反起跑線聯盟｜梁詠琪被指演技不及《BB來了》李佳芯 教女情緒大爆發一幕惹共嗚

ViuTV劇集《反起跑線聯盟》踏入結局周，係ViuTV首次以親子育兒作題材嘅劇集，首兩周平均收視為5.1點，觀眾大讚從中獲得共嗚；梁詠琪（Gigi）於第9集情緒大爆發一幕亦贏得讚賞，觀眾仲留言話呢套劇成功令佢反思自己同小朋友之後條路應該點行。不過，《反起跑線聯盟》自開播以來，就有網民將佢同TVB同樣以親子育兒作題材嘅劇集《BB來了》比較，亦指梁詠琪演技不及《BB來了》女主角李佳芯（Ali）。

梁詠琪入行27年出演多部電影，呢次《反起跑線聯盟》係佢首次擔正女主角嘅電視劇；佢曾喺受訪時表示，與強尼飾演夫妻嘅相處過程中好輕鬆有好多歡樂，亦因為自己本身都係媽媽所以容易拿捏角色。不過，有觀眾就將梁詠琪與李佳芯比較，指李佳芯喺《BB來了》飾演事業搏殺期發現有咗BB，由抗拒到接受嘅演出，令人感受到為人母親嘅偉大；反觀認為梁詠琪與強尼嘅演出欠缺夫妻之間的親密情感，亦未能從中感受到梁詠琪與女兒陳雪瑤當中嘅母女溫馨感。

不過，其實有唔少媽媽觀眾都被梁詠琪感動到，例如第9集梁詠琪因湊囡做功課而情緒失控一幕，引起觀眾共鳴。劇情講述，梁詠琪為囡囡報讀補習班以升讀名校小學，不過囡囡想放棄，正正強尼回家，囡囡就會衝去爸爸到，令當時生病嘅梁詠琪怒火一觸即發爆了兩段媽媽金句，唔少網民都話句句入心。而梁詠琪曾分享自己亦親身經歷過類似事情，指對於媽媽嚟講，爸爸只係一句話就成為好人，而自己教導子女嘅功夫都白費，莫名其妙成為壞人。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！