8 大 Excel Tips! 教你解決循環參照警告
發布時間： 2019/07/02 00:00
最後更新： 2019/09/25 01:41
8 大 Excel 秘技上班必學 準時放工靠這招中同大家睇過 4 個幫助大家處理大量數值的 Excel Tips，來到下篇就等小記同大家分享一些，在用 Excel 時會遇到的問題和解決方法啦！
5. Excel Tips 按兩下搞掂過百個編號
在 Excel 想為唔同項目加上「1、2、3……」等編號時，無需人手逐個加，可以用同在上篇教過的第 3 招，按儲存格右下方黑點，去將數字複製到整欄。可能你迫不及待試過之後，發現出現以下問題，就係數字只會就咁 Copy & Paste，變成好多個 1 或者 2，而唔會自動疊加上去。其實解決辦法好簡單，只要輸入 1 同 2，並 Highlight 晒兩個數字，再按 2 那格的黑點兩下，下面的數字就會自動加上去了。
6. Excel Tips 善用「排序與篩選」
Excel 唔止係一個協助統計的工具，仲可以係一個整理資料的好幫手。小記就好鍾意用「排序與篩選」，去幫我短時間內在大量資料中搵出需要的東西。只要 Highlight 想篩選的資料上面一列，再按在工具列的「排序與篩選」，選擇「篩選」，儲存格上就會出現箭嘴。按一下箭嘴，就會出現篩選資料的選項，只要剔取想顯示的資料，Excel 就會幫你篩選出你有用的資料，自動隱藏其他內容，唔駛再俾全頁資料搞到眼花繚亂。想睇返所有內容，就只要在工具列「排序與篩選」下，按一下「清除」，所有資料就會出返曬來了。
7. Excel Tips「Alt + Enter」強迫症救星
呢個 Tips 未必對每個打工仔都好實用，但對於小記呢類強迫症末期患者來說，就非常重要。當儲存格太短，無法在一行內放曬輸入內容時，Excel 就會自動幫你移動多出來的字。但有時 Excel 的分句未必整齊，只係幫你將所有字塞曬入一格就算。呢個時候只要按「Alt + Enter」，就能夠在儲存格中開新一行，可以自己控制儲存格內的分行位置。呢個 Tips 令到 Excel 可以望落整整齊齊，老細睇到都會覺得你做野整齊有條理啦。
8. Excel Tips「循環參照」用「選擇性貼上」解決
最後想同大家分享的 Tips 比較複雜，但卻非常實用。唔知大家用 Excel 時，有冇試過出現「循環參照警告」呢個警告視窗呢？當用得比較多公式的時候，就有機會發生儲存格參考返自己，而無法套用公式的情況。例如在圖中，A1本身有數字「180」，而 B1 是公式「=A1+5」。當想在 A1 輸入公式輸入「=B1+5」時，由於 B1 本身是來自「=A1+5」，已經含有 A1。所以Excel 就會彈出警告，話你知 A1 參照了自己的數值，無法正確計算，並顯示藍色箭嘴，套用唔到公式。小記都曾經俾呢個問題煩過，而遇上呢個「循環參照」係有解決辦法的！
以上圖為例，只要 Highlight B1，然後按 Ctrl + C 複製，不過就唔好 Ctrl + V 貼上，而係先 Right Click，用選擇性貼上，將公式變成數字，就可以在其他地方直接引用呢個數值了。而且唔止可以用於一個儲存格，對一欄公式都可以用相同方法變成數字。
圖中紅色圈圈住的「123」圖示，就係選擇性貼上-變成數字的按鍵。
以上 Excel Tips 都係小記在用 Excel 遇上問題時親身用過的，未知大家用 Excel 時，有有冇遇過咩問題令你地頭都大曬呢？又或者有冇一些獨家 Tips 可以同其他讀者分享下呢？
撰文 : 張文啟
