洪永城打波公然蝦細路 蕭正楠發火鬧爆：城渣！

公然蝦細路

最近疫情有所回落，多項體育康樂設施解封，酷愛籃球的洪永城（Tony）也趁機落場露兩身手。Tony日前在IG上載一條打波片段，點知對手竟然喺個矮佢足足2個頭嘅小朋友，玩單對單battle。片中所見每當小朋友想投籃，Tony都以明顯嘅身高優勢將投球封阻，小朋友多次投籃機會都冇，場面認真搞笑！擺明蝦細路的洪永城更在IG輕佻留言：「喺度搵到真正嘅信心，佢爸爸喺後邊打緊波如果唔係會過嚟打我！」其實Tony之後都有放水讓小朋友，等小朋友可以阻自己射籃，又有一齊影合照氹佢開心。

蕭正楠發火鬧爆：城渣！

但洪永城公然打波蝦細路，引來一班圈中好友留言圍攻，老友蕭正楠最睇唔過眼發火鬧爆佢：「城渣！」，Tony囂張回覆：「我同你打，我都會咁樣做！」，二人對話搞笑。好友林奕匡就指Tony「好衰」，簡淑兒就留言「WTF」！紛紛幫小朋友出頭。而網友就笑稱「求小朋友心理陰影面積」，同樣留言一面倒為小朋友「抱不平」，「牛高馬大喺度蝦細路」、「大蝦細俾屎餵」、「以後睇電視見到你，都即刻熄電視」等等。

傳媒報導「獲女友鞭策下體能提升」當事人搞笑回應

37歲的洪永城未因與「最不能錯過的女友」唐詩詠拍拖放棄整個森林，但他幸運地遇上模特兒出身的長腿女友梁諾妍（Inez），19年底開始同居試婚，洪永城從未如此修心過，曾公開大讚Inez優點數兩個鐘都數唔晒、又會與女友一起做運動、操體能，冇腳雀仔被女友三招收服，Inez的開朗善良、獨立聰慧以及有感染力，令洪永城完全無力招架。洪永城與運動好手的女朋友Inez 拍拖數年，曾分享受女友影響多做運動，女友更會和他練跑、操體能。洪永城日前分享傳媒報導，更以「獲女友鞭策下體能提升」為題，引來一眾網友訕笑，他隨後在IG無奈表示大家不要再問候他的「細佬」，引來圈中好友揶揄、繼續問候，其中當事人之一的女友Inez 亦四字回應：「今晚繼續」，十分幽默，難怪得到洪永城歡心。

洪永城底花成障礙 女方父母釋除疑慮

洪永城與梁諾妍（Inez）拍拖兩年多，這次的戀愛旅程令洪永城愛到跌入漩渦，甚至願意做老襯從此被困，相比起與唐詩詠拍拖的偷偷摸摸，洪永城與Inez愛得光明正大，Inez更有本事驅使洪永城永遠封盤，全因她是個百分百「最不可多得的女友」。

Inez自小是父母掌上明珠，家有一兄一弟的她雖然已年屆33歲，但全家人對她呵護備至，知道她與洪永城拍拖後，其父母曾擔心戀愛經驗淺的她會受傷，經過兩年的相處與了解，Inez的母親亦釋除疑慮開綠燈，知情者說：「Inez屋企人錫到佢燶，你知啦Tony個底咁花，拍拖初期Inez父母都好緊張，不過佢哋好快就見晒家長，Inez想屋企人自己去親身感受Tony係個乜嘢人，Tony亦以行動去證明自己對Inez嘅誠意。Inez媽咪覺得Tony唔係傳聞中咁差，最緊要係Inez拍拖呢兩年都係好開心，成日會同屋企人分享同男友嘅sweet嘢，未試過喊住返屋企，所以Inez媽咪好放心交個女畀Tony。」

洪永城性格大變事事以女友為先

受到疫情影響，Inez未能到外地參加全馬拉松賽，去年8月她參加了在香港舉行的倫敦虛擬跑，差點中暑又抽筋，洪永城唔止做司機，又負責遞水抹汗做補給，愛的鼓勵令女友捱到尾，最終以4:41:26完成賽事，之後洪永城當眾攬實Inez慶祝。

盡數花王「多嘴城」黑歷史

洪永城遇上Inez前個底認真花，與唐詩詠拍拖三年從未定性，多次被爆跟前度藕斷絲連，又跟拍檔黃翠如、蔡思貝、林夏薇等傳過緋聞，與蔡思貝相約外出做運動，女方擘晒髀拉筋一幕最出位，雖然唐詩詠每次都投以信任票，可惜謊言與原諒在二人之間不斷重演，最終分手收場。

洪永城扮大牌被稱「洪爺」 小花暗稱「多嘴城」

近年劇接劇的洪永城，拍親熱戲向對手加料其實早已傳遍電視城，不過小花怕事敢怒不敢言，亦令他有恃無恐，近期愈拍愈猖 狂，令小花拍親佢都提心吊膽。據知情者透露：「呢期佢咁多劇 開，已經當正自己係阿哥，改對白加戲已經係等閒事，對工作人員 態度亦好差，試過PA叫佢埋位，如果未齊人要佢等，佢會發脾氣，工作人員都稱呼佢「洪爺」，對啲女拍檔，連親熱戲都自己加插，搞到班女拍檔個個有冤無路訴，唔敢出聲，其實班幕後工作人員一早都睇唔過眼，小花 喺背後仲叫Tony做『多嘴城』，所以今次朱朱挺身而出大快人心，希望佢日後檢點啲！

醜行事件爆煲，唔少受害小花背後力撐朱晨麗肯挺身爆鑊，可惜罪魁禍首洪永城，回應事件冇誠意道歉，表示自己加戲純為拍攝效果！更背後唱朱晨麗大口令他形象受損，二人在電視城近日已成貼錯門神！做錯事仲惡人先告狀，唔通「囂」字四個口，洪永城真係以為自己大晒，其實想保住良好形象，自我檢點最實際！