【童星大個仔啦】 王秉熹執導畢業作得獎 細佬Jacky仔重返無綫拍劇

無綫劇集大家應該睇唔少，唔知你哋又記唔記得王秉熹同王樹熹呢兩兄弟呢？曾經係童星嘅佢哋，而家已經長大成人，兼且多才多藝。最近Jacky仔仲重返無綫拍劇添呀！

現年分別24及20歲嘅王秉熹（Jeffery）和王樹熹（Jacky仔），曾經係活躍童星參與過唔少劇集，好似王秉熹就飾演《十兄弟》大喊十、《施公奇案》施世綸童年及《亂世佳人》顧天祐等等；而細佬Jacky仔就飾演過《翻新大少》嘅Jacky仔、《爸爸閉翳》閔宇恆及《奪命真夫》阮仁洛等等。

佢哋拍劇拍到中學，就讀band1名校嘅佢哋，因為專注學業嘅關係而停止幕前工作。細佬Jacky仔於城大修讀媒體與傳播系，而哥哥Jeffery就喺上年已經畢業於浸大電影系。Jeffery親自執導拍攝畢業作，作品更嬴得「全球大學電影獎」更成為唯一一位香港學生獲得呢個獎項，真係叻仔呀，希望佢可以盡快實現佢嘅導演夢！

Jacky仔上年喺社交網站分享自己嘅GPA成績高達3.7分。最初佢入行都參與好多教育電視同廣告，加入無綫後第一部劇集就係《皆大歡喜》飾演大B。而比較多人認識佢嘅原因，係因為佢於2005年時參與劇集《翻新大少》。劇中飾演歐陽震華仔仔「Jacky仔」, 因為水汪汪眼睛、可愛活潑、精乖靈利，同埋演戲演得自然，所以深受觀眾愛戴。後來，佢參與嘅劇集更比哥哥多，不過因為媽媽同樣想佢專注學業升到第一志願學校，所以當Jacky仔讀到小五，媽媽就幫佢停晒手頭上工作。而近日佢喺社交網站就分享自己有份參演劇集《她她她的少女時代》嘅相片，期待你嘅新作呀！