[ 論盡樂評:4/10 ] 炎明熹《真話的清高》 MV: https://www.youtube.com/watch?v=D5frN9bPlUo STUPID review: 青春期唱更年期 其實,揀呢首歌俾炎明熹嘅人,有冇考慮過其實佢嘅年紀呢? 呢份歌詞如果交俾一位 40 多 50 歲嘅女歌手唱,或者會係屬於佢哋嘅心聲,代入感都會大好多。然而,炎明熹只係一位 16 歲嘅妹妹,你卻俾一份看破愛情謊話嘅歌詞俾佢,哪怕佢能夠演繹得再好,都只會係衣不稱身。16 歲嘅愛情觀,邊有人會認為係已經看破一切?真係用少少腦去諗吓,你都會覺得呢件事相當離地。不過,當呢件事出現喺 TVB 旗下歌手的話,又好似好正常呀呵? 其實一個歌手要去演繹一首歌曲,佢必須要從佢嘅人生閱歷當中搵到共鳴,先可以用佢嘅心情投入演唱,然後唱出歌曲嘅神髓。除非炎明熹響訪問入面會話俾大家聽,我呢個年紀已經經歷過好幾次戀愛,然後不停俾人欺騙感情。否則,佢究竟可以點樣投入響呢首歌曲當中呢?莫講話 16 歲,分分鐘一個 36 歲嘅人,都未能夠看破呢種世事啦! 於是,佢只可以從聲線去投入一首歌曲,而呢一個絕對係第二項選擇,亦都係次一等嘅選擇。於是我哋聽到呢一首歌嘅演繹部份,炎明熹用咗一種相當 chok 出嚟嘅聲音去演繹,但佢又 keep 唔到整首歌都係呢個唱法喎,當你聽到一啲高音位嘅時候,佢會突然放輕咗把聲,hold 唔住嗰一把聽落好似好紮實嘅歌喉。但話分兩頭,其實嗰把突然放輕嘅聲音,先係佢真正嘅聲音,而且嗰一種嘅放鬆,比起前段其他 chok 出嚟嘅聲音好聽,亦比較自然。然後又因為 90% 時間都係 chok 緊聲,就令嗰把最自然最放鬆嘅聲音,響歌曲之中變得兀突唔和諧。所以,呢隻歌真係有一種好錯好錯嘅感覺。 你話呢隻歌嘅問題應該邊個負責?我會覺得選曲上係 A&R 需要負第一個,亦係最大嘅責任,因為你真係唔會搵一首更年期先唱得通透嘅題目,俾一個 16 歲妹妹去演繹。第二,監製都要負好大責任,究竟佢清唔清楚佢嘅吸引力響邊,甚至,呢種 chok 聲唱法或者 10 年前的確係流行而且受歡迎,但到今時今日仲係唔係一個所謂唱功好好嘅標準聲音呢?呢一點相當存疑,因為連內地都已經唔再興呢一種聲音,連出名 chok 聲嘅 G.E.M. 都會搵其他方式演繹啦。至於歌手,我相信炎明熹響呢首歌上面應該都冇 say 嘅,咁暫時就繼續觀望態度,希望佢嘅公司可以明白應該要點樣去做一個 16 歲嘅女歌手啦。 《真話的清高》主唱:炎明熹 作曲:Raphaella Mazaheri-Asadi / Luke Juby / Harry Rutherford 填詞:黃厚霖 編曲:Luke Juby 監製:韋景雲 唱片公司:星夢娛樂集團 The Voice Entertainment Group #炎明熹 #真話的清高 #黃厚霖 #LukeJuby #韋景雲 #星夢娛樂 #派台歌 #新歌 #廣東歌 #STUPIDreview #論盡樂評 ----- 想睇更全面?論盡音樂? 記得 follow IG: https://www.instagram.com/stupidmusichk/