現時各區街市範圍嘅系統都係由拾荒者、清潔員將發泡膠箱,以一條六個方式紮好,放到街角、後巷等待夜晚大菜車落完貨,將空箱運回大陸菜場。
係因為有 Incentive, 吸引到有需要嘅人拾嚟賣錢,以推動回收嚟講,其實可以話成功。
但着眼點係發泡膠箱體積大,放係邊都一定佔地方。要解決阻街問題, 咁就應該劃分指定暫存區。可以試下分指定時段擺放,其餘時間為禁區。 與菜車相討收集時間和次數,儘量減低阻街機率。
室內有管理嘅街市,基本上係無難度, 但地舖蔬果檔, 即使左攝右攝,到咗閂舖都係會放係街幾個鐘等車到,一樣會有人投訴。
以前有好多菜場,回收場都係深圳範圍,菜車都可以走到兩三轉箱。其後因為城市發展,令好多回收場都北移到東莞、順德等地,變成好多菜車只走到一轉。 加上近期中港車司機檢疫,令物流上遇到更多難關。
香港其實有條件去建立發泡膠箱回收系統,好多菜場批發時段後都好空閒。 唯獨是處理前要搣膠紙,搣 label搣到手抽筋,變成整體成本太高,利潤不及轉運返大陸高,故此吸引唔到人做。
如果丟入堆填區,一樣要車費、時間,落到堆填區要用幾十年時間去後續處理,長遠計可以係天價。
建立一個回收場,即使由政府補貼,都一樣節省到天文數字嘅公帑。 物料既可以回收,污染上嘅代價降至最低,成唔成事,只係肯唔肯做嘅關鍵!
我地曾經向街市管理者提出安裝回收機於場內,但被拒絕了,係因為單位用途條款所限。
咁新建成嘅街市,就應該係規劃時設計好完善嘅廢物處理及回收配套, 仲要預計有廢物徵費時嘅減廢及分流措施。 不過,唔多覺啲設計師會識去重視。
食環署雖然有責任去清理好街道,但都唔好粗之過急乜都淨係識運去堆填區。 荃灣潔淨組過往遇到發泡膠清唔切,都會運嚟畀我地,儘量做到回收。 思維上應該要有進步。
人地老人家為糊口,去辛勞,間接地都幫緊堆填區分流,唔好將責任怪責於佢地。
以生產者責任原則,菜販係有責任將發泡膠妥善處理,因為佢地賺錢時衍生出嚟,應該花少少成本安置好。
污者自付原則,每個買餸嘅人都間接有責任,因為啲菜係要由好遠運落嚟香港,唔係好難保鮮。
以前本港還有農業時,運輸路程短,好多菜都用竹籃裝放,賣完就回籃。以前食碟菜,邊會好似而家咁暗藏幾粒發泡膠!
最後, 希望大家如果知道翠屏花園嘅發泡膠箱真係被強逼丟去堆填區,懇請大家幫忙搣一搣膠紙,集中後送嚟畀我地處理。
清理乾淨嘅話,我地可以再搭路睇下有無鄰近回收場可接收處理 !