［踏破鐵鞋盧覓雪］ 2021年7月5日 魚子醬 電子消費券琴日朝早6點接受登記，香港市民可選擇以八達通、Tap & Go拍住賞、支付寶香港或WeChat Pay HK領取電子消費券，政府表示，截至琴日下午6時，已有約155萬名市民經計劃網站進入登記平台遞交電子登記，有記者早上9時後登入指定網站，若使用「智方便」應用程式，網站顯示有超過23萬人輪候，須等待多於一小時才能進入。合資格又成功登記嘅市民，八月一日獲發第一期消費券，而登記將於下月14日截止。 咁啱琴朝早搭的士，電台新聞報道緊呢單嘢，我問司機大佬會用嗰五千蚊買乜嘢，佢話自己鍾意飲咖啡，會買啲靚嘢飲吓，又話會去買平日唔捨得買嘅貴嘢，好似花膠咁食吓。 我都即刻諗吓有啲乜嘢貴價食材係我平時唔捨得買嘅呢？答案係魚子醬。只不過一罐30g嘅Oscietra 鱘都要千六蚊，以我個口嘅size，3啖食完喇！ 健力士世界記錄大全，最貴嘅魚子醬係伊朗嘅頂級beluga大白鱘，二萬英鎊一公斤，當佢兌十蚊港幣，除番條數30g就要六千蚊，真係啖啖金！上個禮拜仲食緊生日飯，去咗中環五星酒店入面間三星法國餐廳食晏晝，開胃菜係一味大概都有10g重嘅魚子醬伴住隻生蠔，雖然睇餐牌時理解到隻生蠔先至係主角，但上枱時，魚子醬同生蠔係排名不分先後大細嘅主角。生蠔本身都鮮美無比，仲要有魚子醬混合埋，真係以本傷人嘅一道菜。 呢一餐個頭開得好，第二道菜係湯，凍熱任擇其一，熱嘅係海鮮湯，我就揀咗粟米凍湯，啱晒炎炎夏日吖嘛。我嘅主菜係將兩種唔同嘅魚打成mousse，概念同潮州魚蛋類同，清爽之至，啱晒減肥中嘅我。由於戒咗甜品，唯有點咗芝士收尾，五款唔同狀態、味道、軟硬俱全嘅牛奶芝士，每款都令人回味無窮。 呢餐晏食咗四個鐘，好食又好傾，爽過爽皮，最妙嘅係呢間餐廳開業十六年，當初因為係新屎坑，都去咗好多次，但係一直唔欣賞，搞搞吓冇再幫襯大大話話都有成十年。今次見佢攞埋三粒星，請食飯嘅朋友幾乎要做人格擔保，覺得都係時候可以再畀次機會佢，就係咁，重新發現佢可以上番我張餐廳候選名單，好喇，嗰五千，都唔夠我食幾多啖魚子醬，分三餐去食好似開心啲，一於encore ！