穆家駿

出自維基百科,自由嘅百科全書
跳去導覽 跳去搵嘢

穆家駿(MUK Ka Chun, Nicholas,花名「穆嘴」),香港親中派民建聯香港培青社成員,香港教聯會副主席,港區全國青聯委員[1],曾經參選2019年香港區議會選舉但被民主派支持嘅候選人羅偉珊擊敗。

早年生活[編輯]

穆家駿喺2003年入讀培僑中學,曾經做過學生會成員同埋辯論隊隊長,當時穆嘅政治取態已明顯親建制,佢喺2010年入讀香港中文大學社會科學學院,但仍不時出席同埋協辦校友會嘅活動。去到2013年畢業後,穆家駿返去培僑任教學助理,修讀教育文憑後正式成為通識科教師。[2]

穆家駿喺接受訪問時,承認自己曾經攞過英國國民(海外)護照,但就形容咁樣自己只係英國嘅二等公民[3]

政治參與同立場[編輯]

身為民建聯同香港培青社的主要成員,穆家駿曾經多次以培青社嘅身份出席唔同「愛字頭」組織嘅活動,而培青社亦多次發表激進親建制及反日仇外民粹主義言論。穆本人亦曾經喺親北京教聯會成立嘅網上電台HKFEEL擔任時政節目主持,又多次邀請保衞香港運動召集人傅振中擔任嘉賓[2]。近年,佢亦不時發表批評以前西方國家殖民主義嘅言論[4]

香港政制議題[編輯]

穆家駿主張跟從全國人大單方面定下大幅度限制提名權同埋及參選權嘅831框架,並反對增加所有民選區議員成為提名委員會成員或當時其他建制派提出嘅『白票守尾門』折衷方案[5]。穆家駿又支持《國歌法》立法,反對進行公開諮詢[6]

教育議題[編輯]

喺國民教育議題上,穆主張增加中學教育當中強制修讀《基本法》嘅時數,[7]而喺通識教育方面,佢接受內地媒體訪問嘅時候亦都話,就算通識教育嘅自由度高,但係喺一啲國家大是大非嘅問題上,老師唔可以立場含糊[3]

參與2019年香港區議會選舉[編輯]

2019年香港區議會選舉,穆家駿接替黨友鄭琴淵[8],出戰本來鄭所屬嘅愛群選區,但被民主派支持嘅候選人羅偉珊擊敗。

參與2020年香港立法會選舉[編輯]

喺2020年香港立法會選舉,穆家駿本來獲提名為港島區立法會候選人張國鈞名單第三名,但香港政府後來以武漢肺炎疫情為理由,押後選舉一年。之後北京未經香港人同意,強行修改香港選舉制度,大幅度削減直選議席嘅比例。民建聯之後暫時未有公佈選舉安排。

言論同埋爭議[編輯]

香港培青社言論[編輯]

喺2016年1月,銅鑼灣書店東主李波懷疑被中共越境擄走,香港培青社喺Facebook發佈一則「李波先生與哪些性工作者來往」嘅「通緝令」,主席陳志興隨即被部分網民批評,話佢轉移視線同埋人身攻擊。不過,穆其後被揭發身為副主席,影響力反而更加大。之後,有記者喺培僑中學門外等候穆家駿,穆家駿一概拒絕回應,期間佢仲話要報警,為擺脫記者追訪就算睇到汽車駛過仍衝出馬路[9]

理工大學連儂牆風波[編輯]

香港理工大學學生會喺雨傘運動四周年前夕,將民主牆嘅一半改成「連儂牆」。民主牆一直由學生會作管理,但校方其後干預牆上港獨字眼嘅標語,釘上紅紙遮蓋,又喺學生會所擬訂嘅民主牆守則上自行加上「釋義」,指學生會幹事會即係「理工大學學校發展處」,有學生不滿,抗議校方行動[10],穆家駿就避開民主牆本屬學生會管理或者大學自行釋義嘅問題,指責抗議嘅學生『迫使校方高層交出民主牆管理權』,不分是非黑白[11]

武漢肺炎疫情期間涉嫌唔恰當索取市民個人資料[編輯]

武漢肺炎疫情期間,穆家駿同埋鄭琴淵被揭發喺2020年2月以派發口罩嘅名義,唔恰當索取市民個人資料。有市民前往穆家駿同埋鄭琴淵嘅辦事處領取免費口罩時,被要求出示身份證同埋住址證明,之後有關職員仲直接自行將佢嘅個人資料填喺一張選民登記表格上。有受訪市民話,現場好多長者根本唔知道職員填寫嘅係選民登記表格,就喺表格上簽名,前後至少有幾十份表格,而職員亦完全無提及選民登記嘅事[12]

東京奧運期間攻擊港隊成員伍家朗[編輯]

內文:第32屆奧林匹克運動會同香港相關嘅活動事件#伍家朗波衫事件

2021年7月24號,正值東京奧運,穆家駿喺自己嘅Facebook專頁上,攻擊羽毛球港隊成員伍家朗,話佢著黑衫出賽,質疑佢係咪唔想代表中國香港出戰[13],並得到李梓敬嘅和應,李梓敬更加將矛頭指向伍家朗出賽時點解無著由另一贊助商FILA所提供,印有區徽嘅球衣。唔少網民,民主派人士,甚至部分親中派人士都批評穆家駿同伍家朗嘅言論。伍家朗回應事件,話自己無獲授權印區旗落去,又話自己一直以代表香港自豪,希望大家留意運動員表現,而唔係件衫度[14],佢又批評穆家駿「鬧還鬧,唔該搞清楚件事先鬧啦」[15]。最終,伍家朗喺賽事落敗,有部分評論就認為,李梓敬同穆家駿令到當時嘅伍家朗,以致港隊其他成員嘅心理質素受到影響,係港隊落敗嘅元兇[16]

參考[編輯]

  1. "建黨百年愛國教育進校園理所應當(穆家駿)". www.hkfew.org.hk. 喺2021-07-26搵到.
  2. 2.0 2.1 "校友:直情以為培青社就係培僑校友會". 喺2020-05-22搵到.
  3. 3.0 3.1 羊城派. "教师节,为这些三观刚正的香港老师打CALL!「港明是非」" (中文).
  4. "穆家駿:西方抹不掉的不光彩紀錄". www.takungpao.com.hk. 喺2021-07-26搵到.
  5. "一位青年人對政改的意見書" (PDF). 原著 (PDF)喺2019-11-02歸檔. 喺2020-05-22搵到.
  6. "反駁《國歌法》本地立法的四大謬論". 文匯報 (香港). 2018-05-17. 原著喺2018-11-28歸檔. 喺2020-08-09搵到.
  7. "《學苑》謬論 港獨毒港" (PDF). 喺2020-05-22搵到.
  8. "「90後」教師穆家駿 冀打造更和諧社區". 大公報. 2019-11-03. 原著喺2019-11-09歸檔. 喺2020-08-09搵到.
  9. "陳志興遭圍攻 培青社fb專頁關閉至今". 原著喺2020-07-24歸檔. 喺2020-05-22搵到.
  10. 吳倬安 (2018-10-04). "理大連儂牆風波釀衝突 會長林穎恒預告開放日有行動抗議". 香港01. 原著喺2019-06-14歸檔. 喺2020-08-09搵到.
  11. 穆家駿 (2018-10-10). "理大學生會「絕食」實為播「獨」政治騷". 文匯報 (香港). 原著喺2018-10-10歸檔. 喺2020-08-09搵到.
  12. "【武漢肺炎】攞口罩被登記做選民 居民質疑民建聯呃個人資料". 蘋果日報 (香港). 2020-02-20. 原著喺2020-07-24歸檔. 喺2020-08-09搵到.
  13. "強烈譴責羽毛球港隊成員伍家朗穿著沒有區旗標識的黑色衫代表中國香港出戰!!!!其他隊員參與混雙比賽都是穿著印有區旗的整齊隊服!如果不想代表中國香港,請選擇退賽!". 穆家駿 Nicholas Muk - Facebook. 2021-07-25. 原著喺2021-07-25歸檔. 喺2021-07-25搵到.
  14. "伍家朗冀大家專注留意運動員表現而非衣服 - RTHK". news.rthk.hk (中文). 喺2021-07-25搵到.
  15. "【東京奧運】黑衣作賽遭建制派狙擊 伍家朗:無球衣贊助 未獲授權印區旗 | 立場報道 | 立場新聞". 立場新聞 Stand News. 喺2021-07-25搵到.
  16. 穆家駿 李梓敬 累 伍家朗輸波 黃世澤幾分鐘評論 20210728 (英文), 喺2021-08-02搵到