吳帥劏房曝光
被傳另結富豪新歡而且有埋身孕嘅楊思琦，早前公開承認前跳水運動員吳帥（Andy Ng）係佢新男友，不過一認就出事，呢個到依家都冇現過真身嘅新歡，連日來被人不斷唱衰，不但被爆曾拖欠公屋租金，又被爆借人錢唔還，仲被揭發早前一直住土瓜灣劏房，完全唔似富豪不特止，而且似乎錢銀上帳目都幾混亂。難得佢老友兼前跳水隊友俞越，不斷同佢講好說話，仲話佢爸爸係上市公司主席，做礦產生意，又話吳帥住堅尼地道。
東姑日前去過吳帥間劏房舊址，發現百幾呎面積嘅劏房，環境真係幾惡劣，不過由於單位已經被收購，相信都唔會有新住客入住囉。東姑又去過白田邨一單位，資料上有一同名同姓嘅吳帥，曾住喺該單位，○六年時被小額錢債法庭追債三萬，但以上單位住客，稱吳帥○七年已搬走，一問佢關於楊思琦啲嘢，佢仲即刻閂門，嚇親東姑。
楊思琦近日發力搵錢，不但常出外為無綫電視節目《寵愛有家》開工，又到深圳登台，密密做冇時停。
楊思琦嘅新歡吳帥，與俞越老友鬼鬼，不但同樣曾經係奧運香港跳水代表，○四年時仲一齊到諸聖中學開辦跳水班。
有疑似吳帥，曾入住白田公屋太田樓，○六年時因欠債三萬，被人追債上小額錢債審裁處，該單位住客承認有「跳水嗰個吳帥曾住喺度」，但一問及楊思琦，即刻退後閂門。
該劏房位於土瓜灣馬頭圍道，呢座樓宇內嘅單位，有唔少已被財團收購，包括吳帥曾住嘅劏房。
