【心得文】想平靚正健身 教你點樣執雞康文署簡介會
近年流行Keep fit，女士想slim、男士就想操大隻，坊間係好多健身中心集團，不過價錢未必平，加上有集團曾經爆出過sales誤導客人嘅醜聞，2016年California FITNESS更加係突然結業，更令好多人損失慘重，特別係買咗年票果啲消費者。不過其實有一間「健身中心」係唔會執之餘，收費仲好平—就係我哋政府轄下嘅康文署嘞。
康文署好嘅地方，就係平得來設施都算齊，而且一樣有教練坐鎮，不過就唔好奢望有賓至如歸嘅感覺喇，但就啱晒budget有限嘅人。但其實唔少人都聽過話要用到康文署健身室設施困難重重，不過坊間唔見有人詳細咁講下心得，就等積臣今次分享下心得喇。
康文署健身室設施每日平均6蚊
康文署健身室設施分兩種收費模式，一種按小時收費，另一種係月票制，全日制學生、60歲或以上的長者、殘疾人士有優惠。如果你係經常去嘅話，買月票最抵玩，平均每日只係６蚊。
星期一至五6pm或以後、星期六1pm或以後、週日及公眾假期：14蚊、7蚊（優惠收費）。
星期一至五6pm之前、星期六1pm之前（公眾假期除外)：13蚊、7蚊（優惠收費）。
月票︰每月180蚊、90蚊（優惠收費）。
點樣先用到健身室設施？
要用康文署健身室設施之前，你先要係要屬於下面4項合資格嘅人士。除非之前係出面玩開健身活動或者係大學完成過健身課程，否則一般人都要參加康文署嘅簡介會或者訓練班。
曾參加康文署「正確使用健身室設施簡介會」並通過測試；
曾參加康文署在2006年5月或之後舉辦的「器械健體訓練班」而出席率達8成或以上；
持有康文署健體金卡；
具備中國香港體適能總會認可的同等資格。
「正確使用健身室設施簡介會」同「器械健體訓練班」每個月都會係康文署網站公布報名日期，參加「正確使用健身室設施簡介會」係免費，而「器械健體訓練班」就要收75蚊。其實收唔收錢都唔係重點，重點係兩班的報名人數都好踴躍，有人更加嘲笑抽到中等同中咗六合彩。唔想每個月等運到，好多人知道可以候補，其中簡介會最多人執雞。
點樣最易成功執雞？
要成功執雞其實唔難！首先你要去一間位置唔太方便嘅康文署體育館，最好唔好揀市區，或者係市區但比較山旮旯嘅體育館，例如順利體育館。
第二，日子方面最好揀星期一至五（避免黃昏時間），或者周六、日晨早時間，因為會無咁多人爭。同埋最好去一間體育館會連住搞幾場嘅簡介會，因為候補一場衰咗，仲有另外一場，而候補人龍係順住落。
之後就係排隊時間，如果唔係多人嘅繁忙場次，早一個鐘前排隊就OK，其他時間建議早兩個鐘之前，當然，愈早排隊就愈大機會執到雞啦。去到體育館，通常已經留咗一排櫈畀輪候人士等候。通常喺個簡介會開始半個鐘之前，職員就會派登記表畀候補人士，如果簡介會係多人放飛機，就愈多人執到雞，而康文署容許原中籤者最多遲到15分鐘，所以係見到唔少人係臨尾一分鐘衝綫嘅有趣現象。
特別係冬天，係會少咗人做gym的，我諗係啲人太凍唔願去喇，所以執到雞嘅機會又大啲。如果你成功執到雞，我恭喜你呀，因為基本上你pass咗喇，之後你要做嘅就係睇片，睇下教練教點用健身器材，最後就係10分鐘考試。考試唔難，基本上你上堂無遊魂同埋有common sense，其實都9成9都pass到，例如其中一題「使用健身室之前要做甚麼」，答案梗係要熱身喇……
當你考完試，等一陣就會即場派結果，如果你pass咗，就會收到張通知書，揸住張紙就可以用健身室設施。幾個工作天後，資料就會入咗系統，之後出示身份證就可以了。到呢度，祝各位男士係新一年可以操到變型男，女士變窈窕索女。
【作者簡介】90後製作公司打雜，熱愛打機，亦愛行山吸收靈氣，希望快啲儲夠錢享受人生。
撰文 : 積臣
欄名 : 積財有計
