湯鎮業孖仔睇準疫市創業賣凍肉
藝人湯鎮業的雙胞胎兒子湯君慈和湯君耀雖然只得25歲，但非常有生意頭腦，把握商機在「疫」市斥資六位數開凍肉店。兩兄弟長期坐鎮睇舖，搬貨、清潔、收銀一腳錫，更在烈日下出街派傳單。
疫情下人人自危，加上餐廳晚市禁堂食，市民大多留家煮飯，最受惠的可說是凍肉店生意。湯君慈（Bruce）與弟弟湯君耀（Chris）食正條水，6月中在旺角開凍肉店，開業短短1個月已有不錯的成績。
兩兄弟日前齊齊看舖，見他們相當忙碌，Bruce先拿着分類字牌貼上大雪櫃，之後再執拾店內的垃圾。兩人更做埋搬運工，搬着幾箱貨入店內拆箱放雪櫃，見到有客人，Bruce立即上前熱情推介各種食材，Chris則駐守收銀台，分工合作。疫情肆虐，見他們相當注重衞生，不時用消毒用品清潔購物籃及雪櫃門。
媽咪包招牌水餃
為了吸引更多街坊幫襯，Bruce大熱天時在街邊派傳單，見他汗流滿面，連口罩都濕透，幸好街坊見到靚仔很受落，主動上前拿傳單，Bruce短短十數分鐘已經完成任務。傳單上清一色推介水餃，原來這是湯媽媽親手做的招牌貨，而且每日限量發售，特別搶手。
湯洛雯幫手吸客
記者事後訪問Bruce，問到投資了多少錢？他說：「6位數字，籌備咗兩、三個月，疫情對呢行嚟講反而好咗。其實失咗預算，一路做先知好多嘢要加，冷氣、雪櫃同其他數，加埋比預期多咗10幾萬。（爹哋有冇幫手出錢？）佢負責雪櫃，都唔少錢，佢好支持我哋創業。」又透露姨媽都是股東之一，問到可有叫堂姐湯洛雯夾份投資？他說：「冇，佢好忙，但我哋不時見面，佢有幫手宣傳。（佢有冇帶馬國明過嚟？）未，我覺得佢哋好襯，馬國明成熟穩重，形象又好，戥佢哋開心！」