認剥剩底褲　湯怡爆喊：想殺咗洪卓立

英皇藝人湯怡（Kathy）28歲生日，跟她相戀9年的歌手男友洪卓立（Ken）為祝賀女友牛一，在社交網上載一張女友捧住生日蛋糕的照片，而蛋糕的生日卡上款被「打格」，更顯得無私顯見私，令人充滿好奇，最搞笑是炮製的餅店就將湯怡的生日餅上載官方網頁上，清楚看見「被格仔」的原來寫住「MY WIFE」，網友大讚兩人甜蜜到爆之餘，更惹兩人秘婚的揣測。

澄清冇秘婚

湯怡接受《東網》電話訪問時，被問到Ken稱她為「太太」是否兩人已秘婚？她哈哈笑説：「梗係唔係啦，如果結咗婚會講大家聽，咁拍拖都會叫『老公』、『老婆』，暫時未結婚住，我哋都好想繼續喺事業上拼搏，依家我哋兩個都好多嘢做，雖然我好多朋友都結晒婚，生咗小朋友，我又好鍾意小朋友，但唔心急，因為我家姐上年生咗bb，可以玩家姐嗰個bb先。」有謂兩人依然打得好火熱，湯怡甜到漏謂：「都唔係第一年嘅事啦。」

好友面前露股

談及Ken本想炮製驚喜給她，但意外地令她在好友面前露股，她話：「係呀，嗰日好熱，咪入屋換衫囉，唔知佢哋全部匿晒喺我間房，嗰一刻真係驚喜，驚喜到喊咗出嚟，嗰陣我剥剩條底褲咋。（朋友都見到patpat？）係呀。（好在patpat夠靚？）ok呀，好在有做運動。（有冇戴胸圍？）有，我有着背心㗎，好在未除背心前佢哋出現咗咋。（好在冇男仔？）如果畀男仔睇晒，我殺咗洪卓立。」

至於Ken送上甚麼生日禮物？Kathy表示是自己要求男友不用送禮，因本身不是愛物資的人，而在家等男友放工再一起出外買餸，晚上玩「煮飯仔」就覺得好開心、好浪漫。

「東網巨星」fb專頁：

以抵死角度，分析各大娛樂新聞，加埋識睇一定要睇嘅網民妙論，包保享盡「Fun」秒，快啲入嚟畀Like啦。