清邁拜縣湄宏順密窩村個人遊少少心得(有更新湄宏順部份密窩村圖片)

2 2480

airpenny01

2018-12-05, 11:17

閱讀對象：個人遊，背包客，搭公車為主既朋友，內容全是個人經歷，下面文章提到既所有事，只抱應讚則讚，應彈則彈為大原則，希望分享下，比到各位旅人一些親身經歷而又有機會幫到大家既資訊。(2018年10月尾既經歷)
***新增湄宏順行程建議, 密窩村圖片

1：清邁
清邁既雙條今年大部份都印上左30baht per person既告示，所以大家可以跟住黎問價，雖則部份司機依然開天殺價。
清邁，我相信要睇清邁介紹既可睇其他文章，在此我只想集中分享一下由清邁到拜縣既公共交通，去之前我已經讀過大部分既旅遊書或爬過下文，知道去拜縣主要有2間巴士公司營運，今次我分享我使用其中1間既服務心得，選aya service既原因無他，主要想慳，但正是出事原因，第1日，落機由機場直到酒店，check in 後第1時間請前台的小姐幫忙訂第2日早上到拜縣既車，我同前台小姐講明，我會第2日到拜縣，請佢幫忙打電話到aya service訂車，由於我有1個25吋既旅行箱，所以我請前台小姐問明我需要為大旅行箱另買坐位嗎？前台小姐仲先問好我希望既出發時間，我回答早上9點，之後就由前台小姐幫忙打電話到aya訂車, 全程泰文，所以我唔肯定前台小姐有否準確傳達我既要求，但我選擇相信她，電話掛掉之後，她回覆我aya已確認我第2日去拜縣的車票，旅行箱不另收費，全程200baht(之前都幾多文章提到只需150baht, 唔通加左價?), 她請我最好第2日9點在酒店大堂準備好，到了第2日朝早，我8：55已經到酒店大堂，亦已經check out, 耐心等車來，過了9點，車子沒到，前1日幫忙訂車既小姐已經打電話追問車既情況，aya回覆話到接既服務係由9點正至9點半，視乎情況而定，前台小姐已經不斷道歉，話昨日已經因應我既要求去訂車，我回說唔緊要啦，佢既另1位同事才搭話，先幫忙道歉，再講出其實佢地已經三番四次受左aya氣, 佢地自己其實唔太滿意aya既服務，之前都有佢地既客人訂了aya既車去拜縣，但因為佢地既唔準時，令佢地都比其他客人懷疑佢地有無準確地傳達自己既要求，什至投訴，但係因為所有案例都係客人要求訂aya既車，所以起訂車時並無講出佢地曾經遇到既問題，其實aya會遲，我已經心中有數，從之前爬文已略知一二，9：30左右，雙條既司機先出現，帶著我同之前佢接既3個中國女孩，到aya既發車地，到了發車地，由於我是電話訂位，要先到佢地既辦公室付車資，之後有工作人員就叫我同3位女孩上車，我仲以為全車只有4人，但全程我仲未見到司機上車，等下5分鐘，等下5分鐘，終於忍唔住走去問職員，佢地只係不斷答wait, wait, other people, 咁即係重有其他人黎緊，但係幾點到呢？好似冇人答到，終於有雙條駛入，有另外5個人黎左，職員搬好佢地既行李上車，車終於可以出發，當時10：20。3位中國女孩坐最前的1排3坐位，後面坐了新來的2個中國女孩，我聽到佢地既對話，我普通話唔好，只聽無搭話，大概聽到既係全部人都係9點起酒店等aya接，但我估計第1組接既已經唔係9點，同時心中有個問號，究竟是否只有1部雙條去接人? 如果有2部，aya自己又準時，我想最遲9：45應該已經可以齊人發車，但實況往往超過預期，相信這件事只係1個謎，1個只有aya入面既人可以知道真相既謎，之前唔揀prempracha，係因為佢地訂車既網站，個人認為有點不太方便，加上自己行程可能再改，先決定到酒店後才正式定案，為左慳來回公車站同第2朝去車站既車費，換來時間上既誤差，這次教訓可大了，計埋中間停車休息15分鐘左右，最後，到達拜縣已經近2點，由於我再下1日要到湄宏順，買完車票，已經差唔多2點可以準時到酒店check in, 大家可以用我既案例做參考，用邊間既車? 自己考慮清楚。

2：拜縣
如前述，到拜縣第1件事要做既，就係訂好第2日到湄宏順既車，aya同prempracha距離只差20米左右，去到車站問左到湄宏順既班次，原來每日只淨下1班車12個位，早上8：30分由拜縣到湄宏順，我唔肯定之前起網站見到既清邁拜縣湄宏順班次是否有改動，變成每日1班，還是有旺季淡季既班次分別，售票站的小姐好清楚肯定由拜縣發車只有8：30一班，所以，如果有人同我一樣都打算坐公車由拜縣到湄宏順，請小心有機會無位既風險，車費150baht，需時近3個小時，中間停5分鐘左右，可上廁所

由於去到拜縣時間已經近2點，到酒店check in後，打算先食午餐，之後再找景點，去酒店途中基本上好多小型旅行社，佢地有好多不同既1日或半日遊，想唔使煩交通既，可自行考慮參加此類團，印象中價錢大約500至800baht1個人，視乎行程內容而價錢唔同，全日遊既大部份早上8點已經要出發，最遲見過9點，而半日團就差唔多全部1點出發，而半日團去既都係圍繞住拜縣附近既景點，因為我起拜縣無見過有的士雙條起街等客，起搵野食期間，只見過2部雙條，貼左17：00發車到拜縣狹谷睇日落既招客廣告，司機係唔見人既，100baht 1位，最後走左入去起aya正對面叫dd all travel既旅行社，兼租電單車既舖，入面前台既阿姨可用普通話溝通，我提出我打算去既地方，佢都講明我只有1人，價錢唔會平，最後去4個地方共900baht, 行程包括山中寺廟，2戰橋，同狹谷睇日落，重有第2朝到雲來風景台睇日出，山中寺廟，2戰橋，同狹谷日落，由旅行社出發，15：30玩至睇完日落返到旅行社19：30左右，這段行程收600baht, 第2朝5：30發車到雲來，由旅行社到雲來，車程約20分鐘，入觀景台收20baht，玩到7：30左右返到旅行社，收300baht，我去既景點，都同拜縣主街道有一定距離，我唔太建議行，因為天氣太熱同距離真的算遠，參加半日一日團似比較可取既方案，我去足幾個景點，都唔會有雙條起果邊等客接人番主街，所以一定要公車既情況下，請各位因應自身情況去遊玩各景點。

3：湄宏順
如果說拜縣既旅遊圈集中大街上，那麼湄宏順就肯定圍住春甲鈴寺前既湖區做為旅遊圈，由拜縣坐巴士到湄宏順，臨入到市前，就會見到一座代表湄宏順既牌坊，之後就會入去湄宏順既市中心，如果可以的話，見到牌坊之後，不用5分鐘車程，就會到達2大市內重心地方，第1個係菜市場，第2個就係郵局，如果好似我一樣，坐車坐到訓著左，咁你只會直達湄宏順市區南邊既巴士總站，當然，如果你要買定回程既車票，直到總站又未尚不可，在車站，我當日係無任何雙條起站附近等客，只有兩部tuktuk, 1部個司機重要訓緊覺，另1司機開價80baht載我去酒店，我google過，步程只要13分鐘，車程5分鐘，你都收我80baht, 未免太懂賺遊客錢吧，最後我自己行去酒店，無錯，行完的確係全身濕透，之後睇番，其實google map都有少少令我行遠左，如果1開始就入去入面內街行，而不是跟大街走，時間應該可以再短少少，最後都去到我今次起湄宏順住既地方，班麥，我去到果時，全身濕透，女主人正在屋後廚房洗野，我按鈴等佢出黎check in, 佢一出黎，當然我道明來意，理論上14：00先係入住時間，我就問佢可否提早入住，因為前1晚沒有爆滿，所以她可以安排我提早入住，佢第1時間唔係問我攞護照，而係叫我去前台後面既早餐位坐低，開埋風扇，之後起雪櫃攞左1支凍水同佢預先準備好既果盤比我享用，之後佢先自己去前台查番我既入住紀錄，等我可稍作小休，這種貼心既服務已令我對這地方有著不錯既印象，等我飲過冰水，反而到我主動攞護照比佢處理入住既事項，之後佢有介紹住宿地方既注意事項比我知，由於共用浴廁既關係，開熱水爐，早餐等事項，之後我地又回到早餐桌上，佢就問我之前去完邊個地方，起湄宏順有什麼打算或行程，我第1時間當然問佢有關密窩村既事，佢帶左我去睇佢前台壁布上既兩張地圖，1張市內既景點圖，1張係附近近郊既景點地點，地圖上佢講左1條路線去密窩村既路線同附近景點比我知，到這時佢應該重以為我會租機車到那邊，我知道佢誤會之後，就講出我希望有公車，雙條之類到密窩村，如果可以的話，會在密窩村住1晚，行李箱就暫時寄存在這裡，只帶30L小背包出發，之後先再返湄宏順，佢想了想，之後打左1個電話，原來佢係打左比一個雙條司機，問清楚時間行程收費，就問番我第2日早上9：15，雙條黎酒店接我走，因為要先經1條村，再到密窩村，中間可能停村30分鐘至45分鐘，我可以起村行下影下相，再出發到密窩村，全程200baht, 有冇問題，當然無問題啦，我真係想話超值，佢話如果我覺得貴，佢可以帶我去市場後面問其他雙條司機，我話唔使咁麻煩，妳重要帶我去市場再問價，搞一大輪先可能慳幾十baht, 慳都唔需要慳到盡，佢已經安排好我唔使煩，雙贏，佢好多謝我咁信佢，佢話曾經有客以為佢想呃佢地錢，情願問雙條停既地方，自己去問價，覺得80baht就已經可以，聽到呢度，我1方面能理解呢種慳到盡既心態，或者佢地攞左prempracha黎做比對，無論清邁到拜縣還是拜縣到湄宏順，坐足近3小時既冷氣van，都只不過單程150baht，依家由湄宏順坐雙條去密窩村，無冷氣1個鐘車都要150baht，如果條數係咁計，你當然可以理解有80baht既雙條可以坐到，唔緊要，貴平自己心中自有定位，同供求問題，當之前5分鐘左右車程既tuktuk都收80baht，帳面計呢程車就應該要900baht，之後我繼續追問有關密窩村既交通同住宿問題，佢話密窩村其實唔算太多遊客，多數係泰國人自己揸車去玩，遊客呢就多數自己揸車或者參加左1日團過去，唔算好多人會咁樣坐雙條過去，所以唔會有雙條咁樣來回接載遊客，所以都通常要預早訂好車，再出發，我追問之前起網上睇過有旅客寫過可以7點起市場附近有雙條去密窩村，是真的話，佢話真既，真既原因在於果部雙條其實係接載密窩村既人出黎湄宏順市場買野，或者幫手送貨比村民，之後再接番啲村民返村，因為呢個唔係固定班次，雙條起市場停起邊好隨意，架車幾點開走，更加隨意，全憑司機當刻情況而定，所以有冇機會坐到果架雙條，我相信你要晨咁早起個市場附近搵到果部雙條，應該有少少難度。(11點零12點左右，市場後面就正是雙條停放既地方，當時啲司機似休息中，大家如有需要可試試過去問下有冇車會過去密窩村，收幾錢呢，咁樣單程過去，我就無資料可以提供啦！)，至於密窩村住宿方面，話圍住個湖有幾多住既地方，我去果日應該實搵到地方住，係價錢問題(參考密窩村章節)，至於回程車，佢知道應該有雙條出湄宏順，早上一定有，爭在幾點發車，叫我到時問住宿地方既主人幫手問問。咁樣check in, 同佢坐起度傾，應該傾左30分鐘左右，對於我黎講，咁樣同民宿主人可以傾咁耐，史無前例。之後我就入房整理行李，再盤算跟住既行程，因為我只在網上訂班麥1晚，之後兩晚既住宿未有安排，主要取決於有否機會去到密窩村，已幫我處理好到密窩村交通上既安排，我又打算起密窩村住1晚去睇晨早既霧鎖密窩村同日出，所以只要定好埋再後一晚既住宿安排，對我黎講，不外乎再留湄宏順1晚或是回到拜縣住1晚先返清邁? 見同dom咁好傾，於是出番房同佢訂埋後晚既房間，順便就問埋之後我坐van返清邁既買飛問題，dom問清楚我返清邁既日期同預計出發時間，就叫我比錢佢，佢陣間得閒就幫我出去訂埋車票，比得多1日房租，唔爭在即刻比埋車票錢，之後我返房攤抖左1陣，就拍我門，話已經出左去買埋車票返黎比我，又叫我再對一次車票時間等，有效率到呢！

非常感謝佢冇嫌我麻煩，問東問西，都好多謝佢為我準備既一切。

講番湄宏順，由於大部份景點都在郊外，路程亦都比較遠，不論向北既fish cave, mud spring, mae aw, pang ung, 全部都40幾公里以上，車程起碼要1小時，向南既都有40公里(根據地圖所示)，所以去郊外，一定要安排好車(包雙條或租到minivan)

至於市內，我主要去左市北既city gate，街市同市內4間寺廟，1間近市北門牌附近，1間機場隔離，春甲鈴寺，同山中廟，全部用腳行過去，個人認為，如果只留湄宏順2日1夜，基本只去春甲鈴寺同山中廟就夠，行程可咁安排，假設中午到湄宏順，可考慮到酒店或住宿check in，後在市區午餐，第1站去參觀市中心既春甲鈴寺同隔離湖區，有時間多就可去埋街市，整條街市大約2，3百米左右，之後預時間5點左右上到山中廟(從市內行上山中廟，請預步程約40分鐘，不論行樓梯那邊定沿車路上，兩條我都行過，樓梯果邊辛苦少少但應該35分鐘上到去，沿車路較輕鬆但要40分鐘)，先參觀廟同從山上欣賞整個湄宏順市區景，有運的話還可見到湄宏順既飛機升降，近日落時就繞去廟後既日落咖啡店飲杯咖啡睇日落，咖啡店正式關門時間6點，比日落時間早關門，5：30左右，由於大部份駕車人士同坐租車既人都會去到咖啡店附近，如果要買野飲，請自己留意時間，5：30左右至關門前應該係營運既高峰期，而且店員未到6點就有機會唔做生意，請大家注意，睇完日落，可出去廟睇夜間亮燈後既景色，同入夜後既市區景，同時，向市區既方向有機會睇到晚霞，7點左右就可以完成山中廟行程下山，如果行落山，不論樓梯(幾暗，燈唔多)，車路(燈較多，但部份位無燈)，都建議帶備電筒照明用。晚間既春甲鈴寺都有亮燈，值得再行1轉，晚餐可到郵局附近大街既食店或者郵局前有賣湯麵，粥既大排檔，或到近春甲寺湖區側既夜市，串燒，甜點，肉包，pad thai，海鮮都有，部份有位可坐，外帶為主，9點後人流開始減少，部份檔口會開始收野走人。街市果邊我2晚都無行過去，唔知果邊有冇野食。

***湄宏順行程建議: 假設中午到湄宏順, 可先行街市一帶, 日光時既春甲鈴寺, 近黃昏左近, 先到山中寺參觀日景, 日落去後面咖啡店睇日落, 再影多次山中寺夜景同高望既湄宏順市景, 最後落山睇春甲鈴寺夜景.

山中寺後面咖啡店

日落

意外見到日落後既雲彩

3.5 baan ruam thai, pang ung
話說之前睇完山中廟落山後，我係先返左班麥沖個涼，再出外買野食，返到去dom同我講3個以色列人今晚唔再住班麥搬走左，所以第2朝只係得我1個從班麥出發，不過放心既係雙條會照黎接我，只不過行程有少少變動，因為之前話會起條村停低，有30分鐘至1個鐘可以比我自由行動，但雙條司機打番比話要改行程，起村入面唔會再有咁長時間停留，但會特登停1啲影相位比我影相，話唔好意思，其實唔緊要既，我既目標係密窩村，多停1地對我是bonus(之後當我知道原來佢停既係pang uung, 我真心希望可以留長少少時間)。

第2朝，食完早餐，9點已經準備好隨時上車走，起早餐枱同又傾下計，9：15，雙條未到，即刻打電話比雙條司機，驚佢唔記得左，原來雙條起附近接緊人，轉頭就會到，雙條1到，原來尋日3個以色列人已經起車上面，佢地最終都係去密窩村，我冇問到佢去邊搵番呢班雙條同程車係幾錢，以色列人3個都各有一個50，60l左右既背包，再加上部雙條會幫村民送貨，其他落市區買野既都1袋2袋返，1車坐足12人，其實都幾迫，所以我會話如果先停湄宏順再去密窩村，盡量只帶1個小背包比較方便。
之前話去ban ruam thai要45分鐘，其實唔止，佢自己揸電單車就可能得，咁多野既雙條同都幾多彎要轉既情況之下，再加上雙條幫村民送下貨，去到疑似村口既地方已經10：30，3個以色列人起度落左車，因為我知道要再去密窩村既話，係要多10幾20分鐘車程，所以起呢度就同以色列人分開左，雙條繼續開，過左1陣，到左似郊外既地方，突然司機停左車，負責行程既女士就叫我落車，向我做左1個影相既手勢，原來呢度就係之前dom同我講中間會停既地方pang ung, 第一站停既就係1個有水霸既地區，呢度景色一流，如果可以，真係想留耐少少，但雙條上面都仲有其他人，所以我都唔好太自私，一輛快影5分鐘左右就上番車走，開車又過左一陣，今次停左起露營區，風景一樣好靚，因為司機有落車起小食排檔買咖啡飲，而其他人都有人落車影相，今次我可以用多少少時間感受呢個地方，當時大約有5，6個帳篷起營區，整個空間非常靜，我只可以話隨便影任何相，都一定唔會差，個人認為如果有機會，又鍾意大自然景色，呢度一定要停1停，不論之前既水霸位，定呢邊既露營區，景色都非常好，值得一遊。今段停留左10至15分鐘左右，雙條就再次開車，起村派貨，送人，再出發到密窩村。

(Pang Unng)

(Pang Unng 露營區)

(Pang Unng 露營區)

4: 密窩村 baan rak thai /mae aw
起pang onng 走，再坐多20分鐘車程左右，終於黎到目的地密窩村，雙條司機起村口就放低我，果然同其他人講既一樣，一入村第一樣見到既就係李氏酒店，正對面就係李氏餐館同咖啡店，入村第一樣要做既當然係搵地方今晚住，先問李氏，當晚已經全滿，房價1950baht一晚，去之前都知道價錢唔會平，如果有其他選擇，自然揀平少少既地方住，李氏附近整個山邊都係一間間屋仔型既單位，自知都唔會平，見到整條村唔係太大，繞湖一周應該最多800米左右，就先四處走走問價，一入村左手面就是李氏，右手面近湖都有1間民宿加餐廳既地方叫大老師，一望入去，餐廳似在裝修中，餐餐後面既小屋，又見到有工人正在做工程，所以我都無入去問有沒有房間出租，之後沿小路入去，見到遠處既小山丘上有幾間小屋，似出租屋，就行過去問問，山丘小屋下有1間小攤檔開著，女店主見我一個人四圍望，就嘗試用英文溝通，我問佢上面既小屋可租用嗎？佢就領我到店側既梯級上小山丘，負責租屋既係一個後生仔，佢帶我睇左其中一間屋，，無錯，係1間獨立屋，有張雙人床加獨立廁所，無裝飾，簡陋型，租1晚佢開我1200baht一晚，我話太貴，800baht啦，佢話唔得，我再還價1000baht, 個男仔諗左陣，佢都係唔得，要1200baht, 咁就拉倒，全程靠個女人做中間人黎溝通，我望左望幾間屋，似根本未有任何租客，情願唔租都唔減價，有趣，起落番樓梯果時，我就問個女士附近其實有無比較平既地方住，佢就叫我等等，佢打電話比佢朋友問問，一問，有，600baht一晚，呢個價就合理好多，個女士重用電單車載我去佢檔口對岸既地方，即佢朋友既地方租屋，女士再一次做左中間人，同佢朋友帶我睇下起正湖邊既小屋，同樣簡陋，有雙人床，獨立廁所淋浴間，合乎背包客既類型，於是我就租左呢間湖邊小屋，見帶我黎既女士可以用簡單英文溝通，就當然問埋聽日會唔會有雙條起村度出番湄宏順，佢問一問佢朋友，再答我朝早8點，起正門口等，好，咁就順利安排好住同聽日走既事。其實沿住湖邊，好多地方都疑似係出租屋，但極大部分全泰文，加上部份根本沒有開店什或根本不知道可以問何人，我唔清楚係我搵地方住既時間不當定什麼，今次算順利地搵到幾平既湖邊屋，算係咁。
小休一陣，就出外走，打算沿湖邊去番村口李氏附近，起路口附近，有2，3間食店，但係有2間無人，1間就有單車隊起度食緊野，就決定食呢間，叫左1碗冬蔭公既船河麵，先60baht, 重有免費熱烏龍茶送，非常抵，食飯之後就去番村口附近影相，最旺都係果一帶。原來李氏側邊既一排出租屋係另一間酒店，房價1500baht一晚，出租地方起正停車場正對面，由於似無名既關係，恕未能提供，呢間酒店將自己範圍既地方，建築到好似中國風既城堡小屋，遊人可於山丘上自由走動，山丘頂可望向山另一邊既竹林同另一面既村，由於酒店位處西面，大家可以試試起山丘頂睇曰落。
如果認真比較，其實李氏同隔離既酒店，裝修上都沒多大分別，兩邊我都望過屋入面既環境，係比較整潔企理，除外貌不同加上李氏有埋種茶園區，其實兩間分別不大，兩間既近山頂位都在進行加建工程，價錢起呢區係高，但在可接受範圍，另外如果被安排住近山頂，上上落落可能有少少麻煩，想住好少少，這兩間應該是密窩村最好的地方，同兩間負責人都可用英文溝通。我住的湖邊小屋，離村口5至10分鐘步程，價錢平，但屋內牆角有蜘蛛，床邊地下有條蟻路，同要租到可能要多少少時間去搵。
午後時間就主要在兩間酒店既山丘上行，起李氏既種茶區重遇3個以色列人，佢地都有起pang onng度影相，但佢地點樣由pang onng再坐車過密窩村我無追問，只知道佢地都係揀左住我果邊既湖邊屋，都係600baht, 大家都選擇左較平價既住宿，但係佢地唔係住我左近既幾間小屋，因為我之後無再撞到佢地。
之前提過，整個密窩村其實幾細，主要都係圍繞住湖既範圍，值得行既都已在村口附近，如果唔打算住一晚睇晨早日出或霧鎖密窩村，基本上4小時已經好足夠玩完整個密窩村。
夜晚，晚餐就去左李氏餐館，記住，附近所以店舖最遲8點就全關，要晚餐既請自己注意時間。
第二朝，預計日出時間6：08，6點左右已經行番出村口停車場位等日出，早上比較清涼，可準備薄風衣，天未光，已經有一層薄薄既霧籠罩整個山區，所以日出係睇唔到既，但好仙境，山區中既霧時厚時薄，揮之不去。6：20分左右，有1部雙條起我身後經過，似載村民出村，停車場隔離有間咖啡店叫coffee ban din, 本身開7點，6：50左右佢地已經開好店，就做左佢地既第一個客，坐正湖邊，飲住咖啡欣賞湖境，7點半返到小屋收拾，好在我早預備好，7：50分，我正行上路邊，準備同房東交回鎖匙，這時雙條經過門口，響號兩下，房東即跑出來，原來呢部就係出番湄宏順既雙條，好在我晨早準備好，唔係就有錯過呢班車既機會，雙條起開出村口果時都開得非常慢，中間會間中響號兩下，應該就係提醒村民雙條已到，要上車既就要注意喇，8點，準時起村口開走，正式離開密窩村，中間有人上上落落，返到湄宏順差唔多要9：15。8點後有無其他雙條出湄宏順我唔清楚，如果住起兩間村口較貴既住宿，應可問負責人時間或另作安排。