【家長之苦】仔女聖誕派對準備食物玩謝爸媽 菠蘿腸原來常滯銷!|香港01|熱爆話題

【家長之苦】仔女聖誕派對準備食物玩謝爸媽 菠蘿腸原來常滯銷!

撰文:
最後更新日期:

聖誕假期臨近,不少小朋友本周在學校舉行聖誕派對後即放長假,惟這個派對卻難倒不少家長。為準備派對食物,不少爸媽會專攻簡單食物,如三文治、燒賣等,惟原來必備的菠蘿腸仔竟非常滯銷,亦有小孩直接落單要「指定食物」,卻未必人人識整,款式玩謝不少父母。有港媽表示,為孩子準備派對食物着重靚,味道屬其次,更分享其玻璃曲奇食譜,供同路人參考。

不少家長為孩子準備學校聖誕派對禮物時,都大感頭痛。(GettyImages/視覺中國)

不少家長對為子女準備什麼食物都大感頭痛,只能上網求助,獲網民熱烈回應。(fb群組「Tai Po 大埔」截圖)

下載「香港01」App ,即睇城中熱話:https://hk01.app.link/qIZYuEC5LO

成人開派對愛叫薄餅、壽司或到會食物,只要花錢就可解決煩惱,在孩子的學校聖誕派對,卻一般會請家長幫忙準備食物,不少爸媽因而被考起,每每都爭選最簡單的小食,例如雞翼、三文治、魚蛋燒賣、菠蘿腸仔等,甚至有人指為方便直接準備包裝零食就算。

惟懂吃不代表懂做,最受家長歡迎的菠蘿腸仔也可能考起零廚藝爸媽,有人在討論區求助,查問菠蘿腸仔的做法,具體如選哪種腸仔,是否要是淥過,罐頭菠蘿是否要事先浸水等,也毫無頭緒。

不少家長為求簡單方便,會為子女學校派對準備菠蘿腸,惟原來在孩子的世界,這並不太受歡迎。(網上圖片)

不過家長所愛原來非孩子心水,菠蘿腸仔常在派對中滯銷。

「頭先放學,我見到有同學仔派對後要成盆菠蘿腸仔帶走,個樣好失落呀!」在facebook開設專頁講述與女兒親子生活的「皇帝囡媽媽」,接受《香港01》訪問時表示,孩子們開派對時重視外觀多於味道,大多會選吃較特別的食物,相對普通的菠蘿腸仔自然易被忽視,日前在女兒的聖誕派對後,再次目擊菠蘿腸仔帶回家事件。

網民熱心分享聖誕派對小食,想知有咩計,即睇:
+4
+4
+4

皇帝囡媽媽指,去年製作薑餅人亦嚐失敗滋味,雖家長大讚好食,惟小朋友不太喜歡,她才想到薑和肉桂等味道非人人喜愛,故今年為10歲女兒準備芝士蛋糕作為派對食物,並特別準備玻璃曲奇送給女兒的好朋友,令女兒很高興。

「家長不用想得太複雜,細路仔其實唔識欣賞!」她表示早在女兒K1時已開始幫女兒製作食物帶回學校,最初以簡單為主,因較小的孩子並沒有太大追求,反而方便食的東西就較適合,至女兒升上小學開始有想法及要求,甚至會點名要求媽媽製作指定食物,「她會鍾意整得靚的食物,會想向同學炫耀一下」。

就如今年女兒開口要求的玻璃曲奇,皇帝囡媽媽指「真係心機嘢」,前後試了兩次才成功,當天也花足3小時才做了20多塊,當中最大難度是印模,要不斷反覆搓麵團再攤平,雖做到「人都癲」,惟看到女兒的同學們搶食,也覺很值得。

她又稱根據其平日與家長交流,發現他們為子女準備食物,常抱怨「睇就易,做落手真係好難」,經常出現成品現實與理想不符的問題;因應大家的煩惱,她稱平日會分享較易做的食譜予身邊媽媽,不過如果對方平日少做,縱使照住食譜落手煮,也未必可以做出心中的水平。

皇帝囡媽媽教授玻璃曲奇製作方法:

皇帝囡媽媽今年特別為愛女製作玻璃曲奇作聖誕禮物送給好朋友。(受訪者提供圖片)

材料:

牛油 100g

糖 100g

雞蛋 1隻

低筋面粉 260g

泡打粉 1/2茶匙

雲呢拿油 2滴

Fox糖

裝飾糖珠珠

朱古力筆

做法:

●先將牛油和糖打發

●加入雞蛋,雲呢拿油再打至均勻

●加入篩好嘅麵粉同泡打粉拌勻

●用保鮮紙包好放入雪櫃雪30mins

●碌平cup模

●放入已預熱170°c焗爐,先焗15mins取出

●將fox糖整碎,加埋糖珠珠放入曲奇餅窿窿

●再焗多5分鐘或士直至將fox糖焗溶

●放涼再用朱古力筆畫樣

立刻Like!讚好《01熱話》:


請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。