王菲日本行有秘密行程　謝霆鋒回國後急急圍爐醫肚

樂壇天后王菲同謝霆鋒復合10周年，二人早兩日再度喺機場放閃，打情罵俏又當眾撒嬌，似足真人騷咁好睇。據知，今次二人係去日本北海道二世古度假，王菲陪霆鋒玩單板滑雪，又共度中、西情人節，Sweet過蜜糖。點知有網友就發現，二人蜜遊日本原來仲推有秘密行程，疑似去東京港區赤坂為一間米芝蓮餐廳開張現身。該餐廳於今年2月喺當地開張，相中見花籃上面寫有祝福語：「祝御開店 創新而不失初心」，署名則為王菲及謝霆鋒，大方晒真名，公開喺海外放閃。

而二人玩完返到北京，霆鋒亦即被網友偶遇，有網友指於一間平民火鍋店撞到佢打邊爐，又晒出合照寫道：「閨蜜聚會，萬萬沒想到偶遇了謝霆鋒！要知道今天一天被他和菲的同框刷屏，沒想到遇到了真人，閨蜜一個箭步求到了合影，童年偶像真是又帥又nice。」仲獲網友大讚佢皮膚緊緻，駐顏有術。