Facebook

【18周年死忌丨浩瀚煙波裏 懷念梅艷芳 「大家要抱住心情，千祈唔好消極，要積極。」】

2003年12月30日，一代天后梅艷芳因子宮頸癌併發肺衰竭病逝，終年40歲。今日是梅姐18周年忌辰，浩瀚煙波裏，我們懷念梅艷芳！
梅姐天生傲骨，有俠女風範，雖然生命短暫，但她說過的話、做過的事，讓懷念她的人永誌不忘！《娛壹》整理了部份梅姐人生bite，留下只有思念！

1982年 奪新秀金獎後談童年
「我嘅童年同其他小朋友唔太一樣，所以好羨慕普通小朋友嘅生活。中學一年級，大病咗一場，休養咗一段長時期，功課趕唔上，就冇繼續正式讀書，只靠自修。」
「跟同齡嘅人相比，我覺得自己好老，可能因為從小已出嚟做嘢！我認為青春有一個特點，就係『放』，但我好小年紀已擔負好重嘅擔子，所以冇感受過青春。」

1990年 到多倫多出席活動獻唱
「今年形式有少少特別，過往嚟通常帶好多燈光、設計過嘅舞台、好華麗衣服，但今次完全冇，冇咗壞女孩嘅樣、妖女裝束，淨係得番一副殘相，但係我相信我有一顆熱情嘅心、真摯嘅心，我所有做嘅嘢都會得到你哋諒解，就算唔好，你哋都會原諒。」
「曾經有人問過我，你唔擔心第日畀人秋後算賬？我使乜驚呀，我就係兵嚟，勇字當頭，衝呀！」
「大家要抱住心情，千祈唔好消極，要積極。」

1991年告別舞台演唱會
「好多人問我點解會告別舞台？真正原因係乜嘢？第一，我擔心自己體力負荷唔到，一個幾大壓力嚟，因為買飛入場想睇生生猛猛跳跳紮嘅梅艷芳，冇人想見到我只係攞住支咪唱，我驚觀眾會覺得我有欺騙嫌疑。」
「好多人覺藝人做演唱會為錢，錢固然重要，但唔係最重要，喺舞台上我會執到信心，因為私底下我係一個非常自卑嘅人，唯獨喺舞台上聽到你哋歡呼聲，係我最滿足時候。」
「過兩年三張嘢，三張嘢喺舞台表演唔係苦事，但三張嘢都未搵到男友有少少牙煙，我好擔心80歲仲要撐住枴杖唱《壞女孩》，所以想畀自己多啲時間脫下女強人面具，用真正賢淑梅艷芳面孔見大家，其實我都可以嫁得出去。」

1992 《百變梅艷芳告別舞台演唱會》慶功宴
「我唔苛求觀眾一生一世記住我，隨時光過去，一切總會淡忘，我只希望對得住自己、社會、朋友。」

1992年 梅姐接受鄭裕玲《星夜傾情》訪問
「我聰明唔夠你一半，我諗我算係幾幸運，由新秀出嚟好多人睇到以為平步青雲，但中間好多暗湧，都跌過好多次，好在我唔係一個好靚嘅人，如果好靚，我會局限咗，唔會扮妖女。」
曾否怨媽咪剝削了你的童年？「冇得怨，人條命生出嚟係咁就係咁，怨就怨天，我媽媽唔係幸福婦女，老公一早唔喺度，一手帶大我哋四個子女。」
為何91年宣佈告別舞台？「好多年前已計劃喺舊年退出舞台，最主要原因係體力問題，因為形象可以變，但體力冇得走雞，喺舞台唔夠氣就唔夠氣，冇得走雞，我好怕有一日喺台上唱唱吓走音，或唔夠氣或跌喺台上，我承受唔到呢種壓力，喺我有能力做得到時，我做一個好美麗回憶畀你哋睇。」
「我係一個非常自卑嘅人，人哋覺得我好強，其實我收藏得自己好緊要，細個俾人話我係醜小鴨，唯獨我喺舞台上拾回信心。」
你估97年你會在那裏？「我會喺香港，一定。」
尋找另一半條件？「冇特別條件，最緊要眼緣，呢個亦係緣份，好多人話我鍾意靚仔，唔係喎，可能我嘅審美眼光外表一定要乾淨。」
「婚姻其實係一場賭博，必需要投注，呢樣睇你條命，唔試永遠唔知。我一直對婚姻好嚴格，要挑選好多樣認為適合先會結婚。」
「我係一個唔識講錢嘅人，從來冇錢交過我手，所以我唔知自己係咪叫大使，通常買嘢都係簽卡或開支票。」
覺得自己還欠缺甚麼？「好多嘢表面睇，外間睇我風平浪靜，其實好多暗湧，你睇我而家好似好開心，但其實我有好多嘢唔開心，不過唔係好大件事，我只係求健康同平安，家人朋友個個都好好，我就好開心。」
「你畀我有幾億萬，我會覺得係負慮，可能好多人打你主意，錢係需要，但唔係好重要，比起生命，我覺得生命更有價值。」

1995年 「梅艷芳一個美麗的迴響演唱會」
「曾經有人問我，梅艷芳，如果要你揀，你會情願做個快樂嘅普通人呀，定係做個更閃亮亮嘅明星？我希望選擇做個快樂而又普通嘅老實人。」
「如果有一日，我離開呢個舞台，離開呢個樂壇，離開呢個娛樂圈嘅時候，又究竟真真正正有幾多人會想起我？會記得有梅艷芳呢個人物呢？」
「我唔敢要你哋承諾，我只希望，大家喺某一晚晚飯後，打開窗，抬頭望向天上嘅星星時，見到其中一顆星嘅時候，你會想起有一個曾經好熟悉嘅名字，一個曾為你帶嚟少少歡樂嘅朋友，佢名叫梅艷芳。」

2000年 胞姊梅愛芳病逝後 強忍悲痛受訪
「今次令我有所啟發，我嘅人生觀有所改變，要活得堅強，任何逆境，更多挫折，更多不快，我都會同自己講：It's nothing！冇任何東西比生命更重要，只要有生命，任何事都可以從頭再來。」
「對於未來， 說 『通』， 係積極 ； 說『化』，係消極，所以我唔想『化』。生命係微妙嘅，不管明天如何，都應該把餘下嘅日子活好。人生始終是苦，喺邊個位置都會受苦，冇錢嘅時候固然苦，有錢同樣有煩惱，無論邊個身份都有自己嘅煩惱。」

2002年 告訴劉培基患癌的事
「Eddie哥哥，呢一生人我都好尊敬你，好聽你嘅話，但呢次希望你畀我自己做一個決定。人生，都不過係咁樣，都係辛苦嘅。我會接受治療，但如果要我受好多痛苦，咁我就唔想了，因為我覺得我已經好辛苦。我想先試中醫，我比較相信中醫，而且中藥治療冇咁辛苦。」

2003年 秘密與癌魔搏鬥
「做人咁多苦惱，我呢一生甜酸苦辣都試過，下輩子，我寧願做一隻小鳥，喺天上飛來飛去。」

2003年 談一生最愛
「我唔講邊個人，只可以講係異地戀嘅一段。如果再揀一次，我都係會再去愛一次，可以話呢段係最值得緬懷嘅一段情。」

2003年 病重仍堅持舉行演唱會
「一定要做，唔做就冇得做了。」

2003年 最後個唱「經典金曲演唱會」
「我着婚紗好唔好睇？不過，錯過咗時間，好可惜，其實我都有幾次可以着婚紗，不過我錯過咗。每個女性夢想都希望有屬於自己婚紗、屬於自己婚禮，我相信我冇乜機會。」
「我係一個歌手，亦都係一個演員，着婚紗唔係我第一次，但婚紗唔屬於我。我終於搵我拍檔劉培基，我話我好想一次，就算嫁唔出都好，做一件婚紗真正屬於我自己。」
「夕陽好靚，黃昏好靚，但好快，眨吓眼會變成過去，所以我哋要把握每分每秒。」

#梅艷芳 #18周年死忌 #娛壹
-------------------------------------
即刻跟住Follow 晒我哋Channel：
FB：http://fb.me/as1hk.entertainment
IG：https://www.instagram.com/as1.entertainment/
YT：https://www.youtube.com/channel/UCgaIJfwFLXQsasrffZt4cEw