《鍾翰林給香港人的信》 咁多位香港人大家好,我係鍾翰林。 由2020年10月29號被還押開始,屈指一算都已經喺獄中生活咗超過四個月,當中有2個月更因煲底侮辱中國國旗而被正式判囚,直至3月1號刑期結束再次重歸還押生涯,抱歉各位我一直未有公開報平安。 仲記得第一日進入獄中,幾乎每一個囚友都對我投來唔少好奇嘅目光,可能係壁屋呢度一直都較少有被長期還押嘅社運案件人士,而我本身亦比較多曝光率,所以都有啲囚友會問及一啲相對有趣嘅問題,例如「周庭係咪真係好靚㗎? 」、「游蕙禎係咪真係同梁頌恆有路㗎?」等等...... 喺被還押前我一早都有接觸一部份嘅在囚手足,所以都略知獄中嘅生活環境,而且早在16年決心投身社運前已有作出一定嘅心理準備,所以入嚟之後亦冇太大嘅恐懼以及唔適應,將聞風喪膽嘅伙食同埋衛生狀況都遠比我想像中好,至少啲飯餸亦比起我中學時期嘅校內飯商好,四個月以嚟我亦都未見過任何一隻曱甴(啡色嗰啲)同埋老鼠,最難適應嘅反而係集體生活,自從投身社運以嚟我都甚少社運以外認識嘅朋友,加上自己亦比較喜歡單獨嘅寧靜生活,所以直到四個多月嘅今日,我都仍然喺度適應緊同一班同自己同齡甚或比自己細嘅囚友相處。 喺度初期我已經有訂購蘋果日報同收音機,亦都有收到解悶工場,所以一直有留意呢幾個月嘅新聞,最難受係莫過於不斷見到唔同嘅社運好友相繼被捕、還押、服刑甚至被迫流亡海外,而我無能為力去改變呢一切,我亦深信,呢一刻我哋所承受嘅共難,仍然係高處未算高,未來一段相對長嘅時間,或許唔係大家所期待嘅黎明,呢一刻僅僅只係夜幕啱啱降臨,遠遠未迎嚟黎明前最後一刻嘅黑暗。 雖然黑夜看似無盡,但堅守光明,黑暗就總有衰弱嘅一天,呢刻好似寸步難行,但與此同時呢刻正正係好好裝備自己、增強知識、論述嘅好時機,多閱讀歷史,從前人經歷、挫敗吸取知識,避免陷入迷霧之中。 最後我亦都非常感激每位願意來追車嘅追車師,雖然每次我都會聽到一啲唔好嘅說話去形容你哋,但你哋嘅心意我都收到曬,有時真係好感動到眼濕濕,仲有好多嘅旁聽師,感激你哋每次都願意嚟坐爆庭,即使係提堂只有短短幾分鐘見到大家,但已經足夠收到你哋嘅支持。 希望他朝有天,能夠在同一眾同道友好,活喺自由嘅土地再次聚首一堂。 鍾翰林 08-03-2021