【秋季行山】買平靚正行山裝備好地方

下星期五就係中秋節，係人月兩團圓嘅日子，好多人以為中秋節就係秋季嘅開始，其實西曆8月8日已經係立秋之日，正式進入秋季。如果對周圍環境有留意嘅話，9月開始，天氣已經涼爽咗，所以嚟緊會係行山旺季。行山當然少不了要裝備喇，保護自己嘛。

好多人以為行山裝備一定好貴，其實唔係，唔使下下使成千銀買貴價嘢嘅。積臣當然信一分錢一分貨，但喺香港，只要你識得搵，其實有好多平靚正選擇。有行開山嘅積臣，同時又知慳識儉，當然會四圍格下價喇。

深水埗集散店舖

講到買最簡單嘅衫褲，積臣鍾意去深水埗，喺南昌街、福華街、福榮街一帶有唔少戶外裝備舖頭，排檔同室內舖都有賣。喺果度，你可以買到好多快乾衫、行山褲、風褸等，最平幾十蚊有件，有時減價促銷，100蚊3件快乾衫都有。至於係咩牌子？積臣唔係好介意，最緊要性價比高。積臣見得最多係標籤寫住簡體字的產品，間唔中會見到外國牌子，例如德國Jack Wolfskin、瑞典Haglofs等。積臣試過買到件Jack Wolfskin刷毛保暖外套，只係300蚊內，保暖功效當然非常之好。

▲ 深水埗南昌街、福華街、福榮街一帶有唔少戶外裝備舖頭。

其實呢啲舖頭啲貨來源地係邊度，積臣唔清楚，我估計係外國水貨，因為好多時標籤寫住係S、XS尺碼，都係啱啱夠着開M碼嘅港人着。所以要試真啲先好買，室內舖好多時都有更衣室可以換衫，至於排檔啲衫褲真係要睇真啲喇！至於要買鞋、背囊、行山水壺等，唔係間間有，就要行多幾間睇。

除咗深水埗，近太子嗰邊大埔道同長沙灣道交界附近一帶都有一啲戶外裝備舖頭，部分有賣行山鞋、中大型行山背囊等。積臣又試過喺太子買到高筒行山鞋，有GORE-TEX標籤，都只係500蚊內。

▲ 近太子果邊大埔道同長沙灣道交界一帶都有戶外裝備舖頭。

窮人恩物迪卡儂

如想買大品牌或者更多戶外裝備選擇，旺角、油麻地一帶好多樓上舖可選擇，好多都有賣睡袋、營幕、爐具等，價錢就會比較貴。當然，好多運動用品連鎖集團都有賣戶外衣物，例如Columbia、The North Face等，貨品價錢就更貴一級喇！

未必好多人好似積臣咁，唔怕行多幾間去格價，可能比較鍾意喺一間慢慢睇，就好似行超市咁。近年歐洲最大嘅運動用品連鎖集團迪卡儂喺香港密密開分店，部分貨品甚至比喺深水埗買平，例如一對行山鞋300蚊內有找，一件行山衫50蚊有找，而且除咗行山裝備外，仲有水上運動、跑步、足球、籃球等裝備都齊備，選擇相當豐富。難怪唔少人話，迪卡儂係「窮人恩物」。積臣睇過下，部分貨品質素一般，啱唔啱自己眼緣都幾重要㗎！

▲ 法國運動品牌DECATHLON迪卡儂。

𠵱家網購盛行，喺淘寶已經好輕易買到想要嘅貨品，選擇多，分分鐘價錢更平。不過行山裝備呢家嘢，積臣寧願着上身試真啲，特別係鞋類，隻鞋唔啱自己，行山嗰陣保護唔到雙腳，仲會隨時整親㗎。計劃想喺秋季行山嘅人，不坊去深水埗、太子發掘下，隨時「執」到平貨㗎。

【作者簡介】90後製作公司打雜，熱愛打機，亦愛行山吸收靈氣，希望快啲儲夠錢享受人生。