武漢肺炎瑙魯疫情

武漢肺炎瑙魯疫情係介紹「武漢肺炎」喺瑙魯嘅爆發情形。截至2022年7月1號，瑙魯夾埋有3398單確診病例，冇人死亡。

情況

全程零感染

瑙魯既係世界最細嘅島國，又係人口超少嘅國家，加上成個國家都係四面環海望唔到邊。旅遊方面，即使係行路都可以玩晒成個瑙魯，加上成個島都係鳥屎形成嘅磷酸鹽地搞到當地居民頂唔順，所以好少見到有境外旅客出入境。境內先至得1個國際機場，喺爆發武漢肺炎疫情之前，淨有往返基里巴斯、斐濟、馬紹爾群島、湯加同澳洲布里斯班嘅5個城市航班，且一個禮拜得三班飛機往返。自從澳洲喺2020年3月2號發現第一單武漢肺炎感染個案後即刻禁晒中、意、韓三國旅客入境，甚至唔畀境外船隻靠近；同月19號因斐濟確診第一單武漢肺炎而繼續減少航班，淨得澳洲布里斯班先至有飛機往返兼減少到每個月兩班飛機。重規定埋境外返瑙魯啲人必須要喺當地旅館隔離14日，證實冇事先至畀入境。

雖然喺2021年12月14號喺瑙魯附近證實出現過輪渡感染武漢肺炎案例，但輪渡冇打算入瑙魯而冇計數。嗰時因海空道路都封鎖嗮，所以從2020年1月24號開始一直以嚟，瑙魯兩年幾未出過任何武漢肺炎感染個案。

失守

2022年4月2號，瑙魯確診咗第一單且一次過出現兩單感染武漢肺炎個案，患者出自喺2022年3月27號入境澳洲昆士蘭州布里斯班隔離，3月31號搭從布里斯班直達瑙魯嘅航班後入境瑙魯，入境前核酸結果測試過3次都係陰性，直到第4次檢測先至證實感染武漢肺炎。4號又再確診第三單感染武漢肺炎個案。事發後，醫院都規定凡係入去探病或睇病啲人，都必須要佩戴口罩。同月27號確診第4單感染個案。

踏入5月，第一日確診第五單感染個案；10號再次確診兩單感染個案；14號確診第八單感染個案。隨後一直冇確診個案，直到6月13號當日確診5單感染個案。到月底最後一日，總確診數去到13單。

大爆發

2022年6月21號，瑙魯當地出現第一次大型爆發感染武漢肺炎個案。當日出現單天確診372單嘅恐怖記錄。據了解，之所以爆發咁多人感染武漢肺炎，可能係因境外輸入嘅無症狀感染人士去到洗車舖開工時，造成大量人傳播感染有關。事發後，當地嘅自駕洗車業務都俾政府睇成聚集性行為而被勒令停業；喺街邊做擺攤銷售啲人都必須要佩戴口罩。三日後，感染數繼續飆升，總感染數重突破咗一千大關；同月26號重達到單日新增感染756單嘅恐怖記錄。嚟到月底最後一日，總感染數去到3,398單。