【吃掉前男友】女星最hurt情傷 姜麗文三度自殺 楊思琦「落錯車」大肚

呢期Viu TV節目《吃掉前男友》搵到一班女藝人食住講舊情史，最新一集嘉賓小儀提到一段多年關係，因為工作忙碌同埋對方出軌而告終，但係留低嘅瘡疤，原來仲喺心入面。

正所謂「一世人流流長，總會遇到幾個衰人」，女藝人都唔例外，慶幸佢地都走出情傷低谷，加油呀姊妹！

莊韻澄數臭舊愛超多外遇 矛頭直指張致恆

《吃掉前男友》其中一位主持莊韻澄（Xenia，前名莊端兒），自爆有位前度嘅外遇之多係前所未見，甚至試過由記者口中得知對方「偷食」，莊韻澄問呢位男友點回應記者，對方竟然叫佢答分咗手，咁就唔算係偷食！因為呢段關係太傷，Xenia曾經抑鬱甚至想做傻事，即使復原過來，揀對象都變得好小心。

由於莊韻澄同張致恆(Steven)拍拖4年，而男方又出名多女埋身，「渣男」真身呼之欲出。Steven太太就喺IG回應「唔使提醒我老公係一個咩人」。

張致恆另一舊愛 鍾舒漫再遇偷食男吳浩康

張致恆舊愛多蘿蘿，包括同門嘅鍾舒漫（Sherman)。佢地拍拖多年，最後都係因為Steven出軌而玩完。之後鍾舒漫同又係同公司嘅吳浩康(Deep)發展，本來一切順利甚至談婚論嫁，但係2015年吳浩康被影到當街激咀女model，鍾舒漫單方面宣布分手。Sherman舊年因為情緒問題停工一年，但係早排又同吳浩康露營兼拍youtube片，仲大讚Deep係好男仔，有網友都叫佢地不如復合。

楊思琦撇李泳豪 錯愛吳帥寧做單親媽

思琦本來形象唔錯，同李家鼎細仔李泳豪拍拖多年，個個都以為會拉埋天窗，點知2011年楊思琦單方面表示同豪仔分手，又有傳當時思琦已經有喜，新歡係前港隊跳水運動員吳帥。後來有報導指吳帥原來係空心老倌，思琦即使陀住B都決定狠撇。2012年思琦喺美國誕下女兒楊卓穎，坐完月就向TVB報到復工搵奶粉錢。2014年離開TVB轉為北上發展，靠登台同商演搵食，一手湊大女兒。去年10月思琦宣布同圈外男友結婚，今年2月誕下B仔。

地下情男友偷食 朱茵捉姦摸床

同黃貫中結婚多年，而家家庭生活美滿嘅朱茵，喺《志雲飯局》提過，入行後試過同一位男藝人發展地下情3年半，試過同男友一齊外地拍戲，有日早收工去男友酒店房拍門，對方遲遲應門後神色慌張，朱茵入房摸摸床鋪發現有餘溫，而且廁所門反鎖，佢就知道男友偷食！網友按照朱茵描述嘅時序，估計當時佢係同傳過緋聞嘅周星馳拍緊《西遊記》，同片嘅莫文蔚都係星爺緋聞女友。

受情傷 姜麗文3度計劃自殺

曾經傳過同鄭俊弘拍拖嘅姜麗文（Lesley），今年初分享自己患上抑鬱症嘅經歷。Lesley透露6年前經歷過感情創傷，情緒大受影響，曾經寫定遺書，並且行出露台打算寫完人生最後一首歌就自殺。後來因為諗到首歌嘅編曲處理而打消念頭；另外有2次嘗試自殺，都係多得哥哥姜文杰救佢一命。Lesley之後以運動等方式改善狀況，年初更宣布同圈外男友結婚。