【明報專訊】政府就《基本法》23條立法到咗衝刺階段，之前選委界議員管浩鳴關注當中嘅「隱匿叛國」罪，即知情不報有罪，問如果有人「告解」，神職人員一般要保密內容，咁會唔會有犯「隱匿叛國」風險。宗教媒體時代論壇就訪問天主教神父羅國輝，羅神父形容聽人告解時會「神上身」，離開告解房間佢就「不記得」內容，唔會向他人透露內容，話每星期聽過百人告解，「我點解要記？關我乜事？」
Emily之前搵過資料，參閱《天主教教理》第1456條相關聖事入面，形容神父係代表基督嚟聆聽同勸告信徒，對於告解中一切內容，有責任嚴守秘密。
羅國輝喺訪問就話，神父都習慣咗離開告解房間後就「不記得」內容，「因為我都沒有坐過入那個房，是耶穌坐進去，誰人來過也不知道……人家是鬼上身，我們是神上身」。
對於保密會唔會令神職人員有違反「隱匿叛國」罪風險，羅國輝話「有就有吧！有又如何？」一切都應「天主優先」，話佢哋唔出賣天主。
