政情:沈祖堯靠筆記追老婆 - 太陽報

23/11/2009

播放本新聞相關短片

政情:沈祖堯靠筆記追老婆

忙到唔得閒拍拖?被喻為「沙士英雄」嘅候任中文大學校長沈祖堯話:「忙都有忙嘅拍拖方法。」

結婚近二十年的沈祖堯尋日喺大氣電波透露,當年佢同太太都係港大醫學院學生,佢比太太高兩屆,作為師兄嘅佢不時就以借筆記畀師妹參考為名,擺到明追師妹,後來兩人到同一醫院實習,大部分相處時間都喺醫院入面。沈祖堯仲話,太太當年決定做婦產科醫生,都係經佢提議。

其實沈爸爸係從事驗眼行業,六七年開咗間眼鏡舖,多年嚟都希望囝囝做眼科醫生,成日話:「你做眼科醫生就好囉,可以介紹啲病人去我度配眼鏡嘛!」可惜囝囝對醫眼冇乜興趣,最後都冇顧及家族生意。沈爸爸並冇因囝囝唔揀眼科而嬲,喺沈祖堯做咗幾年醫生後,憑獎學金去加拿大修讀博士,但支出遠遠超過獎學金金額,沈爸爸仲主動提供財政援助,令佢深受感動。