改編自真人真事的印度電影《打死不離3父女》近日熱爆全城，電影中兩名女兒為延續父親的金牌夢，突破性別歧視及艱辛訓練，成為摔跤好手，成功踏上國際舞台，摘下金牌，過程賺人熱淚。

港版亦有翁靜晶長女劉萬儀（Jeanne）做代表，九歲便開始習武的萬儀，放棄在外地擔任律師機會，決意承繼「一代宗師」父親劉家良的武打遺志，留港宣揚武術，同樣令人感動。

「細個學功夫，可以話係一半被逼，一半好奇，當係興趣玩吓；直到四年前爸爸患癌離開咗，對我嚟講係一個好大嘅wake up call（醒覺），我好想留住爸爸對武術嘅熱愛同精神，希望可以傳承佢嘅功夫，將武術發揚光大。」

現年三十歲的她，是CalCarries模特兒公司旗下藝人，曾參演過舞台劇及微電影，她希望能進軍幕前做打女。「我想拍電影同電視，如果可以做到武術演員就最好。」

當日即興耍梅花劍的她，早前為了在《電影．社群．百年嶺南洪拳》展覽上表演，足足苦練了三個月。

苦行修練

學武術，講求體力較量，拳拳埋身肉搏，似乎不是女性的用武之地。本身對武術興致不大的劉萬儀，卻因被父親練武時的英姿所吸引，好奇心之下學習打功夫，結果一打便愛上。

「三、四歲時我已經跟爸爸去片場睇佢拍戲打功夫，雖然睇落好新奇，但始終對運動無乜興趣，加上我人又懶，只係鍾意打機，所以只會閒時同爸爸、妹妹玩吓（功夫）。直到九歲嗰年，喺屋企窗口見到爸爸同佢啲徒弟喺後花園訓練，見到爸爸耍兵器，即時兩眼發光，因為我喺九十年代長大，睇開《星球大戰》，覺得好有型，對兵器好有興趣，好奇心之下，就正式跟爸爸學功夫。」

要耍兵器，首先要學懂基本功，當年嬌滴滴的劉萬儀，單是體力已輸人一大截，惟有將勤補拙。

「爸爸無教我耍兵器，反而教我打洪拳，但打拳其實要用好多內氣，我又無乜肌肉，比起其他（男性）徒弟，我打起上嚟特別吃力。操體能方面亦要同男仔做嘅一樣咁多，男仔做一百下push up，我都要做一百下。初初為咗增強腳力同重心力，每次練拳前都要紮馬三十至四十五分鐘，紮完馬兩隻腳都會痠足一日；又為咗練手力，會喺每隻手臂上戴住五至十個約兩磅重嘅鐲練功，真係好辛苦，o依家我一星期練功夫三日，每次練兩至三個鐘，其餘四日就去健身同做瑜伽。」

劉萬儀很重視家庭樂，「自從爸爸走咗後，我對家人講多咗『我掛住你』、『我愛你』，我會當每一日係最後一日。」

她直言最喜愛看父親執導的電影《少林三十六房》，而電影《醉馬騮》則是劉家良（中）生前最後一次身兼導演、武術指導及演員的作品。

劉萬儀胞妹劉幸儀曾於英國參加健美小姐競賽，現於當地從事法律工作。「我細妹跟爸爸學功夫學到中學就無再學，反而跟爸爸一齊玩健身，曾經做過健身教練。」