一）花灑、企缸、浴缸碰口位
廁所濕區同乾區之間嘅隔斷材料眾多（例如玻璃、玻璃磚、石膏板、屏風、浴簾、趟門等等），防潮性能各有不同，但通常最易出事，都係接駁縫上嘅密封膠，若發現有霉菌滋生，通常代表密封膠上存有缺口，住戶可以定期檢查企缸或趟門邊緣嘅密封膠，如果發現有裂縫或破損就盡快剷走佢重新舖過，然後等完全乾涸後開花灑測試一次，冇漏水就大功告成！
二）浴缸、洗手盆去水位
洗手盆同浴缸嘅去水位經常滲漏，但由於呢類滲漏速度慢而水量細，日常生活好難會察覺。如果想測試浴缸或洗手盆有冇漏水，可以先用堵水蓋截停去水，然後將浴缸或洗手盤浸水一小時，再觀察水位變化，如果水位變低，通常代表存在滲漏，要盡快搵人修理！
另外，記得定時檢查洗臉盆底下嘅水管有冇滴水，若洗臉盆底下地板出現異常水漬，通常存在漏水問題，要盡快維修。
三）洗臉盆、水龍頭
想知水龍頭有冇漏？試下向水龍頭嘅封邊位淋水，然後檢查洗臉盆底嘅範圍，如果有水滴落嚟，或者之後發現水漬，咁就肯定有問題！另外，水龍頭嘅封邊膠一旦發霉或出現水漬，亦應盡快更換。
四）座廁
座廁同污水渠嘅接駁位一旦破損，沖廁時好大機會會有污水漏出。記得定期檢查座廁同地板接駁嘅封邊膠，如果座廁鬆脫或移位，就必須立即處理，因為任何移動動作都有機會破壞到座廁嘅管口封蓋，引發更嚴重嘅滲漏！
五）浴室內外一帶地板
地板翹起、發霉，或者出現任何異常嘅深色污漬，通常都係由長時間嘅滲水造成。一般單位嘅客廳同走廊通常都冇做防水層，如果浴室嘅水漏到出面地板，好容易會漏埋落樓下天花，隨時引發投訴！住戶如果發現地板有滲漏痕跡，應盡快搵出漏水源頭並作出維修，以免情況惡化！
六）瓷磚
瓷磚出事，通常係因為裝修失誤，或者裝修時冇正確做好防水層，以致日常沖涼嘅花灑水從瓷磚中間嘅罅隙滲入牆身，然後四散至周遭地帶，引發大規模滲漏。若發現花灑附近瓷磚拱起或者出現裂紋，必須小心處理。
要提防漏水，防水層係浴室裝修上嘅重要一環，專家建議企缸周遭牆身嘅防水層最少做到一點八米高，防水層乾固後用紅外線測試等方法確保無滲漏先可以舖貼瓷磚。
總結：
浴室裝修最緊要做好防水層，完工後做好測試確保冇漏先好收貨。想做好保養，記得定期檢查各個碰口位、封邊膠有冇發霉或者損毀，一旦瓷磚、地板、牆身、或腳線出現異常水漬或發霉，應立即搵專人處理，以免引發更大型嘅滲漏問題。定期做好檢查同保養，冇問題求安心，有問題及早補漏，隨時幫你慳返一大筆維修費！
浴室滲漏唔知點做？唔駛擔心！即刻做一次免費網上評估，由專家教你點整！