「婚變」變「婚訊」　傳王維基袁莎妮好事近

人稱「魔童」嘅港視主席王維基上周高調宣布，有意參選立法會，更自爆「處理緊婚姻狀況」。佢身邊人透露，佢老婆唐靄玲（圓圖）啞忍佢嘅誹聞好多年，「佢哋早已貌合神離，分開遲早的事。」據悉，兩人去年底搞離婚，手續至今未辦妥。

據了解，佢哋識於微時，九○年由加國返港結婚。唐畢業於浸大工商管理系，結婚時報稱係行政秘書，婚後做過IT人、開過公司，之後專注家庭。兩人育有一仔一女，個仔曾喺港島某名校唸小學，唐靄玲一四年曾做過該校家教會代表。

「魔童」得一賢妻似乎仍未修心養性，身邊嘅女人氹氹轉，有傳頭號情人﹑四十六歲嘅總商會總裁袁莎妮同佢好事近，「佢哋好穩定，唔排除有好消息。」

據了解，袁莎妮早於○二年，擔任工商及科技局局長唐英年政務助理時已識「魔童」，消息人士透露：「當時佢主管電訊廣播，同魔童經常因為公務見面。」之後兩人慢慢有私交，袁莎妮多次為王維基嘅公司活動撐場，仲經常畀傳媒影到佢哋密會。

「魔童」上周高調宣布有意參選，自爆正處理「婚姻狀況」。更有傳佢與袁莎妮（上圖右三）好事近。

誹聞多多的王維基，除咗畀傳媒影到與袁莎妮密會外，亦多次被拍到與助理Hazel睇戲。

「魔童」感情生活立立亂，似乎唔多討好女選民，加上佢○八年掌管亞視時，公然喺一次試鏡會上，問亞姐們「你個波（胸）係唔係假?」，被指性騷擾及侮辱女性。年前佢捲入一宗內地桃色事件，鬧得沸沸揚揚，後來不了了之，據悉內地相關部門仍未解決事件。

有政界中人相信「魔童」今次參選同自由黨夾過，「佢已經同田北俊食飯打招呼，田少講咗唔選港島，如果魔童頂上，有望全取自由黨喺這區的一萬七千多票。佢對深藍或深黃陣營的沖擊唔大，最影響葉劉這類中間建制派。」

也有人分析，「魔童」喺政府重審港視電視牌照前夕宣布有意參選，時間太巧合，「佢藉着選舉凝聚社會焦點，令被人遺忘的港視再成為熱話，政府重審港視發牌時，感受到社會壓力。」

至於話「魔童」唔排除選特首，政壇中人認為佢「吹水」成分居多，消息人士續稱，不論「魔童」動機係乜都好，佢在選民、特區政府及中央政府心目中嘅「忠誠度」存疑，想撈講數籌碼，恐怕只會計錯數。