《殭》監製叫觀眾進步 其實都講得無錯!|方以文|香港01|博評

《殭》監製叫觀眾進步 其實都講得無錯!

撰文:
最後更新日期:
我覺得陳監製佢有佢嘅道理嘅。你睇清楚佢講乜,重點係「唔係喺廚房聽劇情就可以知講乜,真係要追看先知」度。佢口中進步唔切嘅,係一班睇開無綫師奶劇嘅觀眾呀。
方以文

《殭》宣傳海報(TVB Facebook圖片)

大台齣奇幻電視劇《殭》終於喺星期日播大結局,最後一集最高收視只係得27點,平均就只有25.8點,同無綫投入的人力物力唔成比例。監製陳維冠接受《東方日報》訪問時,就講咗呢番說話:

「今次係想改變觀眾睇劇嘅習慣,唔係喺廚房聽劇情就可以知講乜,真係要追看先知,觀眾有時睇一、兩集就下判斷去批評,作為電視媒體要不斷去試,觀眾都要不斷進步。」
《殭》監製陳維冠

《殭》劇照(TVB Facebook圖片)

嘩,酸到呢……有網民話佢賴地硬,但我覺得陳監製佢有佢嘅道理嘅。你睇清楚佢講乜,重點係「唔係喺廚房聽劇情就可以知講乜,真係要追看先知」度。佢口中進步唔切嘅,係一班睇開無綫師奶劇嘅觀眾呀(頭盔:「師奶劇」係一個約定俗成嘅稱謂,我知道好多師奶都會睇日韓台美泰劇,亦都唔一定會睇啲大路唔駛用腦就追到嘅劇)。

大台嘅傳統觀眾最鍾意睇女人勾心鬥角,所以衝破香港電視史上最高收視50點嘅係《宮心計》同埋《大長今》。如果佢要安守老本,拍啲有基本收視嘅節目係有路可以跟嘅。今次大台叫較為年輕嘅陳維冠做監製,開拍《殭》,除咗動員大量演員,飛去荷蘭取景,投放大量資源之外,仲要搏一下啲CG做成點(結果畀人笑到臉黃),但最搏嘅都係挑戰一班只喜歡睇女人戰爭嘅觀眾,要佢哋去睇好耐無出現嘅奇幻劇種。如果用呢個方向去理解陳監製嘅說話,佢係啱嘅,啲師奶觀眾的確係進步唔切,跟唔到。

搏一搏不如穩穩陣陣

但係陳監製呀,如果你知道今次係搏一搏,知道會流失觀眾,就應該做啲保本嘢啦。最簡單就係加重返謝安琪同陳凱琳爭鄭嘉穎嘅情節,姐妹反目爭仔喎,觀眾一定受,其實呢條橋都有寫㗎,但點解咁輕易放過呢?又有人話個劇本太多枝節,太多犯駁。根據《蘋果日報》所講,《殭》嘅編劇沿用一貫嘅集體編劇方法,一人寫一段再合埋。今次有成十一個人去編,前期個劇本就一定散修修㗎喇,但最後唔可以將佢哋融返埋一齊,身兼編導之一嘅陳監製,同埋編審就要孭返絕大部分責任。我知好多時都係一路拍一路寫,而監製亦都唔可以由頭跟到落尾,咁就係TVB嘅問題啦,你容許佢搏一次,點解唔畀多啲時間佢做好佢呢?其實真係許勝不許敗喎,你睇依家幾樣衰。

《火線下的江湖大佬》劇照(TVB網站圖片)

身為觀眾嘅你唔好咁開心住。經此一役,就算係挾住《怒火街頭2》同埋《衝上雲霄2》佳績做後盾嘅監製陳維冠,以後同大台講再開拍新題材嘅劇集就難上加難。要大台創新?發夢啦。你睇吓無論劇情同角色都老套到喊嘅《火線下的江湖大佬》,收視居然報捷去到30點。穩穩陣陣就有呢個收視,你係大台,又點會畀啲監製輕易再試新嘢?新嘢留畀ViuTV試囉,佢哋製作又未夠成熟,惡得啲咩出樣?(呢個又係好激氣,真心嬲。)

唔睇又點知啲劇好唔好睇?

陳監製話「作為電視媒體要不斷去試,觀眾都要不斷進步」係真理。除咗今次搞到一鑊粥嘅《殭》,大台之前間唔時都有試新嘢嘅,其實唔錯。好似係《刀下留人》、《愛我請留言》、《師父.明白了》、《陪着你走》咁,不過都係有口碑無收視。後生一輩因為大台原罪而唔去睇,唔只係錯過咗啲好嘢咁簡單,而係令到大台覺得拍呢啲新嘢都唔會有收視。因果循環呀,阿彌陀佛。

放低偏見,我通常會畀三集機會啲新劇,睇吓好唔好睇。不過我知睇電視係主觀嘅,有啲真係睇一集都嫌多……例如係《火線下的江湖大佬》,就算有好想睇嘅苑瓊丹子同埋香香,都抵消唔到唔想睇肥貓嘅威力。

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。