咖喱非常辣，印度米是有獨特的風味，米粒外型纖長，質地較硬，煮熟後米粒分離而蓬鬆，不會釋出澱粉質、無黏性、不會稠化，一般食開泰國米的香港人是有點不習慣，我自己則吃糙米的， 但也不習慣吃印度米；而菠蘿醬也比較甜，所以我覺得最好吃都是那塊薄餅， 哈哈，妹仔大過主人婆，反正主菜不是我的target，試吓就是。
～香煎盲曹魚柳伴燴蕃茄及燒迷你薯仔配香檳汁（+40）
本來想吃這一道餐廳推薦女士吃的菜，可惜賣光了。
～燒西冷伴炒甘筍、荷蘭豆及約克郡布甸配紅酒汁（+80）
看見其他客人也有點這道菜，但不知為何原封不動？估計應該是吃得太多自助餐枱的食物，所以肚子裝不下吧！
～燒椰菜花扒伴法國小麥、枝豆及石榴配芝麻乳酪
包點：
有方包、麥包、貝殼餅及紙杯蛋糕。
甜品：
甜品枱共有八款甜品:
我只吃了紅桑子熱情果奶凍蛋糕(低糖)
/ 蛋黃沙巴翁及鹽味焦糖伴餅乾，非常推薦前者，因為這個奶凍是低糖，口感軟滑不太甜也不太酸，我和老公都吃了很大的一件。節日甜品：
是一個聖誕朱古力布甸，一般聖誕布甸都是非常甜的，所以只是拿來試一下。生果：
有西瓜、蜜瓜、哈密瓜及菠蘿。
~芝士(有四款)
沒有拿Blue Cheese，因味太濃。雪糕：
Movenpick 朱古力味、士多啤梨味及雲呢拿味雪糕。
咖啡或茶

餐廳連接室外一個露台可以觀看到賽事，很搞笑，第一二場開跑時露台擠滿客人，但到了第五六場只剩下幾位客人走出露台看賽事，老公說大家都輸光了，還有什麼好看！哈哈！😂
今天能親眼目睹這裏的英倫風裝修，而且更可以慢慢享用美味的半自助餐，老公又有點收穫，真是賞心樂事！

媽媽話之前成日經過呢間餐廳都好想食 咁好啦 雖然唔知佢點解會經過科學園 但開到聲就特登book左枱帶佢黎 大約五點九到 停車場上黎向海邊行 五分鐘左右路程就會見到大大個餐廳牌 去到嗰陣唔洗等位 餐廳分左b區同c區 仲有室外同室內嘅位置 呢邊好似係c區 呢邊就明顯見到貼左個b字 天氣幾好 又有少少風 我地都係揀室外坐 計埋室內 位置應該超過一百個( ´▽｀)。。 不過呢邊係向東 所以其實睇唔到日落 只係有少少晚霞 都好嘅 起碼唔熱 落單後冇耐 餐飲先到 最遠係passion cow 係cream soda 同熱情果糖水同雪糕 汽水加雪糕係上一輩嘅童年回憶啊( ´▽｀) 左手邊係asahi 右手邊係coffee cow 就係咖啡加雪糕 同affogato唔同嘅係多左奶 最近嘅係kiwi lemonade 呢杯就真係我飲嫁啦 唔酸 仲甜甜地 有少少kiwi味 幾好飲 呢度menu比較多元化 除左歐美西餐 有埋中餐 泰國野 餐廳咁大 應該廚房都好大 第一碟上嘅係柚子沙律 有四隻蝦 少少蝦米同大量櫻花蝦 紫洋蔥 同好多碌柚肉 菜就真係唔多嘅 主力都係食返柚 少少酸 個汁係泰式辣醬嗰種味 唔辣 偏酸甜 四隻蝦好鮮甜 冇雪味( ´▽｀) 個味係好食嘅！ 然之後。。 廚房用八分鐘內全部上哂我地叫嘅 我哋一張四人枱就瞬間full哂 呢個係黑松露炸雞槌 連啤酒嗌係小食套餐 148 黑松露係每隻雞槌上面都放少少 再跟左個泰式辣醬 炸得幾乾身 唔會油膩 似汽炸多啲 雞肉唔會好乾 食落都正嘅 肉汁薯條 係啱啱焗出嚟 所以必然係熱嘅 佢有多隻底碟墊住 無知嘅我企圖拎走佢慳啲位 結果辣親自己 叫嘅話要注意熱啊！ 整法就係將炸好嘅薯條放碟再落一羹肉汁同芝士 拎去焗 其實冇乜特別 不過似我地中意食小食多嘅可試吓 個肉汁唔算好鹹 食得多都冇咩問題 天使面係全家大讚 其實睇佢個名都冇咩伏位 個汁做得好creamy 忌廉味好重好香 份量可能因為係幼身嘅天使面所以冇想像中少 食落唔知點解唔膩唔漏( ´▽｀) 所以好食嘅係 豬肋骨 我媽大讚 但因為我好中意食ribs 食好多 就略嫌唔夠離骨同燶咗少少 不過其實個味都係好食嘅 燶燶地都係大眾口味嘅 要讚嘅係side dish嘅露荀 車厘茄 同炸薯仔 露荀雖然壓住左 但伴碟黎講 紅黃綠伴返深色肉類係吸引嘅 車厘茄有落過獲煮下 唧花嘅係薯蓉 少見本身以為曲奇黎( ´▽｀) 隻色好靚 唔係萬年油嘅顏色 食落口係外脆內軟 寫住製作需時嘅pizza都好快黎左 其實我係想食margherita 不過佢哋怕酸 所以都係嗌左千島海鮮 冇人地啲相 同menu睇咁靚( ´▽｀) 料唔算多 放得都唔均勻 千島醬個甜甜地嘅味都唔出 不過好彩都唔酸 咁食都唔會感覺好heavy 薄批應該都係自己整 唔會好硬 味道其實都係中上水平 好食嘅 只係唔係預期嘅味道 四個人三個main三個小食四杯野飲 係飽肚嘅！ 總結黎講 味道算得上係高質嘅 對得住返個價錢 速度就快得有啲神 入座都係1807 結帳先係1900。。。 環境都靚嘅 六點到都仲係黃昏 七點左右就係睇夜景啦 入夜就望返馬鞍山開心啲 萬家燈火真係幾靚 餐廳直望出去就日頭靚啲 夜晚會漆黑一片 靠草叢堆坐最好著返長褲 唔多但都有啲蚊咬

消費券coupon見到呢間新開嘅Pop n’ Grill，只要食滿$300就可以減$100，比起其他coupon更優惠，所以就去試下。


佢喺沙田大會堂嘅天台花園，一上到去個露天位置已經俾人好寛敞嘅感覺，甚少餐廳可以喺鬧市中望到咁廣闊嘅天空，呢點好加分。周圍仲有好多歐陸式嘅白色燈柱做裝飾，如果夜晚黎一定更有情調。侍應哥哥詢問我地係BBQ定係西餐，原來呢度露天位置係做BBQ嘅，有一個專業烤爐俾客人慢慢燒，最特別係有成隻乳豬燒。呢樣玩意已經唔需要山長水遠去郊外嘅BBQ場就玩到，打卡冇難度！加上呢度枱與枱之間都好有空間，餐桌又比較舒適，絕對比一般BBQ場高檔。



由於天陰陰，又比較熱，我地選擇左喺室內食西餐。一入到去，裝修同樣以歐陸風格為主。白色天花及樓柱，配上不同層次嘅藍色射燈、窗簾、餐椅等，再加上深木色嘅裝飾同埋餐桌，感覺好有格調，而且空間感十足。周圍嘅落地玻璃俾日光自然咁透入，可以睇到外面嘅綠色植物同埋景色，環境黎講完全係我杯茶，不期然對食物好有期待！




我地去嘅時候只係下午五點，佢做緊Happy Hour，$100有三款小食，仲有$30一杯嘅啤酒同埋紅白酒，價錢上睇都幾抵。我地叫左蜜糖牛油雞翼 + 燒魷魚 + 芝士薯條，另外叫左一杯紅酒。
呢個價位，都預左杯紅酒唔好飲，的確，口感好薄，味道麻麻。
之後到小食，燒魷魚唔靱，算ok，但只係得寥寥可數嘅幾條，份量好少。
雞翼冇乜蜜糖牛油味，反而幾大浸雪味，唔得。
薯條本身可以，但個芝士好少，又乾爭爭，非常一般。




比著平時，我應該會走人，但今日係星期日，周圍都勁多人，要去搵另一間餐廳食埋下半餐應該都要等位，況且今日個coupon mission 都未達到，所以就決定喺度解決埋個晚餐，睇下主食會唔會攞返啲分數。

我地叫左個帶子卡邦尼意粉($138)，同埋炭燒白酒三文魚柳($118)。意粉先到， 口感可以，唔會太腍，味道亦唔差，不過完全食唔到芝士嘅香味，汁亦冇卡邦尼嘅稠度。最敗筆嘅係個帶子，雖然煎得剛好，但卻食到雪味同醃料味！其實一般急凍帶子只要質素唔太差，只要輕輕用鹽調味就已經好食，所以真係好失望。
至於個三文魚柳，正當我猶疑點解可以咁平之際，佢一上枱就解開謎底：因為塊魚柳好薄。生熟度控制得唔錯，醬汁亦幾夾魚柳嘅味道，但就食唔到炭燒嘅香味。



老實講，食物麻麻，但服務卻真心要讚。侍應們全部都非常親切有禮，呢樣係好多餐廳都未必做到嘅。
其實以佢呢度嘅環境、空間、服務，只要喺食物質素方面落一啲功夫，就算上調價錢，我相信亦有一定嘅客路。尤其沙田商場食肆林立，好多質素都非常一般，如果轉行高檔路線，可能反而更吸客！

網上見倒有間新興既潮州菜, 聽聞好食又特別.睇店外餐牌, 見倒D名都幾特別, 價錢好似又偏貴左少少, 令人有少少卻步, 不過既然黎到, 入面又有位, 同埋網上既名氣, 就膽粗粗試一試啦.
店入面唔算大, 但裝修都稍為精美, 有D似cafe既感覺, 亦有吧枱對窗座, 適合一人enjoy.網上提及最出名係腸粉, 但原來唔只腸粉, 海豐小米都係一絕. 潮式皺皮腸其實係大陸都食過, 雖然皺晒皮咁, 但係粉皮都係滑既, 叉燒都算多, 同埋店員好貼心, 都會問一聲要唔要芫茜, 但係豉油係咸既, 仲落得比較多, 食到一半D腸粉已經索晒D豉油, 搞到仲咸左, 如果餐店可以比客人自己落的話, 會更加好. 腸粉套餐有得揀幾樣野, 因為麵食個邊揀左2款試, 所以揀埋海豐小米試下, 雖然唔知咩黎, 但感覺有D似魚皮餃, 又有D似小型既粉果. 食落去好特別, 外皮真係粉果皮, 唔算厚, 只係頂端收尾位厚左DD, 內饀係豬肉溝大地魚, 醬汁係蠔油, 醮完食落口, 味道有D似魚皮餃既饀, 但係大地魚既味道慢慢滲出黎, 豬肉既鮮甜味, 再加上蠔油既海鮮味, 有D難形容, 只係覺得好有層次好複雜. 原身諗住食10粒會好飽, 始終好多粉漿咁, 但食下食下, 又真係停唔倒口. 上網搵搵, 原來係汕尾出名既小食黎, 即刻萌生念頭, 想去汕頭汕尾試下當地既美食, 不過無奈仲未可以通關.麵食試左雙拼, 牛肉餅同馬餃魚丸, 雖然冇小米咁令人驚喜, 不過味道都係煥然一新既, 牛肉餅既味道好似爽口既牛丸, 但更濃味, 而馬餃魚丸, 魚味亦都好濃, 但唔鍾意食魚既人, 可能會覺得比較腥, 而酸菜都中和左哩浸濃郁既味道, 麵條就似較彈口既上海麵, 份量其實都頗大. 再配埋餐飲, 揀左凍既酸梅汁, 可能比較少飲, 又酸又甜咁, 係可以清倒口, 不過好似甜左少少.

今次係我哋第一次嚟呢間餐廳「Meraviglia Bar e Ristorante」，我哋當日早上11時即興打電話去餐廳，碰碰運氣。
又好好彩，仲可以walk-in。

第一次嚟又加上好耐冇去親子友善餐廳，感覺好新鮮。

餐廳座位都算多的，亦有室內及室外座位。

室內兒童遊樂設施，有彈弓馬、手搖船、圖書等。
^但係廚房屋仔冇煮飯仔配件，即係玩唔到





戶外遊樂設施有攀爬組、繩網、吹氣彈床

夏天最適合玩水，不過我哋冇帶衫/游水片，所以就冇落水玩了。
不過，現階段還有疫情，我哋自己亦會考慮到衛生問題。
分享完玩樂部份，介紹一下食嘅部份。
我哋當日點咗兩份食物，長通粉(Full)及西冷扒(10oz)。

意大利長通粉配秘製有機番茄肉醬佢有兩個Size選擇，Regular ($268)及Full ($328)。職員話Regular係一人份量, Full係大過一人份量1/3左右，不過嚟到我覺得....都係同一人份量差唔多。

但見到隔離枱叫意粉就好似座山咁高....
唔知係我唔好彩，定係我大食，覺得呢份Full Size細....

味道OK正常，唔太惹味，適合小朋友食。
肉醬就唔係好覺有，芝士味就好濃，但冇咩番茄味。

烤澳洲草飼西冷牛扒配香濃燒汁 - 有8oz ($308) 及10oz ($348)。我哋揀咗10oz，味道唔錯。超肥薯條，係熱辣辣嘅。肉質都唔錯，唔嚡，都香牛味。
個人整體評價:
客廳內、外設有兒童遊樂設施，小朋友當然玩得開心啦。
不過，餐廳價錢就略為偏貴。食物質素方面，我個人覺得正常。

餐牌:

和朋友到沙田新城市廣場3期閒逛一下，又到晚餐時間，比我地發現原來新開左間<四季芬芳>中式小菜館，而且仲有燉湯、蛇羹、小菜、煲仔飯類等供應。秋天就快來臨，很久沒有吃蛇羹，呢間餐廳正合我地心意，便進店一試。 ＜四季芬芳＞原來係香港都有少少歷史，佢哋始創於一八九五年，並於一九四零年於香港落地生根，呢間超過百年的老字號食府「蛇王芬」，於沙田開設副線新品牌店「四季芬芳」，將百年老店<蛇王芬>更年輕化，絕對係「香港製造」，新品牌創造更多美味同多元化既中式粵菜給不同的客人。 進入餐廳，裝修感覺新穎得來亦保留住中式設計，空間感足，有卡位同圓枱座位選擇，環境夠闊落舒服。 <花膠太史蛇羹 $98位> 蛇羹湯底入口非常清甜，有花膠、蛇肉絲、雞絲、木耳、冬菇絲、瘦肉絲等。另有薄脆、生菜絲、百合、檸檬草作配菜。材料好多好足，每一啖都食到蛇絲肉絲，滋潤開胃，係必食之選!! <灌湯竹絲雞百花丸 $76> 百花丸炸得金金黃黃，比乒乓球還要大個，咬落去非常香脆，入面既蝦肉夠曬新鮮彈牙，蝦肉中心包裹住灌湯竹絲雞，雖然未有爆湯感覺，但有雞絲清甜味在內，非常特別。 ＜鮮象拔蚌仔荷葉蒸飯 $128> 呢個荷葉蒸飯一上枱甚是驚喜，因為原個蒸籠上，份量好大好多，相信可以足夠4人分享。蒸飯粒粒軟綿，微微咸香，飯上面鋪滿新鮮象拔蚌仔，海鮮飯香味已經蓋過了荷葉香味，非常好食，大讚吖!! ＜招牌油焗雙腸 $58＞ 潤腸和臘腸各有四片，滿滿既油香同咸香，送飯一流。 <豉椒排骨白鱔煲仔飯 $108> 材料十足嘅白鱔排骨煲仔飯絕無欺場，煲仔飯熱辣辣上枱，火喉剛剛好，白鱔片足足有五大片，白鱔魚肉夠厚夠滑，而且骨細。排骨肉多骨少，肉質不鞋夠嫰，配合埋綿綿細軟嘅煲仔飯，非常滋味。如果鍾意食飯焦多點嘅朋友，建議可以將煲蓋吸住個飯煲再等多一會，飯焦自然出來。 除咗煲仔飯，蛇羹，前菜小食等，餐廳仲提供其它中式的新穎小菜，亦有數款燉湯可以選擇，非常不錯。 另外值得一讚既係，餐廳員工雖然不算很多，但由於客量開始增加，他們的服務質素亦可以保持到有不錯的水準，下單和上菜速度都快，非常殷勤和有禮貌。 整體來講，餐廳環境非常舒適，食物質素水準算是高，價錢中等亦合理，非常適合同朋友或家人聚餐用膳，值得再次幫襯。

補食父親節飯，一個月前已經訂檯，只有2個時段，分別係5:30 同7:30 選擇，我揀咗早輪5:30。

當日一行7人，5:15左右到達，要先登記，準時5:30會安排已登記客人入座。安排坐喺窗邊位置，太陽仲未落山，光猛開揚。

訂檯時順便預留一隻北京填鴨，選擇三食。第一食，填鴨都唔洗等好耐就上菜，目測填鴨皮似漏咗氣，唔太夠脹卜卜。師傅練熟咁手起刀落片鴨，第一碟只有鴨皮，服務員建議沾糖食，都唔算薄嘅鴨皮食落好乾、比較實、冇鴨油香，加咗糖食嘅話，可能因為冇咩鴨油嘅關係，真係同預期落差甚大。第二碟係只有鴨肉片，鴨肉嫩滑，不過毫無肉汁，而且鴨味唔濃，又再失望。第三碟係鴨肉連皮，其實綜合咗以上鴨皮同鴨肉嘅食感，配上厚薄適中嘅薄餅、青瓜、蔥白、蒜泥同甜味恰到好處嘅甜麵醬，靠咗啲醬同配料，鴨肉味其實已經唔濃，感覺配菜先係主角。
第二食嘅生菜鴨崧喺啱啱切好晒第一食就上菜，咁即係唔係同一隻鴨同埋可能係一堆炒定。可能炒定分配上碟關係，鴨崧份量少，用上啲細size嘅大豆芽炒，調味一般，唯一可以讚吓啲生菜新鮮甜脆。
三食係鴨湯，唔係一煲上，又係應該煲定一大煲，一碗碗送上，望落湯色濃白，內有津白同豆腐，飲落淡如水，一啲味道都冇，真係唔會想再飲第二啖。同檯各位亦有同感，所以同咗一位服務員提出，佢竟然攞樽鹽俾我哋，喺咁嘅情況下我表示想搵搵經理反映，經理行埋嚟嘅時間同時都揸住個有啲湯嘅碗表示佢都試咗味，而且真係比較淡，已經通知廚房再調味後換過俾我哋。再調味嘅鴨湯都係淡，為免嘥咗個胃嘅容量，成檯人飲咗一啖已再調味嘅湯就停手。我同服務員示意都係咁淡，麻煩收咗啲湯碗，佢亦同時話同我取消個三食加表示歉意。
個片皮鴨已經足夠令我哋個個都好失望，其他餸菜如下: -

1.     馬拉盞帶子蒸秋葵 – 帶子粒偏咸
2.     乾蔥鮮竹芥菜 – 好健康，而且啲芥菜仲好甜，腐竹索咗啲湯汁，加上乾蔥粒嘅香同口感，配搭清新好味。
3.     鹹蛋黃魚皮蝦球 – 呢味係我個人最欣賞，香濃鹹蛋黃份量足，厚厚一屠包住爽口大蝦，雖然鹹蛋黃係比較厚，但係一啲都唔膩，而且仲可以食到蝦味。魚皮夾鹹蛋黃係完美的一對，香濃脆，最緊要係唔會有油膉味。
4.     彩椒鳳梨咕嚕肉 – 呢味有水準，咕嚕肉食落脆口，咕嚕汁味平衡，肉肥瘦適中。

飲品就order咗: -

1.     PINOT NOIR紅酒一支
2.     Dry Martini
3.     唔記得咩名同咩味但係又好甜嘅 Cocktail

甜品當然係叫咗佢哋獨有味道嘅雪糕同雪葩: -

1.     五娘液朱古力雪糕 – 酒味絕不欺場，估唔到同香濃嘅朱古力非常之夾，配上一片十分香脆嘅芝麻薄脆，真係推介。

2.     花雕話梅雪葩 – 一入口話梅味好出，以為冇咩花雕味，一路食啲花雕味開始出嚟，清香嘅酒味加上清清甜甜話梅味，座上88歲老人家都讚不絕口。

總括食物方面隻填鴨三食真係完全敗筆，更別談係酒店出品。其他餸菜類都不過不失，而且款式有啲都比較新穎健康。甜品方面我食咗嘅雪糕同雪葩都係冇得挑剔。

喜歡Moko的Outback, 員工專業, 亳不怠慢, 工作很有熱誠和幹勁。食物出廚後, 盡快上桌, 從未見食物閒放著。



沙田開店, 當然要光顧, 分店開張約半個月, 運作尚未暢順, 感受不到以客為先的感覺。員工人數多, 但找人落單, refill飲品, 結賬都頗為困難。上菜也混亂, 同一菜式, 有後落單先上菜的問題, 亦有客人吃完主菜也沒上麵包的情況。另員工出入廚房, 關門時嘭嘭聲, 嚇得心都離一離, 頻密程度, 絕對影響食慾。

與經理暢談, 原來已約師傅處理嘭門聲。另外, 店員都是白紙, 需要時間訓練和磨合, 希望兩個月後, 運作有如Moko店。聽罷也很期待, 感覺新一年要學習的便是包容。

Lunch Set的供應時間每間分店也不同, 沙田分店供應至4點, 喜歡bushman bread的絕對是喜訊。

是次點了Lunch Set $98 + 10%
1) 是日餐湯 : 西蘭花忌廉湯
2) 沙律
3) Bushman bread (refillable)
4) 香辣燒蝦飯
5) 熱檸檬茶 (refillable)

Bushman bread有點凍, 暖的感覺也沒有。


西蘭花忌廉湯質感creamy, 沙律清爽。

香辣燒蝦飯很不錯, 有脆炸蘿蔔絲, 配上辣肉, 惹味可口, 唯蝦肉有點實。

這裡的熱檸檬茶是給客人一杯熱水, 一包茶包和數片檸檬。客人可自行調節茶的濃度和檸檬的多少, 實在貼心。

今天星期日，家姐一家約我到碩門食午飯，順便拎埋泰國手信，呢間餐廳好多時都堆滿食客等位，因為呢度既價錢平，又多選擇。我們驚要等好耐，所以晨早吼佢開門果陣就去攞位，可能真係尚早，未有人排，所以唔使等位就可以入去。睇睇餐牌，真係好多選擇，樣樣都唔貴，十幾蚊又有，廿幾蚊又有，淨係見個價錢就已經好吸引，叫多幾款都唔會肉赤。



我地好快就點好晒，啲野等左一陣都陸陸續續咁上枱了，等我介紹一下：

首先係兩個pizza ，一個叫做水牛芝士Pizza，另一個係農舍Pizza。呢度既Pizza你唔好諗住整到跟某間薄餅店咁厚身或好軟熟，但呢度既水牛芝士Pizza好香芝士味，啖啖都食到芝士的濃郁。個皮唔算厚，但都好有咬口。農舍Pizza面頭仲有啲冬菇响度，芝士冇水牛咁濃，但味道都唔錯！
再來係蕃茄煙肉意粉，呢碟意粉好多蕃茄仔响入面，啲蕃茄汁撈落啲意粉度，令成碟意粉好有蕃茄味道，入面仲有煙肉，可以增加香味同口感。今日個意粉仲要出奇咁大碟，平時啲份量唔會咁大，今日有啲驚喜！

我地最喜愛的辣味雞翼當然唔會少得佢啦。呢度既辣味雞翼做得唔錯，辣辣地，雞翼又唔會好乾，一碟有八隻，次次黎親都唔會放過！
芝士法包，芝士碎撒在法包上面一起焗，又有牛油香味，又有芝士香味，個法包又脆脆的，就咁食已經好香好好食了！
野菌忌廉意粉，呢個意粉今日又係做得幾大碟，個忌廉汁好有奶味，好creamy，又夠多，每條意粉都沾到忌廉汁，加埋面頭啲冬菇，同埋芝士碎，令到成碟意粉生色不少！

蒜汁燒魷魚，呢個又係必點的，魷魚用鐵板上，加埋蒜汁，個味唔錯，魷魚唔靱，但略嫌啲汁唔夠，得一少杯仔，唔夠喉！

跟著肉醬多利亞，呢個菜色我第一次食，食一口，咦！原來幾好食果喎。佢其實係個飯黎，但有茄醬，芝士，仲有肉醬撈埋一起食，確實係幾唔錯！難怪家姐話次次黎呢度都要揀呢個食啦！推介！

食到咁上下，又再叫第二Ｒound，今日啲碟頭相對比起平時既大碟，同埋比以前都較熱，所以都食得差不多，但又想叫多少少野食，所以又叫多了三款。

黑椒蜆肉鐵板煮，用鐵板上枱，入面有２０隻蜆，蜆上撒了一些黑胡椒，蜆肉都尚算甜，因為有少少黑胡椒，所以食落會有少少胡椒香。

白汁雞肉菠菜，入面有好多菠菜和雞肉，雞肉唔鞋，面頭用白汁鋪滿，其實都唔錯，但都係有少少膩。

最後係野菌忌廉意大利飯，個飯好香，好有野菌味，忌廉都好香濃，意大利飯唔會食到佢硬，呢個都幾好食！

五個人食到飽飽都係三百蚊度，又平，又可以食到多種類食物，難怪呢度長期都咁多人排隊啦!

年頭嘅元旦日就跟教會嘅大旅行就嚟過「麗豪酒店」食自肋午餐，順手拎咗酒店啲餐飲單張八吓，睇到有介紹「意廊」（Avanti Pizzeria）新推咗啲美式意菜。其實，都曾經幫襯過「意廊」，不過，都已經喺10年前嘅事喇，哈哈！近日，就約咗幾個朋友嚟食飯，當聚舊又好，當食開年飯又好，總之就開心歡聚食意菜。雖然，餐廳外有唔少露天位，近日嘅天氣亦清涼，加上少少燈光嘅配合，都蠻有情調。不過，燈光較為昏暗，怕影相效果無咁好，坐室內就最理想。其實，室內嘅環境都幾闊落，就算放上較為掗拃嘅梳化椅，一樣唔會覺得侷促狹窄，而且，啲椅舒服好坐，又比一般西餐廳都顯得光猛，所以，特別多家庭客。今晚嚟嘅目標喺佢嘅斧頭扒，36安士嘅斧頭扒連埋配菜，仲奉送焗意式麵包，佢話兩人用，咪傻啦，唔喺講笑，4個人都夠食呀！原價賣$988，跟出面市場定價差唔多，但依家推廣限定優惠價只喺$638，超抵食。至於自選散點餐牌都有好多選擇，大致分為前菜小食、沙律、濃湯精選、巧手肉扒、嚐味海鮮、手工薄餅、自家製意大利麵、意大利飯及多款美式芝士蛋糕。如果覺得太多唔知點揀，就不妨縮窄範圍瞄住廚師推介。當然，套餐一樣有供應，如果喺一人份嘅，有兩個選擇：「經典意菜套餐」及「傳統薄餅及意大利麵套餐」，前者定價$368一位，包晒自助頭盤及沙律吧、是日餐湯、主菜5揀1、精選甜品及餐飲；而後者揀意大利麵或飯就定價$185一位，揀薄餅就$195一位，只包自助頭盤及沙律吧及餐飲，如想添加是日餐湯及甜品，可俾$32額外添配。此外，人多嘅就不妨考慮吓個晚市「4人自選晚市套餐」，包小食5揀3、意大利麵或燴飯6揀1、12吋薄餅6揀1、主菜3揀1，包餐飲，定價為$1,188；如果配埋自助頭盤及沙律吧，就定價為$1,488，想豐富啲，可俾$32（每位）額外添配是日餐湯及甜品。由於我哋目標喺個斧頭扒，所以，都喺散點。不過，雖然無試到佢哋嘅自助頭盤及沙律吧，都補少少相俾大家了解吓、參考吓。
枱上已放置咗好多調味料，不過，今晚所品嚐嘅菜式都煮得恰到好處，基本上枱上嘅調味料都無乜點用過。菠蘿特飲 $45
難得一聚，梗喺先碰吓杯，祝福吓，嗌句飲勝先啦！諗住今晚食肉多，所以，小弟就揀杯清爽啲嘅菠蘿特飲。不過，就鍾意餐廳用上紙飲管，算喺比膠嘅環保少少。美式香脆蟹肉餅伴牛油果沙沙 $148
每個蟹餅都做得頗大件，而且，炸得金黃，色澤平均。咬落咯咯聲，非常香脆，最重要喺唔油吖嘛，仲食得到絲絲蟹肉！伴上嘅醬料牛油果沙沙亦都好特別，酸酸辣辣之餘，味道富層次，配蟹餅更帶嚟點點清爽感。燴青口配蒜蓉包 $148
早前晌荔枝角嘅Holly Brown同樣食咗一道青口配蒜蓉包，不過，嗰次打正旗號喺白酒汁而無酒香，就有啲失望。今回呢一道青口正喎，可以揀配香草忌廉汁或辣蕃茄汁，我哋選前者，雖然餐牌無標明青口嚟自邊度，但隻隻都肥美飽滿，肉質細膩，唔會好膠咁，而且，掛滿香草忌廉汁，份外有種柔滑感。啲汁咁正，當然唔好嘥啦，搵啲蒜蓉包沾一沾啲汁，令蒜蓉包嘅味道變得唔單一。威士忌火焰岩鹽焗36安士美國斧頭扒 $638
36安士美國斧頭扒千呼萬喚、火熱登場，點解咁火熱，皆因大廚加入威士忌火焰元素，令整道菜更玩味，淋上點着火嘅威士忌，雖然酒香只喺得一陣陣，轉眼揮發就無晒，但柔柔火光，好有視覺效果。上文都話過36安士真喺唔講得笑，友人都話佢似足成個斧頭咁，所以，「斧頭扒」之名唔喺浪得虛名。此外，仲伴有大量而多樣化嘅薯菜，所以話呢，4個人嚟「些牙」就最開心不過。件扒本身質素已經極高，因為落刀嗰下已感覺到啲肉嘅柔嫩感，就算為着朋友緣故，要上七乘熟，切起嚟都唔使太用力，燒出嚟火喉啱啱好，外層十分焦脆，裡面一點血水都無，卻仍然保持嫩紅色，一小件放入口，口感軟腍而富肉味，又甚有肉汁，仲油香馥郁，品質確喺高。事後跟大廚交流，原來成件扒經過濕式熟成，又以優質岩鹽包住嚟焗過，唔怪得肉味濃郁，又唔使點沾醬汁都夠晒味。除咗豐富嘅薯菜，個扒仲伴有香焗意式麵包及香草牛油，不過，唔搽啲香草牛油，啲長法包都已經好有香草味。香草芥末烤黑毛豬鞍 $248
近年都幾興食黑毛豬鞍，因為，小弟都唔喺第一次，近三幾年都食唔少次，問過大廚，豬鞍喺嚟自加拿大，喺好有水準嘅貨色。件豬鞍都幾厚身，煎得甘香，色澤金黃，同樣伴上多樣薯菜。其實，加拿大豬鞍可以唔使煎到全熟，不過，大廚話為求讓客人食得安心，都會以全熟處理。之但喺，肉質喺出奇地咁軟腍，仲有少少脆口嘅感覺，真喺好特別。香烤龍蝦伴香草忌廉汁手捲意大利麵 $198
細細個時，就只喺識意大利粉、寬條麵、千層闊麵之類，但人大咗，見識多咗，就知道意大利麵喺一個好大嘅世界。嚟「意廊」真心推介食佢哋嘅意大利麵及手作薄餅，因為都喺人工手做嘅出品，夠晒個性化。就好似呢一道手捲麵（Strozzapreti）就非常特別，真喺唔人手做喺搵唔到，配上半隻波士頓龍蝦，夠晒睇頭，非常吸引。手捲麵有啲似蟲仔嘅樣，條條都掛滿香草忌廉汁，口感極具咬口，煙煙韌韌，非常好食；而龍蝦應以多種香料處理過，除咗爽口，仲有多層次嘅香味。最欣賞餐廳嘅彈性，好似薄餅及意大利麵咁，份量上都有大細嘅選擇，以配合人數嘅多寡。檸檬脆糖芝士蛋糕 $148
與其散點一件件芝士蛋糕，叫一個仲划算，直情當埋生日蛋糕都無問題呀，而且，依家仲有七折優惠。佢哋嘅芝士蛋糕都喺以傳統美式嘅做法，即喺口感比較挺身啲，芝士味又濃郁啲，甜中帶點鹹香味，所以，呢個「檸檬脆糖芝士蛋糕」嘅配搭就一流喇，因為上層正正做咗一層檸檬蛋白，軟滑清新，平衡一下芝士嘅濃味；而底下嘅消化餅做得薄而平均，就連呢啲細節位都無甩漏，食得出喺用心之作。做菜嘅嘢，可以好簡單，但花啲心思，又用心去做，就會煮出一啲好菜式，正所謂用心良苦。今晚，大家都好讚賞所有菜式，尤其當中嘅斧頭扒、豬鞍及手捲意大利麵，都喺十分出色嘅出品，故大家都食得好開心，再加上輕鬆寫意嘅環境，以及熨貼嘅服務，兼可以賺埋飛行里數添，就自不然更稱心。

我叫「因因」，自少認識「煲仔」。他從廣州來港定居，濃濃的草根味，棕黃色皮膚，短小精悍，皮膚粗糙得很 ; 但樸實貼地，平易近人。 他很有義氣，古有「及時雨」，他則是「及時暖」 ; 以沙煲照顧很多兄弟，解決兄弟的開飯問題。「同撈同煲」和「沙煲兄弟」兩詞，何等豪氣，滿載多少情義。 我們在廟街相識，我一點兒也不介意他的出身。 他散發的香味，真是有魅力! 他的哥哥都叫「煲仔」，身型健碩，穿著鐵絲衣，但肚子裏盛的是尋常的餸菜，沒有特色，「唔嗅米氣」。 自此，我渴望有「打風」，因為可以食午餐肉 ; 渴望有「冷鋒」，因為可以與「煲仔」相聚。 「煲仔」原本複姓「炭燒」，可惜家族沒落，我長大後，少有機會與「煲仔」再相逢。 現在姓「炭燒」，多是冒認的，是先煲飯，後期階段才上炭爐。北角的「嚐喜大不同」(早已寫食記，評比傳統煲仔飯店)是他們家族寄居之地，尚有極少數隱居之所。 近年愛上了「譚仔」，湖南仔的辛辣性格，有另一種無形魅惑。 寒風吹送，吹醒了我，喚起我對「煲仔」的懷念。 「譚仔」和「煲仔」都好有台型! 喜好前者的人，每星期都食一次 ; 喜好後者的人，通常每年只有一季，可大快朵頤，我要好好珍惜呀! 「煲仔」近年已加盟了此大型快餐集團，快餐大家庭竟然有擅長「手工」的沙煲兄弟出現，有飯有餸，真是估不到。 已與此店的「煲仔」結下一年感情。 上年冬天不太冷，今年煲仔熱騰騰。 他比上世紀的踎街歲月，變得更準時，只需5至8分鐘，不用我久等。 他穿黑色外衣，皮膚變得光滑，有型有格。今年的招牌款式是豉汁排骨，豬肉未算嫩滑身厚，重點是米飯粒依然硬淨，不會太乾涸。 排骨製作得與豉汁蒸排骨，有明顯的分野，西班牙排骨頗為酥脆。 豉油似一般貨色，未臻「煲仔飯豉油」境界，因甜味不足呢。宜加研製煲仔飯專門醬油。 盤上有一杯水，盛放膠匙羹。雖是夠細心，我認為鐵匙羹更好，方便我鏟起貼底的飯焦。 坐在「煲仔」的「味，脆，香，嫩 」海報下，食豉汁排骨煲仔飯，感受香硬味腴的滋味，爽丫丫。 以本年此店的四大口號去評分 - 味，脆，香，嫩 : 👏味 味方面，除了豉油味不獨特，多咸少甜，豉汁排骨煲仔飯上豆豉更明顯不足，與海報上的宣傳樣板差異很大。 少時的你，面上滿是豆豉的，所以你的姊姊豆豉鷄，綽號是「烏蠅鷄」。我一點兒也不覺得你醜陋，反添無限的「味」力。 👏脆 酥脆方面，黃金飯焦呈現頻率高，覆蓋率約近50%，雖不是遍布煲底，已是難得。 請看他的黃金飯焦，雖然顏色偏深，但厚脆，比海報上的淡黃薄片，更有傳統街邊風味，更有口感。 你真是風趣(酥脆)，足下多黃金，又夠厚重熱情! 👏香 香氣方面，倒可增強，你們三兄弟齊聚在櫃檯，等候客人，我也嗅不到飯香。 女人可以不塗香水，病人可以不服藥水，煲仔兄弟須香氣撲鼻。煲仔菜如他的姊姊啫啫雞，易有爆炸力。 煲仔飯沒有肥膩食材，調味香料和醬汁引爆，極考厨師功力。 談到煲仔菜，嚐了他的姊姊香辣雞煲，水準尚算可以，當然無法與大牌檔的爆炒雞和川店的川辣雞煲比較。 有很多洋蔥伴焗，和很多唐芹菜舖面，鑊氣有一點兒，敗筆 在辛辣醬。只提供一碟辣椒豉油，辛辣得豪無特色，與尋常住家菜沒有分別。 「活」家之中，煲仔飯最爭氣，光耀門楣，我愈來愈仰慕他。 正在此時，有兩個煲仔進入我的飲食世界，在內心掀起一陣波瀾。 另一間「樂」字陣營，今年十一月中旬，新推出了煲仔飯。 印象中，「樂」字店少有供應此物。 點選滑雞煲仔飯。它的煲仔直徑更長，胸肌雄健，內膽約有17厘米，屬二人或以上分享的的棕黃沙煲。煲內有大量米飯，只貴兩元，能做到香滿「出菜」櫃位，煲仔出菜，與昭君出塞同樣吸睛。 不過，水準不穩定，在不同分店，有完全不同效果。已試驗多次，有沒有飯焦，飯偏濕的情況。現加送灼菜和香茶拉客。 第三大快餐王國MX在十一月下旬亦推出煲仔飯，挑起三國風雲。 廣告強調「黃金焦脆」，細切臘味為主打，主攻臘味均勻滲入飯粒。其臘味煲仔飯冒煙最多，以泥黃沙煲示人，甚有古風，並可加15元拿走。 沙煲闊度與「活」記相近，內膽約少於14厘米，但煲內米飯比「活」記少，男士可能未足飽腹。餸飯比例幾近一比一。每啖飯都充滿臘腸粒和冬菇粒，醬汁頗咸，不用加豉油。三個之中，你是最惹味的煲仔。 飯焦覆蓋率只約四分之一，少見黃金，飯焦呈薄脆。 另一款鳳爪排骨煲仔飯都有類似現象。價錢是48元，三個之中，是最貴。 附大鐵匙，是最貼心的。 細看兩店的靚仔相，造型何其相近，似出自同一間整容公司。都是鮮，臘肉，冬菇粒共融，以葱花映襯。「樂仔」的香和「MX仔」味的確很誘人。 反觀此店的海報，近日轉了設計，加了一條挾在煲上方的臘腸，再加了一匙黃金飯焦，與上述兩店海報何其酷似。一再強調臘腸是七瘦三肥，似是要與敵方比拼臘味。 其實，前期的四大要訣海報，更能突顯此店煲仔飯的均衡性。 評審「小鮮肉」，還是細味其嫩口與否。 👏嫩 嫩方面，冬菇滑雞煲是考牌之選。試嚐兩大集團的雞煲，「樂仔」的雞頗滑，並有臘腸伴食。惜雞調味不足，偏淡了，變成燒味煲仔飯。 另一王牌是雜錦煲仔飯，亦有類同喧賓奪主情況，焦點去了臘腸那邊。原本設計意念討好，有鮮，臘肉粒混合。可惜飯多鮮，臘肉少，有食白飯的感覺。 此店「活仔」的冬菇滑雞煲味道剛好，不似MX般重味。本店的雞件十分滑溜。 雞滑嫩而飯焦脆，一剛一柔，恰似我和他一樣。 另有一款有新意，首先是窩蛋土魷雞粒飯，土魷不伴豬肉餅，拼上滑溜的雞粒，同樣突出了「滑」。 窩蛋則太熟透了，起不到增加豬肉餅潤滑的作用。 另一款較傳統，是窩蛋馬蹄肉餅飯，比滑雞和雞粒煲更嫩溜。 豬肉餅濕度充足，鬆軟無比。傳統上是用咸蛋，此店用雞蛋，更健康，和不會搶走豬肉餅的鮮味。 馬蹄稀少，不食馬蹄的人都不會介意。 「樂仔」有同父異母的兄長，在一粥麵家庭長大。「一仔」素有賣煲仔飯的經驗，可同時供應5款煲仔飯，「樂仔」的厨藝全來自他這個「大伙頭」。 試嚐了窩蛋香辣肉餅煲仔飯(48元，包啡茶)，外型與「樂仔」是同一樣，震撼力強 : 香噴噴，熱烘烘，蒸氣直冒。有很多黃金飯焦，煲底油份亦是最多。部份位置火力不及，米飯仍濕潺。 肉餅有少許辛辣味，倍添胃口，惜肉餅鬆散，多呈粒狀或小塊，滑度不及「活仔」。 饕餮建議:煲仔上檯後，只須略加豉油，並只在煲邊滲入，以防咸豉油奪去小鮮肉的味道。冚蓋等1分鐘後才吃。 兩店均有窩蛋煲仔飯。食窩蛋飯，如提供生蛋，由食客自行打蛋，肯定蛋更滑溜。 🥣總結🥣 總結三大「煲仔」，「樂」仔兩兄弟集團只強調「最香」，以煲仔尺碼，燒味力谷香味，適得其反 ; MX的最惹味，真正熱騰騰，臘味，肉「味滲」透率最高。 當然，他們均有非臘味類的煲仔飯，如xo醬南瓜排骨，本文只抽樣本來評比幾種典型煲仔飯。 本店在飯「焦」，肉「滑」兩方面均壓倒了對手，加上有獨有的送餐上檯服務(「一仔」有上檯服務，無電子儀器輔助)，以點數勝利。 你是滑溜的小鮮肉，又有很多黃金，這正是我喜愛的類型。 嘆「冷氣」食「煲仔飯」，與開「冷氣」而「打邊爐」，都是現代後工業社會的常態了。 所謂「秋香」，現代版是指煲仔飯的焦香。 此店「煲仔」最需要的加添，提升的，正是「秋香」，以達到「一揭濃香撲鼻」效果。 祝願他們會得到真正的自由(豉油)，生育更多款式的煲仔，在飲食王國得到了幸福。

近來多了在沙田一帶走動，晚餐不時在區內解決。沙田食肆主要集中在新城市廣場， 都是些千篇一律的集團式連鎖店， 總不想離開屯門也是光顧那一堆品牌食店，每次來到都寧願走遠一點尋味， 而我的目標是舊區當中的屋村食肆。 說到沙田，以前是乳鴿 、雞粥的天下，也曾試過為「沙田雞粥」慕名而來，但近幾年來這兩大名物表現有下滑的趨勢，反而是一提到沙田的大排檔，陳根記那響噹噹的名字就會出現， 想起來一直未有機會見識這家， 就趁今天來到陳根記見識一下。 對於外區人而言，要離開新城市廣場尋找美食，第一感覺就是不知從何入手， 但其實不少名店跟市廣場距離不遠， 例如前之前到訪過的盛記麵家位於瀝源邨，離新城市廣場只有五分鐘的步距而已。 只是陳根記要比盛記麵家距離更遠一點 ，雖然乘坐公共交通工具前來也不難，不過為求方便加上不用跳錶還是乘的士前往。 來到了禾輋邨， 一字排開都是具有港式風味的舊式屋邨，那是回憶的感覺，說到底我倆也是在舊屋村長大的，雖然是久違了卻是熟悉又親切。 在正中央處，那居高臨下的，燈火通明的，就是鼎鼎大名的「陳根記」。 裏面已經密密麻麻地坐滿了食客， 人多勢眾的關係未見其人先聞其聲， 遠遠也感受到哪種人聲鼎沸、熱熱鬧鬧的氣氛， 心想我倆是找對了地方。像這種大排檔的盛況實在是難得一見，食物質素此刻已是其次了，心裏有說不出的興奮。 採自助落單形式，好處就是免收加一，一貫大牌檔的做法，但搬到新店以後便要加一了。 陳根記每日都有一款特價菜式， 而且看起來都不是大路行貨， 像這天就有醉翁烏頭凍食($60)， 就跟潮式凍魚的做法差不多， 不過加入黃酒醉醃，吃起來多了一重味道。這烏頭魚魚身不算太大， 不過兩個人食用已是綽綽有餘。以 黃酒、椒絲、魚露醉醃， 酒香清香不嗆，但未算太過入美， 而烏頭魚亦不是新鮮貨色， 只是才六十元的菜式也不要太苛求 了， 其實味道是很不錯的。 而全晚最紮實的一道菜式就是梅菜扣肉煲($72)， 別看它是多麼的其貌不揚，至少沒有用上冰鮮五花肉， 扣肉雖然未算嫩滑鬆化， 但肉香是相當對版的， 汁醬用來拌飯十分滋味， 只嫌梅菜的份量有點太吝嗇了。 附近不遠處就是龍華酒店， 不過陳根記的專長不在乳鴿， 就不要對它的出品有太大的期望， 純粹就是想吃的時候便點吧！ 這兒的紅燒乳鴿($42)用的是BB鴿， 身型瘦削肉不會多， 燒乳鴿的油溫不足， 若不襯熱食用，放涼了連微微的脆感也會消失，吃起來有點靱而且肉汁很少， 也沒有太多的肉香， 如此定價大排檔來說是過高了， 某些酒樓定價還不如這兒的貴，但水準卻比這兒高一點點，還是建議不要點紅燒乳鴿好了。 及第粥($28)算是能維持大排檔的水準， 粥底挺綿滑，生滾的關係保留了豬雜的鮮味， 豬肚、豬心、豬肝算是新鮮， 味道倒是不錯的。 吃到一半，發現陳根記的菜式雖然定價不貴，但分量是有點偏小。知道芥末手撕雞是台店方名物，便加點一客例牌來試試。大排檔通常以鑊氣菜式為賣點，但陳根記卻以一道手撕雞打出名堂，是有點另類的說，不過回想起來小時候去吃大排檔，孩子喜歡吃的口味總不脫菠蘿排骨、腰果肉丁等幾味簡單香口小吃， 手撕雞確是人見人愛，很適合老少食用，也難怪會大受歡迎的。 Wasabi蟹籽手撕雞($82)除了雞絲以外，還有蟹籽、火腿、青瓜絲，吃起來冰冰的十分消暑， 不過芥末味稍嫌不足，吃起來刺激感不痕不癢的， 而手撕雞只有淡淡的雞味，是醃味不足，除了加入蟹籽令口感豐富一點之外，其實味道是有點平平無奇的說， 但相信會是小朋友喜歡的口味。 相對其他屋邨大排檔，陳根記那規模實在是前所未有， 另闢一個空間專賣甜品的大排檔，我倆還是第一次見識到，此甜品部需要自行前往下單和取甜品的，勝在省得轉場吃甜品了。不想眼闊肚窄，沒有點馳名的炸芒果，而是點了原個西瓜汁($32)， 就如青衣戲棚、美食市集所賣的那個原個西瓜一樣， 價錢也未見得便宜， 但勝在內有足量西瓜汁， 還有 西瓜肉和西瓜粒， 香甜又解渴， 確實是消暑佳品，是大排檔「啤啤佢」以外的另類選擇。 陳根記是名副其實的「大排檔」， 今天慕名而來實在令人大開眼界， 大排檔就是要有如此沸沸揚揚的氣氛， 不過論到食物質素，其實就跟各區的屋邨大排檔分別不大， 在味道上也不見得有個人之處， 但能在今時今日領匯的「霸權」之下，在舊屋村裏經營如斯規模的食店， 而且能做面面俱到游刃有餘， 便莫論其食物質素是否出色了。實在感謂香港能有如此氣氛的港式大排檔， 就為感受那熱鬧氣氛已是值得一遊， 若然有外地來的朋友，必需要帶他到此一遊，感受一下什麼叫做「香港味道」。

中大山城的美食名聞遐邇， 只是作為這座山城的過客，這尋覓過程遠比想像中困難。就說那以檸檬批聞名的李卓敏基本醫學大樓小食店吧， 每次不是找不著去路就是到達得太遲， 最終也是未能吃到傳說中的檸檬批， 只有安慰自己那檸檬批已是今非昔比， 果然吃不到的檸檬批是特別酸的。 經歷過尋找中大檸檬批作戰失敗後，不覺間掌握了中大校車的行走路線，並轉移了尋味的目標－以吐露港美景見稱的Cafe Tolo。沒有花上太多時間便找著了，乘坐校車三或四號在陳震夏宿舍站下車， 右前方的和聲書院便是Cafe Tolo之所在，只要一推開露天餐廳的玻璃門，眼前就是一片開揚的景觀， 這兒的露天茶座是無比的寬廣。沒有多作細看便一個箭步走到室內， 只因知道這兒的窩夫製作需時，而自覺上課時間也快到了，再美的景緻還是留待點餐後才細看吧！ 本想試試在Intagram曝光率最高、最美的花型窩夫， 但店員表示這款已沒有在賣了， 而另外兩款特別版的甜點，那份量看來是給學生們三五知己分享的， 如此看來就只有兩款窩夫和一款多士可選了。其實以甜點作為正餐已十分犯規，但作為中大的過客，這窩夫名物還是不可不試，那就不會在乎旁人的奇異目光。 點一客甜蜜蜜窩夫($40)，在我這過氣學生眼中是超值，但在中大來說就屬中價消費了。這兒的窩夫是新鮮即做的，空氣裏彌漫著甜甜的香氣 ，而等待的時間也沒有很多，約十分鐘便做好了，好讓我吃過午餐後能準時上課。室內有暖暖的日光加上舒適的溫度，若然不怕熱的可以選擇露天茶座，能居高臨下飽覽吐露港的景緻，也難怪會成為山城美食熱點之一。 不過這天陽光實在猛烈得很，雖然Movenpick雪糕球實在是堅挺無比，但無論是桌椅、甚至是食具也是灼手的熱，最後我還是比雪糕更受不了曝曬，走到太陽傘下躲避太陽去了。 新鮮即做的窩夫自然是外脆內脆，蛋香也是對得起價位的程度，伴以Movenpick雪糕更是個加分位，雖然只有巧克力、士多啤梨及雲呢拿三款口味，但都是最受歡迎的雪糕口味。 所選的士多啤梨一向不是我的心水口味，但配上窩夫卻是相當搭調，甜美的粉紅增添了賣相，濃郁的果香雪糕帶點果肉，這家的雪糕的奶滑綿密較高，平常會覺得這家的果味雪糕偏甜，但跟巧克力醬和窩夫同吃甜度剛好，再加上配搭的水果味道清甜，這家的窩夫水準確是超乎預期。 直覺這家的咖啡水準不賴，只是酷熱天氣是會讓人失卻理智的。選上藍橙薄荷梳打($38)純以賣相作為考量，因此也要為膚淺的選擇付上代價。店員用咖啡紙杯盛載飲料，自然沒有了冰涼透心的視覺效果，一撮薄荷葉就是個幌子而已，整杯是藍橙糖漿的人工味道，定價還如此貼近窩夫的價錢，這梳打特飲還是不點也罷。 說只為山城美景而來，對Cafe Tolo是有點不公平，這家的窩夫甜品水準，是會讓慕名而來者感到不枉此行的。Cafe Tolo以顧客自助的形式運作，服務就如其他大學飯堂無異，這讓我不期然想起山城的另一端，那家小小的Coffee Lover，那位浪漫又專注的咖啡師，它始終是山城裏的我的最愛，只是中大山城內的餐廳各有個性，無論是Cafe Tolo、Coffee Lover、蘭苑餐廳等等都有其過人之處的。有說中大是地靈人傑之處，中大美食也可說是名不虛傳，若有緣成為中大的過客，不只天人合一、也不只未圓湖，這山城也是值得路人為美食而停下腳步的。