繼續史友們介紹香港嘅基建，上次就同大家講到過海嘅隧道，今次就想介紹香港最早通車嘅行車隧道—獅子山隧道。

獅子山隧道係第一條連接九龍同埋新界嘅重要行車隧道，穿過獅子山以西嘅九龍坳，連接咗九龍塘同埋大圍。講返起呢條隧道嘅背景，原來同1960年代香港發生嘅旱災有關。喺1960年代，香港政府當時就需要鑿通分隔九龍和新界嘅山脈嚟設立輸水管由船灣淡水湖連接港九市區，於是就順便建立一條可以容納兩條行車道同埋三條大管嘅隧道。於是，獅子山隧道車行管道就喺1961年開始動工，並且喺1963年貫通，1967年通車，比原定時間遲咗一年。

至於北行管道，其實係喺南行管道建成之後接近10年先開始通車，當時仲興建埋一條中華煤氣管道向沙田供應煤氣，隧道亦都係雙程雙線分隔雙管隧道。時至今日，獅子山隧道行車流量早已飽和，路政署亦計劃為啟用超過40年嘅獅子山隧道進行改善工程。

原圖嚟自網絡