謝安琪（Kay）除咗出名唱得，同老公張繼聰嘅婚姻生活一樣矚目，兩人由出道「節外生枝」生小朋友、互相撐對方走過事業低潮，到後來成為愛情事業兩得意嘅模範夫妻，結婚12年愈來愈閃，Kay近日仲做埋老公御用Model閃到盡，生活亮麗，係不少人眼中嘅「女生勝利組」。Kay成功背後到底有咩「人妻的藝術」？現在就來解構謝安琪5個人妻的藝術，睇下你又有冇潛質跟她一樣做知性女神？
登入 瀏覽本網站，可獲取積分換領專屬優惠
點擊查看專屬優惠
謝安琪5個人妻的藝術：1. 貼地
不少名人紅星都愛奢華生活，但謝安琪出名「貼地」，買落大屋亦深居簡出少有炫富，而佢由出道至今都未有「變調」，樸實與老公張繼聰平實生活，一度被KOL同網民封最正「Ｂ餐」，唔只講緊佢去茶記又或者身體力行鼓勵粉絲用環保產品，仲有唔少大時大節，佢都係同老公仔女貼地過節，好似中秋節帶囡囡去屋苑中秋迎月晚會咁，簡單感受節日氣氛就好開心！
咁結婚12年點維持咁好感情？謝安琪同張繼聰似乎一樣係知足常樂，過時過節唔係大鑼大鼓開豪華Party，但兩小口一樣滿載溫馨。
最令一眾男士大呻做壞規勛矩就莫過於上年情人節，張繼聰話老婆唔要物質禮物，要難忘又冧豬嘅嘢，最後佢帶謝安琪去尖沙咀海旁，自彈自唱送驚喜，女方甜笑嘅樣原圖直出，閃到網友眼盲！
最近謝安琪又於Ig發功，上載自己匿入老公臂彎嘅相，多謝對方俾偶爾俾自己做小朋友，放閃同時賀生日，簡簡單單都可以活得相當幸福亮眼！
謝安琪5個人妻的藝術：2. 忠於自己
唔少女士熱戀時會失去自己，唔少明星成功上位亦會被名利吞噬，但謝安琪由出道至今的形象與生活態度一致，都係忠於自己！唔信？記唔記得佢初出道成名之際出「意外」，但仍坦然開記招自白與張繼聰未婚懷孕，懶理人指點亦未有「潛水」，勇於承擔。
於《節外生枝》唱出「我所愛 我不改 千夫所責也不放 不愛看的不要看 也許我已厭了直航」更見唱出心聲，為自己人生護航，最後產後復出更爆紅，以行動令人折服，勁有型！
忠於自己都係人妻嘅藝術？愛情唔只係兩個人連體晒恩愛咁閃，無論男女，活出自己嘅亮點都係好女養眼，依賴另一半、失去自我又無主見，戀愛大過天嘅男女，有幾何令人感覺出眾？
唔係叫大家揀同謝安琪行一樣嘅人生路，而係要向佢忠於自己，為生命承擔嘅力量借鏡！
謝安琪5個人妻的藝術：3. 勇於作出大膽選擇
唔好誤會，呢度唔係講緊做女人要犧牲事業先換到幸福！呢度講嘅，係一個選擇，係有「可以選擇嘅能力同氣度」先令人值得學習，就算做Working Mum，都係一個唔容易而同時亮麗嘅選擇！
謝安琪爆紅期間，2016年毅然宣布無限期暫別樂壇，同年9月宣布懷有第2胎，當時，佢同老公已經育有9歲嘅囝囝，想追多個小朋友就決心先放低事業，產後亦推Job，為餵足1年人奶而努力，親身陪伴仔女成長，無論有冇條件支持，每個為家庭而作出讓步的決定都值得敬佩。
謝安琪5個人妻的藝術：4. 知性美
90後嘅粉絲可能以為謝安琪嘅事業愛情一直順風順水，其實佢除咗出道初期就曾經停工結婚產子，後來復出又因為爆肺而影響歌唱事業，更曾被傳媒一面倒寫成走音天后，處處Haters，更一度被屈撻著人夫陳 奕迅 ，自己老公又被形容為「廢柴老公」，當紅歌手變「負皮王」，但謝安琪亦與張繼聰默默抵抗流言，鮮有埋怨，縱被輕微抑鬱症打擊，最後亦康復，頑強過生活，最後生活愈見養眼！
謝安琪近年不時提到人生中，最重要是要 「好好閱讀自己」，審視自己的生活，同時學習接受和欣賞自己，增加自信，人亦會豁然得多：「正因為人不會完美，才成就出獨一無二的你，才有為你而設的人生。」
謝安琪自言透過閱讀自己，令佢可以勇於全盤接受內在美與醜，女士知性的內在美，更見動人。
謝安琪5個人妻的藝術：5. 毫不隱藏對社會的情感
謝安琪嘅Fans都會知道，偶像愛閱讀亦愛社會，內心情感滿溢，常見於歌曲之中，份外撼動人心！謝安琪多首歌曲都充滿本土特色與情懷，包括《我愛茶餐廳》、《愁人節》、《雞蛋與羔羊》、《囍帖街》、《獨家村》與《家明》等，當中有傳遞保育信息、有敘述社會問題，都係少有流行歌手敢觸碰嘅話題，令佢更見敢言有氣質！
不少人因為生活營役而失去自己，為事業、為世俗形象而隱藏情感，可以逆流表達情感，體察社會大小事，廣傳正面訊息，需要無比勇氣，自然更見發光發熱。
而謝安琪生活上仲孖埋幽默又同樣情感澎湃嘅老公張繼聰，互相不掩飾情感，關愛社會又關愛對方，又襯又Sweet，點會唔矚目！