總有些演員，不用出名，只靠某齣戲某一幕，足以讓你留下深刻印象。 像現年廿六歲、中越混血的劉氏兄弟（Luu Brothers）三胞胎，驟眼看連邊個打邊個也分不清；但說到荷李活大片《悍戰太平洋》（Pacific Rim）中，三位身穿盔甲的機械人駕駛員，立時有「原來係佢哋！」之感 。 卸下重甲，劉氏三子赤膊上陣，一身戰鬥格為本刊拍照，以《激戰》級肌肉示人，比戲中的機械人打怪獸更叫人熱血，「保持最美好一面畀觀眾睇，係演員嘅責任。」三人同行，乘以三倍的，不止魅力。「除咗氣場勁啲，工作動力都更大，起碼一個冧咗，仲有兩個人頂住。」 由美國轉戰亞洲擂台，也是靠這份如假包換的兄弟情，絕非得個講字。 有聲默契 相信我，劉氏三胞胎由面相到身形皆不易分辨，性格、談吐卻騙不了人：較文靜的是大哥Lance（劉智福），主要都由阿二Mark（劉智滿）負責發言，老么Charles（劉智堂）在旁和應，互補不足。老土講句，是默契。 「好似Charles想入學校嘅足球隊，我自不然會跟埋一份；大家有咩優點缺點，完全無得掩飾。」Mark嘗試解釋何謂心靈感應，但就算不講，拍照時也有眼見，三位在擂台自動波度甫士，你出拳我踢腿，表情也夾到絕。 只此一家 成長於加拿大的三兄弟，早在求學時代已群體出動，現身各大ＭＶ及廣告，真正當演員是兩年前的事。一路走來堅持不單飛，Charles坦言未驚過戲路被局限，「咁反而係一種特色，搵勻成個電影圈，都無三胞胎組合，有類似嘅角色，自然諗起你。」 老三絕非自圓其說，代表作《悍戰》已經說明，三人行自有吸引力，「我哋都係寄咗段試鏡片段畀劇組，睇吓有無回音，但係導演哥連慕迪多奴（Guillermo del Toro）睇過試鏡片段後，專登飛去多倫多同我哋講得咗！嗰份感動真係好難忘！」連寡言的Lance也說得兩眼發光。「拍攝過程亦好好玩，第一次拍綠幕，樣樣嘢都好新鮮，不過辛苦在要狂操體能同武術。」 畢竟三胞胎角色在荷李活太罕見，畢業於多倫多Ryerson大學工商管理學系的劉氏兄弟深明此道，轉戰亞洲市場擴大版圖，是明智之舉。「我哋暫時住喺北京，會stay多八至十個月。」「駐京」期間全力學普通話，未滿師已有電影企劃招手：「只能夠透露係日本製作，係動作片仲加少少科幻元素，算係我哋嘅老本行。」 熱愛挑戰 筆者膚淺，講完電影經，也要請教三位一身肌肉是如何煉成。不說不知，Charles這副令女士瘋狂男士妒忌的身形，原來已經比平常細了一個碼：「近排個時間表full晒，差唔多成個月無做gym！」 唔keep依然fit，除了感激父母優良血統，也因為日子有功，「我哋十七歲開始就做gym，咩都試吓。」健身方法不是甚麼秘密，只靠「勤力」兩個字：「最好一個禮拜去四次gym room，做吓HIIT（High Intensity Interval Training，高強度間歇訓練）、消脂循環訓練等，閒時再打吓籃球、排球；反而飲食方面唔使點戒口，除非撞着工作需要，就會食清淡啲，主要係雞肉、西蘭花同埋魚，加啲維他命supplement就OK。 「其實維持體態同做戲一樣，都係一種挑戰。偏偏我哋鍾意take the challenge。」Charles說穿了，心態決定境界。懶惰加饞嘴如你我，一個月健身四次都嫌多，所以話，有些機會及有些body，總是屬於有準備、有熱誠的人。 跟劉氏三兄弟拍照的好處是，度位、想動作不用磨合，一埋位便有火花。覺得唔滿意，會自動自覺講「嚟多個take啦！」三個都是完美主義者。 Lance 大哥 Mark 二哥 Charles 三弟 在《悍戰太平洋》中的兄弟幫機械人駕駛員，Lance說原本是設定成一對孖女：「後來導演哥連慕迪多奴（小圖）睇過我哋嘅表演，覺得好適合，索性改埋劇本。」 說好的新戲未開拍，劉氏兄弟已經要周圍飛，在上海、北京、越南等地的時裝活動，不時找到三人的蹤影，上周三（15日）訪港也是應邀出席Moiselle的時裝表演。 轉戰亞洲市場的原因之一，是為了跟劉嘉玲、劉德華等Lance口中的「偶像」合作：「我哋睇唔少港產片鮁，最鍾意《古惑仔》！」 擁有工商管理學位的三子，曾成立健身服裝用品公司「Trifect Athletics」，「不過暫時無新產品，可能幾年後再pick up番。」三位CEO都以演藝事業為重。 小三兄弟群體出動，Charles說對上原來還有個大一歲的哥哥，「雖然大家都好close，不過比起佢哋（指同兩位哥哥）始終爭啲默契。」 雖說是三胞胎，但在兩個弟弟拍單頭照時，大哥Lance也會在適當時候指導，不經意透露出老大風範。 阿二Mark最活潑、最多說話，也最愛笑。所以就算不開口，拍照時的大動作部分總是留給他，做訪問也永遠坐中間。 三胞胎中年紀最小的Charles，這天腳踝傷患未癒，但依然chok出氣勢，「所以佢最受女粉絲歡迎囉！」兩位哥哥笑說。 憑三子的男模身形，換上西裝look依然煞食，難怪至今依然是內地各時尚雜誌專訪的常客，「我哋都學緊普通話，方便溝通嘛。」 ▼劉氏兄弟初次亮相於〈The Kill〉的MV，演唱歌曲的樂隊30 Seconds to Mars，主唱歌手正是本屆金球獎「最佳男配角」謝勒力圖（Jared Leto）。 擇偶之 感應 不問不問，還需問到劉氏三胞胎擇偶條件，看看揀女友的準則是否同樣「有默契」。 為免弟弟被問到口啞啞，老大Lance搶答：「係男仔都希望girlfriend靚女，開朗又識講笑鮁啦，就算你（指筆者）都係鮁，所以溝通同了解係好緊要囉！」答案有點官腔，但大方得體，收貨。 倒是問到最喜愛的演員，三人同時脫口說出「佐治古尼（George Clooney）」的名字。原因不解釋。