歐超聯縮水復活　3大豪門搞季前4角賽

最強博彩盤路過關神器《串績王》：http://win.on.cc/football/　

上年4月搞到球壇立立亂嘅歐超聯計劃，喺各方反對下2日之內閃電崩潰，不過皇家馬德里、巴塞隆拿同祖雲達斯一直堅持計劃唔肯退出。據《ESPN》報道，呢3支西甲、意甲豪門死心不息，準備今個夏天搞「縮水版」歐超聯，拉埋AC米蘭喺美國進行季前4角賽。

最初有12間歐洲名牌參加嘅歐超聯隊已經瓦解，但作為搞手嘅皇家馬德里、祖雲達斯同巴塞隆拿，對於呢項吸金大計仍死心不息，第1步係喺美國以季前熱身賽形式復辦，並且邀請已經退出嘅AC米蘭參賽，據報舉行地點會喺西岸城市，多個城市都表示有意承辦，畢竟皇家馬德里對巴塞隆拿呢場「西甲打吡」極具叫座力。

歐超聯今次縮水復活，規模唔會比之前舉辦多年嘅國冠盃大，而且只係季前熱身賽形式，預料唔會面對太大阻力。歐超聯原本由12隊組合，但英超「BIG 6」以及馬德里體育會、AC米蘭同國際米蘭已經喺壓力下宣布退出。