【Emily】笑藍衫鄺仔二五 陸頌雄被揭貼改圖 - 20210303 - 港聞 - 每日明報 - 明報新聞網

港聞

港聞二

【Emily】笑藍衫鄺仔二五 陸頌雄被揭貼改圖

【明報專訊】工聯會郭偉强一再要求政府立法打擊假資訊問題,不過工聯會另一議員陸頌雄前日喺facebook轉發咗一張「P圖」,圖中「35+大搜捕」被告之一、暫未被控嘅民主黨鄺俊宇(鄺仔)前日著「藍色外套」,P圖上面引述「網民:會唔會再度走入中聯辦」。陸頌雄轉發,加上字句指對方係「鄺二五」,並揶揄「我唔會笑篤灰又要供樓之類」、「真心悔改都係好事」,又話希望唔係「P圖」。

刻意推光藍色 網民鬧散播假新聞

不過陸頌雄轉發嘅的確係P圖,原圖出處係《獨立媒體》嘅新聞圖片。獨媒前晚已批評陸頌雄散播偷圖兼P圖嘅假新聞,話有人刻意加強及推光相片嘅藍色色調,令鄺俊宇嘅外套及口罩變色,而圖片右下角仍隱約可見該網標誌。陸頌雄轉發嘅嗰張P圖,右下角有「N.T.監察聯盟」標誌,疊咗喺「獨立媒體」嘅水印上面。

由建制派組成嘅「N.T.監察聯盟」都有轉發呢張P圖。有唔少網民喺陸頌雄個帖留言,批評「發佈假消息等於講大話」、「作為議員竟然散播假新聞」;有人貼上原圖,亦有網民質疑點解咁耐都唔刪圖澄清。

上 / 下一篇新聞