陳同佳案|哭述喪女傷痛 潘曉穎母:美滿家庭冇晒希望將來 | 突發 | 即時 | 20200924

陳同佳案|哭述喪女傷痛 潘曉穎母:美滿家庭冇晒希望將來

更新時間 (HKT): 2020.09.23 22:00

2018 年涉嫌在台灣殺害女友潘曉穎的陳同佳,去年10月在港因洗黑錢刑滿出獄後,聲稱會到台灣自首投案,但另方面主動要求警方保護一直住在「安全屋」至今,仍未返台受審。案中受害人曉穎的父母為此耿耿於懷,發出公開信要求陳同佳盡快兌現承諾,赴台投案,為女兒討回公道。特首林鄭周二公開表示港府對此「無咩可做、希望潘父母可以釋懷」,潘母今日接受《蘋果》訪問時回應「我永遠都釋懷唔到!佢(曉穎)係我哋唯一獨生女,而家都未討回公道,點樣釋懷呢?」她希望女兒可早日沉寃得雪。

潘媽媽今日接受《蘋果》電話訪問,即使女兒離世兩年,言談間仍流露對愛女的思念以及傷痛。「整個美滿家庭冇晒,冇咗希望,冇咗將來,女兒對我哋好重要,佢係獨生女,我哋最疼愛、最寶貴的掌上明珠。我哋真係好唔捨得佢。」她坦言曾想過自殺,想與愛女一起,但為了要見證女兒討回公道的一刻,她決定要勇敢地活下去。

因愛女離世而患上抑鬱、每晚要靠精神科藥物入睡的潘媽媽,談到曉穎生前與父母共聚的點滴,才稍為顯得輕鬆一些,「我同佢同月生日,會一齊慶祝,佢會扮唔記得家人的生日,然後會畀我哋特別嘅驚喜,有禮物有蛋糕。」她又難忘每年兩至三次與曉穎一起去旅行的時光,「我哋會去做spa,shopping,買化妝品扮靚。」曉穎又會與母親分享學校生活的趣事,「佢成績唔錯,會講吓喺學校嘅威水史畀我聽。」

●曉穎23歲的生忌 潘媽媽:只可以同相中女兒慶祝

上月5日是曉穎23歲的生忌,潘媽媽準備一個生日蛋糕與女兒慶祝,「呢3年已經冇人同我過,而家唯有買一個蛋糕,擺喺張相前面,同佢講生日快樂,同佢傾下偈」,對於二人如今已陰陽相隔,潘媽媽便忍不住哽咽起來,慨嘆只能與相中的女兒慶祝。

曉穎不只與母親關係親切,亦很孝順父親、婆婆,「佢會陪老人家覆診,好孝順,放學夜返搭的士,會叫Daddy去車站接佢上樓,Daddy有病痛,就會勸佢唔好亂食嘢,好乖。我永遠唔會忘記!」說到愛女生前種種,潘媽媽再次忍不住哽咽。

潘媽媽坦言至今最大的傷痛是愛女突然被謀殺離世,「我諗起陳同佳點犯案,拉篋藏屍,棄屍嘅情景,係永久不可磨滅的創傷,我唔夠膽認屍,得我先生去認,佢見到曉穎只剩一副白骨,真係好心痛,好難過!」她現在仍不時夢見曉穎,「見到佢瞓喺度,身體好虛弱,起唔到身,好痛心!」

她再三希望陳同佳能夠盡快赴台:「陳同佳,如果你有良知嘅話,你喺2018年初殺咗個20歲嘅女仔,佢連呢個世界都未睇清楚就俾你殺死,你有冇諗過佢屋企人點?你有冇諗過破壞咗一個咁好嘅家庭呢?如果你有良知,你就立即企出嚟,立即去台灣投案,唔好再等喇,唔好再令大家失望,同埋要對得知你當初嘅承諾」。

●永遠未能釋懷 希望陳同佳盡快赴台投案

對於林鄭周二就陳同佳未有赴台事件,直言香港司法管轄內「無咩可採取」,又指自己要向潘爸爸和潘媽媽「表示安慰,希望佢哋都能夠釋懷」,潘媽媽今日對《蘋果》表示:「我永遠都釋懷唔到!」被問到會否因這番說話覺得唔忿氣唔開心?潘太直言「大家都知道明白我哋肯定係好唔開心,女兒被殺至今仍未能沉寃得雪,摧毀咗一個完美幸福嘅家庭,只可以講永遠唔會釋懷,身為一個母親,希望你哋明白,希望各界人士幫幫忙,幫我問返佢哋(政府),幫我跟進吓。」

她亦再三希望政府可以協助陳同佳赴台投案,「政治上嘅嘢,我唔方便回應,我唔知道她做咩先可以幫助我哋,政府應該為人民請命,這件事係應該要做」。

潘爸爸與潘媽媽發出公開信,要求陳同佳堂堂正正站出來,為自己的極大錯失承擔責任,盡快赴台、在當地接受殺人案的公正審判,並質問陳「為甚麼還要龜縮?為甚麼不可以踏上台營航班赴台投案?」要求陳同佳親自出來回應以上問題,盡快兌現赴台的承諾,「不要讓我們無了期地等下去!」

-----------------------------

你敢爆,我敢獎! 立即WhatsApp 《蘋果》24小時爆相爆片熱線 或致電:63836568

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

追實城中突發大小事,即 like 蘋果【現場】FB!
BannerBanner